Vida e actualidade da Diocese de Lugo
Con motivo da festividade de Santa Teresita de Lisieux, copatroa das misións xunto a San Francisco Xavier, celébrase o Día do Enfermo Misioneiro o 1 de outubro. Ese día ás 12:30 na Residencia de anciáns de Lalín hai unha Eucaristía á que invita a participar a Delegación Diocesana de Misións.
É unha xornada non só polos misioneiros enfermos, senón tamén para que todos os enfermos, uníndose a Cristo na cruz e a debilidade, se unan tamén á misión da Igrexa.
O día 30 de setembro a comunidade educativa do colexio da Asunción de Sarria peregrina á Catedral de Lugo con motivo de celebrarse o Ano da fe. Son 270 alumnos e unha trintena de membros do persoal docente… Desde as 11.30 fíxose unha visita á basílica. Tras ela é a celebración da Eucaristía, presidida polo señor Bispo e na que ten unha participación especial un grupo de alumnos en representación dos seus respectivos cursos.
Con presenza da comunidade educativa, o señor Bispo e autoridades civís (Delegación de Ensino da Xunta, Subdelegación do Goberno) o 27 de setembro fíxose a apertura solemne do curso 2013/2014.
O profesor do Instituto Teolóxico Lucense, Xesús Anxo Fernández Aira, baseou a lección inaugural (“A interpretación bíblica a partires do Vaticano II”) na publicación de Dei Verbum explicando como supuxo, por exemplo, un mellor diálogo co mundo xudeu e a xeneralización do método histórico-crítico. En canto ás implicacións teolóxicas e pastorais da Dei Verbum temos que se estuda a Biblia en dous momentos. Primeiro na vertente filolóxica (crítica textual, estudo das fontes, composición dun marco histórico) e hai un segundo momento, separado do anterior, no que se fai a interpretación teolóxica. Nas últimas décadas, como aspecto negativo está o relativismo e no lado positivo incluiríanse as boas edicións da Biblia e o seu estudo por parte de moitos católicos.
No mes de setembro de 1983 varias relixiosas trasladáronse desde Buñol (Valencia) a Lugo, fundándose así un mosteiro da orde carmelitana na Diocese lucense. Mentres remataba a construción do convento, hospedáronse nunha modesta residencia contigua ao antigo mosteiro das Salesas, na Ronda da Muralla. O convento é pois unha construción recente, situada en Bosende, Paredes, San Pedro Fiz de Muxa, preto da cidade de Lugo. Está sobre un apracible outeiro a uns 400 metros da marxe esquerda do río Miño.
A espiritualidade das carmelitas céntrase na contemplación. A súa vida transcorre no silencio, no anonimato, na penitencia e, sobre todo, na adoración.
Con motivo deses 30 anos en Lugo están a preparar un triduo que comezará o 14 de outubro e que contará coa presenza da imaxe peregrina da Virxe de Fátima.
Desde este curso recentemente iniciado, o Seminario non ten como reitor a quen o foi durante os últimos sete anos: D. Daniel García. O feito de que deixe de ser reitor motivou que os seminaristas maiores fixese público un sentido escrito. Comezan dicindo que “non hai palabras nin obras que poidan pagar o agarimo de todos estes anos, a dedicación, a entrega e o amor co que nos tratou”.
Para os seminaristas, D. Daniel García “foi un auténtico pai que aconsellou, sufrindo coas intranquilidades e alegrándose e compartindo triunfos; foi un amigo co que falar e ser escoitados, rir e chorar, gozar dos pequenos momentos propios das verdadeiras amizades; foi o ombreiro no que apoiarse; foi unha réplica do corazón de Cristo no Seminario entregando cada día a súa vida por esa casa, por cada un dos seminaristas”.