Diocese

Escola de formación sobre a Eucaristía

O 7 de marzo no salón de actos do Seminario tivo lugar a terceira sesión da Escola de formación sobre a Eucaristía. O licenciado en Teoloxía Litúrxica José Sánchez Piso deu unha explicación sobre o ofertorio e a pregaria eucarística.

Hai catro expresións que constitúen o fundamento da Eucaristía: coller o pan, bendicilo, partilo e dalo. Estas 4 accións seguidas aparecen tamén na multiplicación dos pans e dos peixes (Mt 14, 19) e cando Xesús se manifesta a dous discípulos (Lc 24, 30).

Igual que no comezo da Misa, sobre todo na solemne, hai unha procesión, un canto e unha oración, tamén no ofertorio hai unha entrada, un canto (chamado precisamente ofertorio) e a oración.

Ademais da pregaria eucarística por excelencia -canon romano- hai varias opcións: pregarias eucarísticas II, III, IV. Por sinalar algunha diferencia, dicir que no canon romano insístese máis en que se está ofrecendo un sacrificio a Deus e nas pregarias II, III, IV está menos ausente a mención ao Espíritu Santo que no canon romano.

A seguinte sesión da Escola sobre liturxia será o 23 de maio, que tratará sobre o rito da comuñón.

Eucaristía con motivo do Día da Muller

 

O vindeiro martes, 7 de marzo ás 19:30h na parroquia da Milagrosa (Lugo) celébrase unha Eucarística con motivo do Día da Muller.

Ao finalizar, lerase na praza da Milagrosa o manifesto que dá a coñercer a iniciativa “Igrexa polo Traballo Decente” e que asinan Cáritas, Conferencia Española de Relixiosos, Irmandade Obreira de Acción Católica, Fundación Juan Soñador, Xuventude Obreira Cristiá, Xustiza e Paz, Taller de Solidariedade e Xuventude Estudante Católica.

.

 

Cesión do Colexio María Auxiliadora por parte das Salesianas á Diocese de Lugo

Esta tarde as Fillas de María Auxiliadora comunicaron a toda a comunidade educativa do Colexio María Auxiliadora (familias, profesores e persoal) a decisión de ceder este Colexio á Diocese de Lugo a partir do vindeiro 1 de setembro de 2023. Trátase do coñecido centro educativo de infantil, primaria e secundaria situado na Avenida Ramón Ferreiro.

Ante esta noticia, a Diocese de Lugo quere manifestar:

1) Un profundo recoñecemento e gratitude ao Instituto das Fillas de María Auxiliadora pola súa presenza en Lugo. O testemuño da súa entrega e os froitos do seu labor nas súas diversas obras son un ben inmenso polo que damos grazas a Deus e ao Instituto.

2) O Colexio María Auxiliadora é expresión da vontade do Instituto de ofrecer un proxecto educativo católico inspirado no carisma de Don Bosco e de Madre Mazzarello, e presta desde hai anos un enorme servizo ás familias de Lugo. Neste Colexio, no medio de circunstancias sempre cambiantes, o seu alumnado enriqueceuse cunha formación integral enraizada na experiencia cristiá.

3) A Diocese de Lugo agradece ao Instituto das Fillas de María Auxiliadora que quixesen facerlle cesión do Colexio, cando viron inviable continuar xestionándoo directamente. Trátase dunha decisión coherente coa identidade do Colexio e coa súa permanente vocación de ser unha realidade de Igrexa na nosa cidade de Lugo. O Instituto pensou que esta era a mellor opción para garantir o futuro e a alma inspiradora do Centro educativo, ao servizo das familias lucenses.

4) Coa acollida da titularidade deste Colexio, a Diocese de Lugo quere dar un novo impulso ao constante traballo educativo da Igrexa na nosa terra, contando xa con outros dous centros diocesanos na cidade: A Milagrosa e San Lorenzo.

5) Desexamos que o Colexio María Auxiliadora, nesta nova etapa baixo a titularidade da Diocese de Lugo, poida continuar o seu camiño con renovada ilusión e seguir adiante na misión educativa fraguada baixo a guía das Fillas de María Auxiliadora.

Concerto de “Concentus Lucensis” na Catedral

O mércores 1 de marzo ás 21h na Catedral de Santa María o grupo musical Concentus Lucensis dá un concerto con música de Johannes Brahms…

Concentus Lucensis está integrado por Esperanza Iglesias (soprano), Carmen Prendes (contralto), Fernando G. Jácome (tenor), Marcos Mosquera e Antón Castro (baixos). Estarán acompañados por Nicolás Varela, ao órgano positivo; Cristina Nogueira, ao violoncelo e Giulio Mercati, nos grandes órganos da Catedral.

No programa do 1 de marzo inclúense sobre todo obras de Johannes Brahms pero tamén de Francisco Guerrero, Tomás Luís de Vitoria, Giovanni Croce, Jacob Handl, entre otros compositores.

Concentus Lucensis é un grupo vocal nacido dos fecundos encontros artísticos que teñen lugar durante as edicións do Festival organístico e do Curso de música litúrxica do Corpus Christi de Lugo. Os seus compoñentes son os mestres e solistas principais do coro lucense Solo Voces, do Orpheón Lucense e do Gruppo vocale S. Bernardo, que desenvolve a súa actividade principal entre Saronno (Italia) e Lugano (Suíza). Concentus Lucensis canta principalmente a partes reais, é dicir, cunha soa persoa para cada parte, abordando un repertorio vasto, cunha predilección particular pola polifonía renacentista.

Mesa redonda sobre os Centros de Orientación Familiar Diocesanos

O Centro de Orientación Familiar (COF) Diocesano cumpriu 10 anos e para celebralo deu a coñecer a nova sede e organizou unha Xornada sobre a Familia. Esta última tivo como colofón unha mesa redonda.

 

O primeiro participante na mesa redonda foi o creador do COF lucense Martiño Rodríguez, actualmente profesor nas Universidades de Navarra e Francisco Vitoria. Entre outras cuestións, sinalou que “o COF está chamado a servir máis alá das persoas propiamente de dentro da Igrexa se é posible ir máis alá, a capilarizar na realidade social de seu lugar. Creo que o reto máis importante dos COF na área da intervención é o reto das persoas: atopar persoas cunha formación suficiente e cunha sintonía, unha identidade e unha formación cristiá que faga que ubicarse nun COF teña sentido para elas e para o COF”.

 

 

 

Tamén interviu o director do Instituto da Familia de Ourense, Xosé Manuel Domínguez, para quen “non só necesitamos saber ben orientación, terapia, intervención sistémica senón que necesitamos coñecer o maxisterio da Igrexa e unha experiencia persoal e comunitaria cristiá desde a que vivir a misión de traballar nun COF. Necesitamos pensar todas as nosas intervencións desde a antropoloxía cristiá e desde o Evanxeo”. Invitou a “repensar o acontecemento do encontro terapéutico desde Emaús, o bo samaritano, as categorías do Evanxeo e a experiencia de Cristo de cada un”.

 

 

 

E a intervención final foi a do actual director do COF de Lugo, Nicolás Susena, que considera que “o Bispo sempre é un garante da eclesialidade, da moralidade, da identidade do COF. Aquí sempre contamos co apoio de D. Alfonso”. Tamén sinalou a importancia de “apostar pola transversalidade da pastoral familiar e reforzar a comuñón eclesial interdiocesana: traballamos xuntos os delegados de familia e os COF”

A %d blogueros les gusta esto: