Reunión sobre Doutrina Social da Igrexa

O día 11 de abril ás 19 h, na rúa da Cruz, 3, reunión sobre a Doutrina Social da Igrexa, para tratar do Estado de Dereito e a democracia.

Nos números 407 e seguintes do Compendio da Doutrina Social da Igrexa fálase das necesidades inherentes á democracia:

  • debe inspirarse na dignidade de toda persoa humana,
  • respectará os dereitos do home,
  • asumirá o ben común como fin e criterio regulador da vida política,
  • superará o relativismo ético,
  • terá unha moralidade nos fins e nos medios,
  • manterá a división de poderes,
  • os organismos representativos estarán controlados polo corpo social con eleccións libres,
  • a práctica do poder farase con espírito de servizo (paciencia, modestia, moderación, caridade, xenerosidade).

O Compendio da Doutrina Social da Igrexa tamén adica varios puntos á necesidade de contar con bos medios informativos para que haxa participación democrática. Medios de comunicación que non son tan bon cando se dá o seguinte:

  • concentracións editoriais e televisivas,
  • ideologización,
  • desexo de ganancia e de control político,
  • rivalidades e conflitos entre grupos.

Santa Misa Crismal o Mércores Santo

O mércores 4 de abril, ás 11 h na Catedral de Lugo, o Bispo da Diocese, Mons. Carrasco Rouco, preside a Misa Crismal, na que concelebran os sacerdotes da Diocese.

Nesta celebración, que manifesta a comuñón do Bispo cos seus presbíteros, bendinse os óleos que despois se reparten ás parroquias da Diocese para a administración dos sacramentos ao longo do ano: o óleo dos catecúmenos, o dos enfermos e o santo crisma.

Co santo crisma consagrado polo Bispo serán unxidos os  bautizados, os confirmados, as mans dos presbíteros, a cabeza dos Bispos e a igrexa e os altares na súa dedicación. Co óleo dos catecúmenos, estes prepáranse para o Bautismo. Co óleo dos enfermos, reciben o alivio na súa debilidade.

Celebración do Domingo de Ramos na cidade de Lugo

O Domingo de Ramos comezou no centro da cidade de Lugo pola mañá cunha multitudinaria bendición de ramos na praza de Santa María, a procesión da Entrada Triunfal de Xesús en Xerusalén e a Eucaristía.

Pola tarde, a Virxe das Dores (na imaxe) foi levada en andas por corenta confrades, ataviados cunha ampla túnica e capuz negros, e no peito o escudo co Corazón da Virxe das Dores bordado sobre branco, faixa vermella, luvas brancas e capa branca coa cruz dos Cabaleiros do Santo Sepulcro ó lado esquerdo.

Estivo acompañada pola Banda de Música de Guntín, que interpretou a súa saída a Marcha Procesional “Dolor, toma mi mano” composta para esta Virxe polo seu Director D. Manuel Yáñez. Seguindo a tradición da Semana Maior, un nutrido número de mulleres ataviadas con mantilla, escoltaron este Paso. Organiza esta procesión a Confraría do Desencravo do Señor e das Maiores Dores de María Santísima.

Celebración penitencial na Catedral de Lugo

O 28 de marzo, o Bispo da Diocese, Mons. Alfonso Carrasco, preside unha celebración penitencial na Catedral ás 19 h.

A Coresma é un tempo de renovación bautismal e penitencial. Entre as iniciativas e prácticas coresmais sobresae a penitencia como celebración da misericordia infinita de Deus.

O camiño da conversión, seguimento e renovación na fe é persoal pero tamén comunitario. Por iso, convídase a todos os fieis a participar nesta celebración do sacramento da confesión.

Retiro de preparación á Pascua para xente nova

A Coresma é un camiño de preparación que merece a pena. Facer ese camiño en grupo é máis doado. Por iso, Renovación Carismática organiza un retiro de preparación á Pascua para persoas entre 13 e 35 anos, e moitas ganas de ser feliz. Será do 30 de marzo (ás 18 horas) ao 2 de abril de 2012 pola mañá en Lugo, na Casa Diocesana de Exercicios Espirituais, situada en Bispo Ona de Echave, 14.

O prezo é de 100 euros e inclúe todos os gastos de aloxamento e manutención. Antes de facer o ingreso comprobar que haxa prazas. O prazo de inscrición finaliza o 25 de marzo.

A %d blogueros les gusta esto: