Vida e actualidade da Diocese de Lugo
A Catedral de Lugo acolle a xornada de oración pola paz en Siria, en Oriente Medio e no mundo enteiro o sábado 7 ás 19 h. Invítase a participar a todos os fieles que o desexen.
Outra parroquias da Diocese tamén se unen á Xornada, como así o fan constar algunhas delas en comunicacións públicas por distintos medios e que reproducimos aquí.
Xaime Delgado enunciaba deste xeito as diferentes tipoloxías que se atopan na Galiza: “Primeira. A das catedrais e a de moi importantes igrexas. Son de tres naves con outra transversal, perpendicular a elas, chamada transepto. En correspondencia con cada nave e facendo de cabeceira ao transepto, teñen tres ábsidas. A central, ou capela maior, é de máis amplas proporcións. As dúas laterais, máis ou menos xemelas, son notablemente máis pequenas. Co transepto plásmase con máis realismo a planta en forma de cruz –a mesma que atopamos na Seo galega-”. E continuaba: “Segunda. A de igrexas importantes. Teñen tres naves coas súas tres ábsidas, mais carecen de transepto –coma a da igrexa de San Vicenzo de Pombeiro, Pantón. Terceira. A de algunhas igrexas igualmente importantes. Constan dunha soa nave á que segue un transepto coroado por unha cabeceira triabsidal – características da igrexa de Vilar de Donas, Palas de Rei-. Cuarta. A do resto de igrexas con cabeceira da ábsida semicircular. Moitas destas igrexas teñen singulares valores –coma san Nicolao de Portomarín- Outras moitas son pequenas e sinxelas –coma san Miguel de Bacurín, Lugo-. Quinta. Trátase de aquelas igrexas cuxo presbiterio -ábsida- é de planta rectangular –coma a igrexa de santa María de Camporramiro, Chantada-.”
Nin que dicer temos, que a tipoloxía máis numerosa no país é a que Xaime describe en derradeiro lugar, continuadora das ábsidas precedentes, as prerrománicas, que implicaban unha destreza menos técnica que un muro semicircular; de igual xeito a cubrición soe ser de madeira. Posiblemente razóns económicas e técnicas levan a que esta tipoloxía esténdase dende o primeiro románico até un románico moi posterior. Do mesmo xeito, e pola contra das grandes e importantes igrexas, a maioría dos templos galegos presentan unhas pequenas xanelas, saeteiras –con derrame cara ao interior que manteñen o ambiente mistérico.
Carolina Casal
Conservadora do Museo Catedralicio
Xoves 5 de setembro
Mesa redonda ás 20 h. na Deputación Provincial de Lugo co tema: Aproximación á vida e obra de Xaime Delgado. Interveñen: César Carnero, Adolfo de Abel Vilela, Félix Vázquez.
Sábado 7 de setembro
Viaxe polas terras de Taboada seguindo os escritos de Xaime Delgado: Igrexas, Pazos, Sepultura antropomorfa. Ofrenda floral a Xaime Delgado en Castelo.
Venres 13 de setembro
Cabodano de Xaime Delgado en Castelo (Taboada) ás 18h.
Domingo 15 de setembro
Ábrense as igrexas que amou profundamente don Xaime: Cerceda, Bouzoa, Taboada dos Freires, Piñeira, Campo, Castelo, Bembibre, Pambre. Pola mañá e pola tarde.
Con motivo do conflito que afecta á poboación de Siria, o Papa Francisco convocou en toda a Igrexa universal, para o próximo 7 de setembro, véspera da Natividade de María, Raíña da Paz, unha Xornada de oración e xaxún pola paz en Siria, en Oriente Medio e no mundo enteiro.
A Igrexa diocesana de Lugo, facéndose eco desta invitación do Papa Francisco, únese a esta iniciativa, polo que exhorta aos fieis das parroquias, aos membros das comunidades relixiosas, movementos apostólicos e institucións, a vivir esta Xornada de xaxún e oración desde as 19 h. ata as 24h.
Na nosa Diocese, dado o seu carácter eucarístico, invitamos especialmente a organizar momentos de oración ante o Santísimo Sacramento na S. I. Catedral, rosarios, eucaristías pola paz, exposicións eucarísticas, celebracións da Palabra, actos penitenciais e outras formas de celebracións. Deste xeito, uníndonos ás intencións do Papa, imploramos de Deus o don da paz para a nación siria e para todas as situacións de conflito e de violencia no planeta.
Ramón Rodríguez Mondelo, naceu o 9 de xuño de 1939. Recibiu o bautismo na parroquia de Santa María de Villaster, Quiroga. Estudou no Seminario de Lugo e foi ordenado sacerdote polo Bispo Ona de Echave o 11 de agosto de 1963.
Tras dous anos como coadxutor da parroquia de Santa María da Régoa, en Monforte, foi destinado á parroquia de San Martín de Suarna, na Fonsagrada.
A esta parroquia inicial iránselle engadindo as parroquias de Lamas de Campos, Fonfría, Monteseiro, Allonca, A Fonsagrada, Poboa de Burón, Padrón, Negueira de Muñiz, Ouviaño, Barcela, Ernes, Río de Porto e Cuiñas.
En 1990 foi nomeado arcipreste da zona.
Todo o que coñece a Don Ramón sabe que pasou a súa vida ao servizo da Igrexa, completamente entregado ás súas parroquias e fregueses. Aínda que non naceu alí converteuse nun fonsagradino máis. Aceptado e estimado por todos eles.
A súa cara amable, o seu xesto tenro e sincero, a súa xenerosidade con todos, en especial cos pobres, son trazos do seu carácter e a súa maneira de ser que o fixeron un sacerdote moi querido e apreciado.
A súa preocupación polas igrexas levouno a arranxalas mesmo co seu propio diñeiro. As súas restauracións destacan polo gusto e estilo co que se levaron a cabo. Foi o precursor da recuperación do Santuario de Nosa Señora da Veiga en Negueira de Muñiz, cuxa festa se celebra o 15 de agosto.
Don Ramón é un home de gran formación teolóxica e moita sensibilidade litúrxica. Destacan os seus espectaculares beléns en Nadal e os coidados monumentos en Semana Santa.
Ademais é o gran impulsor do Camiño Primitivo. Puxo en marcha, con moito esforzo, o primeiro albergue desta ruta na parroquia de O Padrón. Tendo en conta a atención espiritual e material a todos os peregrinos.
Don Ramón celebra agora as súas vodas sacerdotais. Cincuenta anos ao servizo da Igrexa e dos seus fieis. A súa vida de entrega aos demais é motivo de agradecemento. Un verdadeiro pastor que viviu entregado ás súas ovellas.
[María José Campo López-Barcia – Miguel Ángel Álvarez Pérez]