Vida e actualidade da Diocese de Lugo
O Consello Diocesano da Adoración Nocturna organiza, un ano máis, a peregrinación a Zamora, para asistir á Eucaristía e “Ofrenda Floral” que a Fundación “Luís de Trelles e Noguerol”, dedica ao fundador, ante o seu sepulcro, na Catedral da citada cidade, actos que terán lugar o sábado 26 do presente mes.
Nesta ocasión cóntase cun aliciente máis, xa que está previsto descubrir unha placa na casa onde faleceu o servo de Deus no ano 1891.
Xa chegou. Xa está aquí a Semana Santa. Non é unha semana calquera. É a semana que, desde a súa orixe, deu un xiro total e definitivo á historia da humanidade. Antes viviamos nas tebras e a incerteza, agora temos un destino certo e con garantías.
Di o Señor: “marcho para prepararvos sitio, para que onde eu estou esteades tamén vós”. Pódese esperar algo máis grande e mellor que participar da mesma vida do que é absolutamente grande e mellor?.
Trátase de celebrar un troco sen precedentes, onde Deus dánolo todo, até a súa propia vida, a cambio dos nosos pecados. Un Deus que, desde a súa grandeza, faise humilde e asume a nosa condición humana, para que nós participemos da súa mesma vida divina.
O camiño e prezo coñecémolo: a cruz e a morte. A meta tamén é coñecida: a resurrección e a nosa esperanza de resucitar tamén nós con Cristo.
Temos por diante unha semana para celebrar e vivir este misterio de amor. Deus ámanos até dar a súa vida por nós. Nunca ninguén o fixo antes. Agora só falta abrir os ollos e atopémonos con Cristo que sae a buscar aos que estabamos perdidos.
Miguel Ángel Álvarez Pérez
Párroco de San Froilán.
Os bispos da provincia eclesiástica compostelá, con motivo da xornada interdiocesana de ensino relixioso escolar 2014, fan pública a seguinte carta pastoral:
Queridos irmáns/ as:
Cada ano, con motivo da Xornada Interdiocesana de sensibilización sobre o Ensino Relixioso e Moral nos centros escolares tanto estatais como de iniciativa social (católica ou civil), queremos compartir convosco, pais e educadores, esta breve reflexión e invitación para descubrir e valorar a importancia da presenza da materia de Relixión nas diferentes etapas educativas.
O saber relixioso non pode quedar á marxe da construción social e dos procesos educativos. Na lexítima diversidade de opinións, non pode imporse como a única opción política e publicada aquela que trata de combater a presenza da relixión na escola e na sociedade. Hai outra que considera que o relixioso debe estar no espazo público e educativo, e que ha de ser escoitada e atendida en igualdade de condicións. E no exercicio da vosa liberdade, vós, pais e nais de familia, podedes elixir, sen que ninguén o faga por vós. Tedes o dereito e a responsabilidade de esixir que os vosos fillos reciban a educación relixiosa que corresponde ás vosas conviccións relixiosas.
En Barcelona coñecerase a obra de Gaudí, por ex. a Sagrada Familia. Tamén se verá o barrio gótico, a Vila olímpica, a abadía de Montserrat e un día haberá un traslado a Torreciudad (Huesca). Volverase a Barcelona para ir ao Parc Güell, A Pedrera, as cavas de Sant Sadumi D’anoia. No camiño de volta a Lugo, párase en Zaragoza para ir á basílica do Pilar e ver o centro da cidade.
Trátase dunha peregrinación sobre a familia que organiza a parroquia de Santiago A Nova (Lugo) entre os días 30 de abril e 4 de maio. Calquera persoa interesada só ten que dirixirse á parroquia. O prezo é de 350 euros, 413 en habitación individual.
O 8 de abril ás 11 h, o Bispo da Diocese, Mons. Alfonso Carrasco Rouco entregou o nomeamento como novo cóengo da Catedral de Lugo, ao sacerdote Luis Varela Castiñeira, que asumirá o oficio de prefecto de música.
Na entrega do seu nomeamento estivo presente o Deán da catedral, Gonzalo Fraga Vázquez e o Vigairo Xeral da diocese e secretario do cabido, Mario Vázquez.
Luís Varela ten a licenciatura en Canto Gregoriano, polo Pontificio Instituto Ambrosiano de Música Sacra de Milán, e os estudos profesionais de piano.
O oficio de prefecto de música da catedral estaba vacante desde 1989. O anterior prefecto foi José Castiñeira Pardo, tío do novo cóengo. Entre as ocupacións do cóengo prefecto de música están as de organizar todo o referente á parte musical, enriquecer e ordenar o seu arquivo; promover a participación do pobo no canto litúrxico; ensaiar ao cabido, ao pobo e aos grupos musicais que hai na catedral.
A data da súa toma efectiva de posesión está aínda por determinar.