O programa de Infancia e Xuventude de Cáritas Lugo organiza as “Actividades de Nadal. Un Nadal de música”. Diríxense as actividades a nenos e nenas entre 8 e 12 anos. Entre os días 27 e 28 de decembro no Colexio Divino Mestre haberá xogos, obradoiros, cancións, saídas, teatro, festa… A data límite para inscribirse é o día 23.
Diocese
Rito de admisión ás ordes sagradas de dous seminaristas de Lugo
O martes día 20, ás 8 da tarde, na capela do Seminario Diocesano, o Bispo de Lugo, Mons. Alfonso Carrasco Rouco, presidirá a celebración do Rito de Admisión ás Ordes Sagradas dos seminaristas Daniel Gil González e Alberto Riádigos García.
Daniel Gil é natural da parroquia de Bendoiro (Concello de Lalín) e Alberto Riádigos é natural da parroquia da nosa Señora das Dores de Lalín. Ambos están a cursar 6º de Estudos Eclesiásticos.
No Rito de Admisión ás Sagradas Ordes, a Igrexa católica recoñece como candidato a un seminarista para poder ser ordenado diácono e máis tarde sacerdote.
Concurso de tarxetas de Nadal
A librería e imprenta La Voz de la Verdad convoca o III Concurso de tarxetas de Nadal para escolares
Poden participar alumnos de Infantil, Primaria e Secundaria que estuden en Galicia.
Os traballos serán tarxetas de Nadal orixinais e inéditas en tamaño A4. O soporte será cartolina ou cartón pluma. A técnica será libre.
PRESENTACIÓN. No parte traseira da obra figurarán os datos persoais do autor (nome, idade, enderezo, teléfono particular, curso e Centro onde estuda) e -para acreditar a súa
condición académica- irá co selo do centro de ensino. Os traballos enviaranse a:
PREMIOS VOZESNAVOZ.
La Voz de la Verdad.
Rúa Bispo Aguirre, 17
27002 LUGO.
Tamén se poden entregar persoalmente ou por medio do centro educativo.
Para Infantil os premios son dous lotes de libros. Para Educación Primaria e Secundaria Obrigatoria hai seis cheques-agasallo intercambiables por libros ou material escolar. Establécese tamén un premio especial á orixinalidade.
Os premios poderán ser declarados desertos.
O xurado está formado por profesores das diferentes etapas académicas e de varios centros de ensino e por profesionais do sector gráfico. Comunicará o seu fallo nos medios de comunicación e no establecemento La Voz de la Verdad. Aquí tamén será o acto de entrega, o día 17 de xaneiro ás 20 horas.
As obras, que se presentarán antes do 22 de decembro, quedarán en propiedade da entidade organizadora.
Asemblea de Nadal do profesorado de Relixión
O 17 de decembro ten lugar a Asemblea de Nadal do profesorado de Relixión da Diocese no Gran Hotel de Lugo de 11 h. a 17 h. Participan arredor dun centenar de profesores, que reflexionan sobre o tema “Didáctica da Biblia no Ensino Relixioso Escolar”. A conferenciante é a profesora Isabel Izquierdo, doutora en Sagrada Escritura.
No transcurso do acto reciben unha homenaxe dos seus compañeiros os seguintes profesores, con motivo da súa xubilación: Manuel Fernández Fernández e Manuel Belón Rodríguez.
I Encontro Eucarístico Lucense. Xornada do venres 2
Empezouse cunha conferencia titulada Presenza e Memorial: revisitando o Novo Testamento, conferencia que correu a cargo do Decano da Facultade de Teoloxía do Norte de España D. Francisco Pérez Herrero. Presentou unha panorámica dos testemuños que o Novo Testamento ofrece da Eucaristía e que son diferentes pero complementarias.
A última conferencia da mañá do venres titulábase “A carne de Cristo: a fe eucarística como expresión da fe cristolóxica no I Milenio”. O encargado de pronunciala foi o director espiritual do Seminario Diocesano de Alcalá, D. Manuel Aroztegui Esnaola (na imaxe con Ms. D. Alfonso). É un dos teólogos da nova xeración da Facultade de Teoloxía San Dámaso, onde imparte clases. Ao longo da súa exposición, foi recollendo as ideas dun artículo de Joseph Ratzinger, “Orixe e natureza da Igrexa”.
Xa pola tarde do venres, o doutor en Sagrada Liturxia, Lino Emilio Díez Valladares, falou do Culto eucarístico fóra da misa, da súa tradición e a súa actualidade. Despois do Concilio Vaticano II, ese culto afrontou unha crise tan profunda e progresiva que chegou a facer pensar na súa desaparición. Co paso do tempo, a crise foise atenuando e hoxe está superada e hai un renovado vigor. A iso contribúe a fidelidade ao culto eucarístico fóra da Misa de tantísimos crentes e de tantas comunidades relixiosas.
Aínda que a misa sexa a expresión central da Eucaristía, esta non se esgota coa súa celebración: “Máis aínda, dada a súa centralidade, todas as outras expresións de culto, litúrxicas ou non, dela derivan ou a ela conducen: estenden de diversos modos, no tempo e nas formas, a riqueza celebrativa da Eucaristía”.
Como conclusión á súa conferencia, Lino Emilio Díez, dixo o seguinte: “O que é común aos dous momentos de culto eucarístico -dentro da celebración e fóra dela- é a admirable presenza de Cristo. Esta presenza é a que motiva e provoca unha celebración máis adorante e respectuosa da Misa -da que nos dan un admirable exemplo os cristiáns de Oriente-, e a que convida aos cristiáns, persoalmente ou en comunidade, a dedicar espazos á oración ante o Santísimo e a outros signos externos de gratitude e veneración por este don da Eucaristía”.
Os actos académicos do venres finalizaron coa intervención do Director do Secretariado de Liturxia da Conferencia Episcopal. Juan Mª Canals Casas, falou dos Congresos Eucarísticos ao servizo da fe cristiá. Presentouse o papel que eses Congresos tiveron na formación cristiá e no Maxisterio da Igrexa. Finalizou a súa intervención presentando o Congreso Eucarístico Internacional que se celebrará en Dublín o próximo verán.
Pero non só se programaron conferencias, pois na igrexa de San Pedro houbo un concerto do Coro de música antiga E ULTREIA e de MENESTREIS DE 1500. Interpretaron diversas pezas gregorianas e polifónicas eucarísticas e marianas.