Presentado un novo número da revista Lvcensia

María Quiroga Figueroa

O 17 de novembro presentouse o número 65 da revista que publica a biblioteca do Seminario: Lvcensia. O acto, presidido por Mons. Alfonso Carrasco Rouco, estivo dirixido polo reitor David Varela Vázquez e tamén contouse coa presenza do director da publicación, Gonzalo Fraga Vázquez e do membro do consello de redacción, Óscar González Murado.

A parte central do acto correu a cargo da autora do primeiro artigo, a licenciada en Xeografía e Historia, María Quiroga Figueroa, que comezou sinalando:

“O Museo Provincial de Lugo ten unha serie de pequenas coleccións que quedan solapadas ou ensombrencidas por outras máis chamativas ou atraentes para o público  xeral. Este é o caso da pequena colección de louza dourada mudéxar e mourisca. A pesar de tratarse unicamente de 19 pezas, o seu interese radica en que nos transporta a catro séculos de historia do noso país”.

E sobre o contido do seu artigo “La colección de loza dorada española en el Museo Provincial de Lugo” indicou que tiña dúas partes:

“Por un lado analizamos o valor histórico artístico de cada unha das pezas e por outro reconstruímos a historia da propia colección: as súas orixes, a forma de ingreso no Museo”.

Mons. Alfonso Carrasco pechou o acto, e entre outras cuestións, sinalou:

“Que siga tendo lugar unha presentación significa que a vida segue, que a redacción segue traballando -algo que quero agradecer-, que o centro de vida e cultura que representa a biblioteca do Seminario segue abrindo camiño… A vida do centro educativo onde está instalada a biblioteca deu pasos, medra, o que é unha delicia para todos”.

 

Acto das Adoradoras Presenciais

A pasada fin de semana as Adoradoras Presenciais ao Santísimo Sacramento tiveron un acto no que se concederon medallas a varios membros da Asociación por levar un ano de compromiso. Tras unha Eucaristía na igrexa Santiago A Nova foi o acto de consagración e a entrega de medallas. Asistiron varias persoas responsables da Asociación a nivel nacional: Eugenia Kirkpatrick e o P. Ernesto Postigo SJ.

Aínda que coincide con outras asociacións eucarísticas que adoran ao Santísimo, é distinta a súa identidade: adoramos ao Señor cada mes unha noite enteira pedindo pola intención de oración do Papa para ese mes. Porque Adoradoras Presenciais forma parte da Rede Mundial de Oración do Papa. Ademais da espiritualidade propia das asociacións eucarísticas, hai outros matices: ten tamén unha devoción forte ao Sagrado Corazón de Xesús, á Virxe e un amor grande á Igrexa e ao Santo Padre”.

P. Ernesto Postigo SJ, membro do Consello Nacional da Rede Mundial de Oración do Papa (Apostolado da Oración).

[Web das Adoradoras Presenciais]

Presentación dun novo número de Lvcensia

O xoves 17 de novembro ás 18:30 h. terá lugar a presentación do número 65 de Lvcensia na aula magna do Seminario. Presidirá o acto Mons. Alfonso Carrasco, intervirán o director da revista, Gonzalo Fraga; o reitor do Seminario, David Varela.

Como colaboradora invitada, a museóloga María Quiroga Figueroa presentará a colección de louza dourada mudéxar e mourisca no Museo de Lugo. Son 19 pezas (ss. XV – XVIII), procedentes por exemplo das coleccións privadas de José Villaamil e Castro, e de Santiago Rocamora Negróns, a colección deste último foi doada ao museo por José Fernández López.

Neste novo número, Alberta Lorenzo lembra o labor das Sociedades Galegas de Instrución tomando como exemplo Roupar, estudando a arquitectura escolar.

Pablo Ferrín fala dos diversos usos das campás, concretándoo nas vías de entrada a Galicia a través dos chamados Camiños Maiores.

José Antonio Ferreiro publica o testamento do bispo Frei Francisco Yzquierdo, bispo promotor da igrexa de San Bartolomé, a Porta de Santiago, a fonte de San Vicente… Documentos inéditos axudan a coñecer a historia de Lugo na Idade Moderna.

Óscar González Murado ofrécenos unha visión do antigo arciprestado de Luaces, as súas capelanías e capeláns. Aclara por que as capelanías non sempre tiñan capela.

Lois Ladra, do Proxecto CORGORAL, publica máis de 400 refráns.

Abel Vilela fai un repaso sobre a biografía de Ramón Lías Yepes, fundador da sección de Adoración Nocturna de Lugo.

Angel Utrera estuda cruceiros das 28 parroquias de Antas de Ulla.

Manuel Carriedo continúa coa segunda parte da cronoloxía dos bispos lucenses do século VIII abordando o final do bispo Odoario e a súa sucesión.

O Parlamento Europeo non quixo defender a liberdade relixiosa dos cristiáns

Do 16 ao 23 de novembro lévase a cabo a campaña “Semana Vermella” para lembrar aos cristiáns perseguidos

 Hai uns meses, en maio, o Parlamento Europeo negouse a condenar o brutal asasinato da nixeriana Deborah Yakubu, unha estudante cristiá que foi lapidada e logo queimada polos seus compañeiros musulmáns, tras ser acusada de blasfemia. Ela só manifestara polo wasap de clase, que se escribían moitos contidos musulmáns nel.

Ao fío deste acontecemento, o deputado francés Jean-Paul Garraud pediu ao Parlamento Europeo a creación da figura dun Coordinador en contra da cristianofobia, igual que xa existe para o antisemitismo e a islamofobia. E solicitábase a condena explícita do asasinato da moza Deborah. A proposta foi rexeitada por 244 votos en contra, 231 a favor e 19 abstencións

O Parlamento Europeo non quixo defender a liberdade relixiosa dos cristiáns, nin condenar o asasinato de persoas inocentes, nin sequera polo feito de que, neste caso, a vítima sexa unha muller, considerando a especial sensibilidade feminista dos políticos europeos.

ONGs como Amnistía Internacional, Puertas Abertas, Alliance for Defending Freedom Internacional ou Axuda á Igrexa Necesitada veñen denunciando, ano tras ano, a inxusta persecución e morte de cristiáns en continentes como África, Asia e, actualmente, e crecendo, en Europa.

É verdade que non é a única comunidade relixiosa perseguida no mundo e que son moitas as minorías que sofren cada día. Pero é un feito innegable que os cristiáns están a ser obxecto dun crecente acoso que moitas veces acaba en traxedia. Segundo Amnistía Internacional, un de cada nove cidadáns do mundo que profesa a fe cristiá é perseguido por este motivo a un nivel alto, moi alto ou extremo.

Lexislacións vixentes en numerosos países son radicalmente incompatibles coa Declaración e os Pactos de Dereitos Humanos de Nacións Unidas. A pesar diso, este organismo nunca puxo sobre a mesa estas lexislacións absolutamente represivas e contrarias aos máis elementais principios humanos.

Vergoña, vergoña”, gritaron algúns deputados europeos na citada sesión ao coñecerse o resultado da votación. O eurodeputado Garraud anunciara: “Facer todo o posible para evitar traxedias é unha necesidade absoluta, non facer nada sería, pola contra, culpable”. E culpable resulta o Parlamento Europeo ou o silencio cómplice de moitos medios de comunicación, pero tamén hai unha parte de responsabilidade dos propios cristiáns de todo o mundo, porque o que sucede significa que, en boa medida, a nosa capacidade de mover á opinión pública é moi limitada.

Domínanos o politicamente correcto. A comodidade ou o medo a ser estigmatizados. Hai demasiados cristiáns, católicos, tan ocupados en observar o embigo das súas preocupacións que resultan absolutamente indiferentes ao que lles pasa aos seus irmáns de fe no mundo. Peor aínda, somos capaces de apuntarnos a todo tipos de campañas, denuncias de inxustizas, ecoloxía, pobrezas… pero, cando se trata de testemuñas cristiás perseguidas por seguir a Xesucristo, a moitos case non nos move ningunha atención.

Non facer nada supuxo que o Día de Pentecoste, de novo, 50 cristiáns fosen asasinados en Nixeria.

Ante a indiferenza política e social, ata que nos chegue a persecución a casa, é necesario reparar e denunciar este estado de cousas. É ineludible que todos sexamos capaces de conseguir que ser cristián non sexa motivo de persecución, encarceramento ou morte en pleno século XXI.

Daniel García García

Párroco de Albeiros e das Gándaras

Sesións de formación en Monforte

En Monforte de Lemos decidiron recoller unha idea que saía repetidamente nos grupos do Sínodo: a necesidade de formación de laicos. E desde o pasado 21 de outubro está habendo encontros de formación quincenais, que seguirán ata xuño e aos que asisten 25 persoas. O primeiro encontro estivo dirixido por Ramón Piñeiro e tratouse sobre as tres dimensións básicas da vida cristiá: Anuncio (Kerigma), Culto-sacramentos (Liturxia) e Compromiso (Diaconía).

O segundo encontro (4 de novembro) tratou do diálogo-resposta evanxélica da Igrexa cos diversos tempos históricos, cuestión presentada por Antón Negro.

Na seguinte sesión de formación (18 de novembro) veranse as tres vocacións na Igrexa e o específico da vocación laical.

Decembro será un mes adicado á Biblia, e xaneiro á dimensión social da fe.

En febreiro tocaranse dous temas: responsabilidade misioneira do bautizado-confirmado e a oración cristiá.

Marzo adícase a temas litúrxicos: oración litúrxica da Igrexa, o ano litúrxico e o Triduo Pascual como eixo da fe.

Abril: catequese (para unha vida laical) na comunidade cristiá laical.

Maio: Antropoloxías contemporáneas (o home cibernético ou o home animal evolucionado) e antropoloxía cristiá.

Xuño: Liturxia e vida, contemplación e acción, Corpus e Cáritas. O último encontro servirá de revisión: o aprendido, as necesidades descubertas e qué facer no seguinte curso.

A %d blogueros les gusta esto: