Javier Diéguez participou na presentación do libro “Lecturas y Lectores de la Biblioteca Pública Episcopal de Lugo (1771-1835)” de Óscar González Murado

O 12 de marzo presentouse o libro “Lecturas y Lectores de la Biblioteca Pública Episcopal de Lugo (1771-1835)” de Óscar González Murado. O director de Publicacións Diocese de Lugo, Javier Diéguez, fixo as seguintes consideracións:

“Case 2500 páxinas. É moito contido, moita información, moito traballo editorial e tamén moitos datos que, sen lugar a dúbidas, quedaran aí para a posteridade, para uso de outros posibles investigadores.

“Estes libros, transmiten información importante para a diocese de Lugo. Coñecer a súa longa  historia, valorala, compartila na nosa sociedade é imprescindible. Se non sabemos de onde vimos, non sabemos quen somos, dificilmente seremos quen de construir o noso futuro. Por iso ten sentido o traballo que fixo Oscar González Murado para chegar aquí.

“Estes libros abordan a época ilustrada, rica e creativa. O papel da Igrexa nesta época probablemente non foi fácil, pero houbo persoas con iniciativas valiosas e xenerosas que nos transmitiron a nosa riqueza da que se fala na obra. Por iso, este libro achega un gran de area á nosa propia identidade como Igrexa, e permite saber situarnos no medio do mundo, da sociedade e da cultura para facer unha aportación vital. Se somos quen de aceptar a interpelación que nos plantexe a súa lectura, seremos quen de aportar tamén o mellor de nós para construir esa sociedad e esa cultura, o noso futuro. Todo isto é posible grazas ao traballo riguroso de Óscar González Murado”.

D. Alfonso Carrasco presidiu a presentación do libro “Lecturas y Lectores de la Biblioteca Pública Episcopal de Lugo (1771-1835)” de Óscar González Murado

O 12 de marzo presentouse o libro “Lecturas y Lectores de la Biblioteca Pública Episcopal de Lugo (1771-1835)” de Óscar González Murado, nun acto presidido por D. Alfonso Carrasco Rouco, que fixo as seguintes apreciacións sobre o autor:

“Aventurarse a un traballo destas dimensións fala ben de don Óscar. Foron anos, foi paciencia, moito esforzo, e penso que ten mérito. Agrádame facer este eloxio. E facéndoo, tamén facemos un eloxio da súa formación, do Seminario de onde vén, dos nosos sacerdotes lucenses. Hai unha historia grande de investigadores que examinaron o pasado. Sería para todos unha ledicia, un ben, que don Óscar, pouco a pouco, se convertese nun bo continuador daqueles grandes historiadores que levaron adiante un traballo de memoria desta diocese, nos nosos arquivos… Non podemos presentar unha tese sen dicir: “hai unha vida intelectual grande”. Nós temos que estar contentos non só por don Óscar, senón porque continúe unha tradición intelectual e unha vida intelectual grande”.

E sobre o contido da obra, D. Alfonso Carrasco, sinalou, entre outros aspectos, que “temos unha foto do que preocupaba na época do bispo Armañá, de como era a biblioteca, pero sobre todo, en realidade, entrevemos as preocupacións, as loitas do corazón e da alma daquel momento”.

 

Oración e discapacidade 2024

Na tarde do luns 22 de xaneiro a Catedral acolleu o acto “Oración e discapacidade”. Presidiu César Carnero, que tras dar a benvida aos asistentes, deu paso a Marisol Bravos, que narrou a historia “Os zapatos cambiados”, comentada por quen presidía o acto e polos fieis. A lectura do Evanxeo foi a parábola do bo samaritano. A Xesús Sacramentado e á Virxe dos Ollos Grandes ofrecéronselle flores e cánticos. Na parte instrumental participaron Gerardo Castedo e a irmá Mónica Maldonado (guitarras) e Patricia Castro (fagot).

O acto, organizado por Patricia Rodríguez López coa colaboración das Misioneiras Eucarísticas de Nazaret, concluíu cunha chocolatada.

[Ver álbum fotográfico]

Oración con persoas con capacidades diferentes

O luns 22 de xaneiro ás 18 h na Catedral de Lugo terá lugar o acto “Oración e discapacidade”. Suxírese a asistencia cunha flor.

Patricia Rodríguez López dirixe a liturxia de oración ante o Santísimo e os temas centrais serán a discapacidade e a infancia. Colaboran as Misioneiras Eucarísticas de Nazaret.

Ao final haberá unha chocolatada.

Comedor Social San Froilán

Como cada ano chegando o tempo de Nadal, comezan na nosa mente os interrogantes sobre os preparativos a levar a cabo para decorar, elixir o menú, número de voluntarios que colaborarán nos días sinalados e para facer deste Nadal, un Nadal cheo de novidade, non outro Nadal máis. Despois de tres anos, este é o primeiro Nadal que volve ser como o de antes, todos xuntos e en “familia”, acabáronse os tapers e a distancia física.

Por iso, segundo comezamos coa decoración das instalacións en colaboración co equipo que formamos o comedor, irmás e traballadoras, xurdiunos un interrogante. Como facer que este Nadal sexa novamente próximo e inclusivo, e facer que os usuarios que veñen comer todos os días se consideren como no seu fogar en Nadal, aínda que sexa por un intre.

Certamente, é difícil cubrir ese sentimento de familia e que nos vexan como algo máis que as irmanciñas que nos dan para comer, como eles din cariñosamente. Pero iso, non impediu que nós seguísemos empeñadas en xerar ese ambiente con aroma a fogar, acollida, proximidade, escoita e como non, a festa, a celebración… “Deus naceu no medio de nós”. Por iso, decidimos para o día de Nadal, realizar a felicitación en versión sementadores de estrelas, con eles e o voluntariado. As estrelas colocaríanse na lapela da chaqueta xunto co desexo dun bo Nadal segundo fosen entrando un por un a comer, e á saída, eles mesmos colocarían a estrela no nacemento que se atopa situado na zona de entrada. Así todos estamos presentes xunto a Deus feito neno como a gran familia universal que somos, onde non existe diferenza de raza, nación, nin relixión.

Así que nos puxemos ao choio, buscamos diferentes cores de gomaeva para realizar as estrelas e colocar a frase “Deus nace para ti”. Tarefa que axudou a facer realidade parte do voluntariado.

Chegado xa o día vinte e cinco, ás 12.45 h puñamos a punto as luces do belén e panxoliñas para realizar a acollida e felicitación. Sen esquecer traballadoras, irmás e voluntarios ataviados co noso mellor traxe de festa, ilusión e alegría de compartir e por suposto, para ser luz mediante a estrela de Belén que cada un de nós forma parte do Comedor Social San Froilán neste Nadal.

Chega o momento de abrir as portas para a acollida, usuarios sorprendidos á súa chegada de vernos con adornos do Nadal que facían máis relucentes os nosos uniformes, pero aínda máis sorprendidos da felicitación en forma de estrela e coa simboloxía que dabamos a ese momento. Isto non finaliza aquí neste intre, senón que se revive cada día ao chegar ao comedor. Eles mesmos sinalan a súa estrela como a gran ofrenda realizada ao Neno Xesús.

Desde o Comedor Social desexámosvos Bo Nadal e próspero 2024.

A %d blogueros les gusta esto: