Vida e actualidade da Diocese de Lugo
Na igrexa da Milagrosa de Lugo, o día 7 ás 19:30 haberá a Vixilia da Inmaculada presidida polo señor Bispo.
A solemnidade da Inmaculada Concepción é de precepto, pero en atención á tradición desta festa en España, o Vaticano dispensa para o ano 2013 da observancia das normas litúrxicas que impoñen o seu traslado ao luns seguinte, día 9 de decembro. Na Catedral, a Misa solemne o día 8 é ás 12h. presidida por Mons. Alfonso Carrasco.
O Sr. Bispo convida a participar a todos os diocesanos, sacerdotes, consagrados, laicos no encontro diocesano de inicio do Ano Litúrxico, que terá lugar en Silleda-Siador o próximo día 3 de decembro.
O encontro desenvolverase da seguinte maneira:
11:00. Acollida no salón parroquial da Casa reitoral de Silleda, oración e desenvolvemento do tema: “O Ano da Fe e a encíclica Lumen Fidei” por Luciano Armas Vázquez
12:30. Descanso
13:00. Celebración penitencial na igrexa parroquial de Silleda
14:15. Comida fraternal.
17:00. Eucaristía no Santuario da Saleta en Siador.
A comida, por 15 euros, será nun restaurante de Silleda. Desde Lugo disponse un servizo de autobús, sendo o prezo do mesmo de dez euros. A saída será ás 9:30 da mañá desde a Praza de Bretaña. Cómpre apuntarse para a comida e o autobús antes do 28 de novembro. Teléfono: 982 21 42 65
O día 27 presentouse o número de outono da revista Lvcensia. Un dos artigos “Juan Francisco de Castro (Doctor Castro) de Lugo” foi presentado polo autor, Óscar González Murado, que insertou ao personaxe investigado nun grupo de esclesiásticos de gran valor intelectual dos que se rodeou o Bispo Armañá a finais do século XVIII. Do Doutor Castro destacou Murado dúas obras: unha (Discursos críticos sobre las leyes…) na que se fai unha madura reflexión sobre o mundo do Dereito e outra (Dios y la naturaleza) na que crea unha arquitectura discursiva sobre Deus.
O Arcebispo de Santiago, Julián Barrio Barrio, o Bispo de Mondoñedo-Ferrol, Manuel Sánchez Monge, o Bispo de Lugo, Alfonso Carrasco Rouco, e o Bispo de Ourense, Leonardo Lemos Montanet, compareceron o 26 de novembro pola mañá en Santiago de Compostela para presentar oficialmente o Curso de Formación en Matrimonio e Familia (CFMF) que se iniciará en xaneiro do 2014.
Esta iniciativa conxunta, de todas as dioceses de Galicia, é un proxecto pioneiro en España. Será a primeira vez que un curso destas características se ofreza desde as igrexas diocesanas. Até o momento unha formación similar só se proporcionaba por universidades ou centros específicos.
Nas súas intervencións os prelados galegos destacaron a importancia que a institución familiar ten para a Igrexa. A preocupación polo seu benestar e a necesidade de prestarlle todo o seu apoio, levou á Igrexa galega a elaborar esta proposta concreta, que se materializa nun curso de formación, reflexión e intercambio de experiencias.
O día 24, festividade de Cristo Rei, é a clausura do Ano da Fe. En Lugo hai unha solemne Eucaristía na Catedral presidida polo señor Bispo e concelebrada por sacerdotes da Diocese. En lugar preferente estará a réplica da Virxe dos Ollos Grandes e a reliquia de San Froilán. A hora de comezo son as 19h e ao final da Misa impartirase a bendición papal.