Presenza dos Equipos de Nosa Señora en Galicia

Copia de ENS Galicia

      En Vigo desde fai máis de cincuenta anos; en Ourense desde cincuenta e en Lugo desde máis de vinte e cinco.

Que fan? Axudar ás parellas a descubrir as riquezas do sacramento do matrimonio e vivir a espiritualidade conxugal, tentando ser testemuñas  na Igrexa e no mundo.

Propóñense:

-Basear a súa vida matrimonial e familiar no Evanxeo.

-Coñecer mellor a vontade de Deus sobre o home e a muller para cumprila.

-Dar testemuño do amor de Deus a través da súa vida.

-Promover o matrimonio e a vida familiar na sociedade.

E os matrimonios reúnense en grupos ou equipos porque unidos axúdanse mutuamente no progreso humano e espiritual.

O pasado domingo, día 18, reuníronse en Ourense (foto superior) con motivo do 50 aniversario da implantación dos ENS naquela Diocese 150 matrimonios de toda Galicia.

Celebrouse unha Eucaristía na Catedral presidida polos Bispos  de Ourense e de Astorga (este consiliario nesta cidade antes de ser nomeado bispo) e, tras a comida compartida fraternalmente, houbo unha serie de actos nos que se conmemoraron os 50 anos de intensa vida do Movemento e da súa inserción na acción apostólica diocesana.

Na diocese de Lugo os ENS están presentes desde 1988.

Ler máis

XXXVI Curso Rexional de Pastoral da Saúde

Os días 10 e 11 de maio ten lugar o Curso Rexional de Pastoral da Saúde en Vila de Suso, Oia, co tema da “Fe e caridade”. Está destinado a todos os membros de equipos pastorais dese sector en Galicia e aberto tamén a todos os profesionais do mundo sanitario, voluntarios e demais persoas interesadas.

Entre outras actividades de convivencia destacan o relatorio inaugural O enfermo ó centro a cargo de Mons. José Luis Redrado, bispo que foi Secretario durante 25 anos do Pontificio Consello de Pastoral da saúde do Vaticano; o relatorio Fe e Caridade de Ana María García-Heras, directora do SIPS de Galicia e a mesa redonda A Caridade vivida. O día 11, o relatorio de clausura Evanxelizar ou mundo da saúde por Mons. José Luis Redrado. 

O ensino da Relixión, un exercicio de liberdade

Os bispos da provincia eclesiástica compostelá, con motivo da xornada interdiocesana de ensino relixioso escolar 2014, fan pública a seguinte carta pastoral:

Queridos irmáns/ as:

Cada ano, con motivo da Xornada Interdiocesana de sensibilización sobre o Ensino Relixioso e Moral nos centros escolares tanto estatais como de iniciativa social (católica ou civil), queremos compartir convosco, pais e educadores, esta breve reflexión e invitación para descubrir e valorar a importancia da presenza da materia de Relixión nas diferentes etapas educativas.

O saber relixioso non pode quedar á marxe da construción social e dos procesos educativos. Na lexítima diversidade de opinións, non pode imporse como a única opción política e publicada aquela que trata de combater a presenza da relixión na escola e na sociedade. Hai outra que considera que o relixioso debe estar no espazo público e educativo, e que ha de ser escoitada e atendida en igualdade de condicións. E no exercicio da vosa liberdade, vós, pais e nais de familia, podedes elixir, sen que ninguén o faga por vós. Tedes o dereito e a responsabilidade de esixir que os vosos fillos reciban a educación relixiosa que corresponde ás vosas conviccións relixiosas.

Ler máis

25 de marzo, Xornada pola vida

Cartel Xornada pola vida

Os bispos da Subcomisión Familia e Vida da Conferencia Episcopal publicaron unha Nota, co título “Polos nenos; polos pais; polos avós: si á vida”, na que se incide na idea esperanzadora do lema do cartel. “Para España, para Europa e para o mundo -comezan dicindo- a apertura moralmente responsable á vida é unha riqueza social e económica. Grandes nacións puideron saír da miseria grazas tamén ao gran número e á capacidade dos seus habitantes”.

Na difícil conxuntura que atravesamos cómpre axudar económica e socialmente ás familias, pero non abonda. É imprescindible un “cambio de mentalidade e de vida que permita gañar a propia liberdade para doarse ao outro: doarse á esposa ou ao esposo, doarse aos fillos, doarse aos anciáns, doarse ao que sofre”.

A Nota conclúe chamando a recuperar “a grandeza do don e sentido da maternidade” e lembrando que “non é progresista pretender resolver os problemas eliminando unha vida humana”.

[Ver Nota completa]

Recomendacións dos bispos galegos ante o día de San Xosé

O 19 de marzo, solemnidade de San Xosé, festa de precepto na Igrexa Católica, non aparece incluído no calendario de festas do ano 2014 en Galicia, aínda que si nalgúns concellos. Polo tanto, considérase, civilmente, como día normal de traballo.

Ante esta circunstancia, os bispos da provincia eclesiástica compostelá recomendan:

– Que os fieis que o 19 de marzo teñan xornada laboral ordinaria participen na Eucaristía, aínda que quedan dispensados do precepto.

– Que os sacerdotes faciliten un horario apropiado para iso.

– Que se dea publicidade a estas recomendacións e aos horarios de misas.

A %d blogueros les gusta esto: