O Seminario Diocesano, o Instituto Teolóxico Lucense e o Instituto Superior de Ciencias Relixiosas (extensión da Universidade San Dámaso) abriron solemnemente o Curso Académico 2018-19 o pasado día 30 de setembro.
Encargouse da lección inaugural Vanesa Ferreiro, que explicou como tralo Concilio de Trento as masas eran catequizadas por ordes relixiosas, pero tamén a arte contribuía a expandir a doutrina, como por exemplo El Greco e o seu cadro “El entierro del conde Orgaz“. En canto á literatura, Frei Luis de León adopta a postura tridentina da desvalorización do mundo terreal, cunha linguaxe simple. Pola súa parte, San Juan de la Cruz e Santa Teresa souberon expresar a súa experiencia mística, e desde o punto de vista da forma, máis complexa, prefiguran o Barroco, pois vai cambiando a maneira de comunicar a mensaxe de Trento.
Trento tamén sinalou as condicións en que se debía realizar o sacramento do matrimonio, algo que se recolle en Peribáñez y el comendador de Ocaña, de Lope de Vega, sinalou Vanesa Ferreiro que a persoa que tivese nas súas mans outra obra do mesmo autor –El peregrino en su patria, que inclúe catro autos sacramentais- podería repasar a doutrina tridentina.
Un dos puntos desa dourina trata das razóns lexítimas para entrar en combate; e a elas se refire o protagonista de El Quijote.
Finalmente, Vanesa Ferreiro referiuse á poesía moralizante de sor Juana Inés de la Cruz, que tamén fomenta o desprendemento das riquezas mundanas, como se vira en Frei Luis de León.