Vida e actualidade da Diocese de Lugo
O Equipo Diocesano de Pastoral está integrado polos Vicarios, Delegados Episcopais e membros da Curia, presididos polo Bispo. Todos eles participan ao longo do ano en diversas reunións de programación e avaliación das actividades programadas no eido pastoral da Diocese. No tempo de Coresma é xa tradicional participar xuntos nun retiro espiritual no Mosteiro de Samos. Este ano tivo lugar o sábado, día 9 de marzo e estivo dirixido polo bispo de Ourense, Mons. Leonardo Lemos Montanet.
A Casa Diocesana de Lugo acolle entre os días 8 e 10 de marzo uns exercicios espirituais para movementos e asociacións de apostolado segrar; laicos non asociados, matrimonios, mozos, universitarios, profesores de relixión e todo cristián laico que busque atoparse con Deus.
Organizados pola Delegación Diocesanas de Apostolado Segrar, estarán dirixidos por Julio César Doval, Padre Redentorista e párroco de San Cristovo das Viñas (A Coruña).
PROVINCIA ECLESIASTICA DE SANTIAGO
O próximo día 19 de marzo, solemnidade de San Xosé, festa de precepto na Igrexa Católica, non aparece incluído no calendario de festas do ano 2013 na Comunidade Autónoma de Galicia, aínda que si nalgúns concellos. Polo tanto, considérase, civilmente, como día normal de traballo.
Tendo en conta o arraigamento desta festividade no noso pobo, os Bispos das Dioceses da Provincia Eclesiástica Compostelá nesta circunstancia, para a orientación da conciencia dos nosos fieis, dispoñemos: Manter o 19 de marzo, solemnidade de San Xosé, festa de precepto, coa obriga de participar na Santa Misa, aínda que sexa laboralmente hábil.
Santiago de Compostela, 6 de marzo de 2013.
+ Julián, Arcebispo de Santiago.
+ Luis, Bispo de Tui-Vigo.
+ Manuel, Bispo de Mondoñedo-Ferrol.
+ Alfonso, Bispo de Lugo.
+ José Leonardo, Bispo de Ourense.
Unhas Vodas de Prata son, sen dúbida, un acontecemento singular, entrañable e gozoso. Así vivimos a maioría da sociedade lucense, amigos e admiradores das Irmás da Cruz as súas Vodas de Prata, da súa chegada á nosa cidade.
Foron 25 anos nos que o carisma de Sta. Ángela da Cruz de servizo, amor e tenrura aos máis pobres, anciáns, enfermos, marxinados… estivo presente nas parroquias de Lugo.
O acontecemento merecía unha celebración extraordinaria e así se fixo. Un triduo solemne no marco incomparable da Santa Igrexa Catedral Basílica ante o Santísimo Sacramento, permanentemente exposto, privilexio desta catedral, acollía o desenvolvemento dos actos, cuxo punto central era a celebración da Eucaristía.
