Campaña de Cáritas Lugo e Cáritas Internacional

Outlet a prol de Caritas

Os Servizos Xerais de Cáritas organizan unha tenda solidaria na Praza de Santo Domingo (Lugo) a partir do día 6 de decembro e até o 16 de xaneiro de 2014. É un espazo no que 6 comercios lucenses colaboran na organización dun outlet.

Por outra parte, lembremos que na segunda semana de decembro iniciouse unha campaña xurdida dunha iniciativa auspiciada polo Papa Francisco e realizada pola Confederación Caritas Internationalis co obxectivo de acabar coa fame para o 2025. O lema é “Unha soa familia humana. Alimentos para todos”

Xornadas de autoemprego de Cáritas

Xornadas Por que non (Cáritas)

Cáritas Diocesanas de Lugo organizou as segundas xornadas de autoemprego baixo o título `Por que non… ?’ para persoas que buscan no autoemprego unha alternativa ao traballo como asalariado ou un complemento.

A actividade, realizada durante as mañás dos días 28 e 29 de agosto, forma parte do proxecto Empréga-te, posto en marcha por Cáritas. Os asistentes estaban inscritos no servizo de emprego da institución.

O primeiro día houbo testemuños de tres profesionais que crearon o seu propio posto de traballo. E o día 29 explicáronse polo miúdo as distintas fases do proxecto Empréga-te, incluíndo un taller de redacción de distintas ideas de negocio.

Cáritas organiza o XIX Campamento Urbano

Cáritas Lugo

Entre os días 15 e 26 de xullo Cáritas organiza o XIX Campamento Urbano para nenos de 8 a 13 anos. Trátase dunha actividade en Lugo e para Lugo, co fin de coñecer a cidade a través de excursións, xogos, obradoiros, deporte, festa. A base das actividades é no Colexio María Auxiliadora e o horario: de 10 a dúas e polas tardes de catro a oito.

Cáritas presenta os actos con motivo do Día da Caridade

Cáritas Lugo

O 21 de maio presentouse no local de Cáritas Diocesana de Lugo na avenida das Américas a serie de actos que se organizan con motivo de celebrarse proximamente o Día da Caridade:

Mércores 29 de maio

– Ás 20:00 PREGÓN DA CARIDADE no Salón Rexio do Círculo das Artes a cargo do Cardenal D. Carlos Amigo.

Xoves 30 de maio

– Dende as 10:30 da mañá ata as 13:30 do mediodía, haberá en Lugo, mesas para recoller donativos, atendidas por persoas voluntarias.

– Ás 18:00 Entrega de diplomas aos nenos e nenas dos colexios de Lugo por parte de D. Alfonso Carrasco Rouco, Bispo de Lugo, no Salón de Actos da Fundación Caixa Galicia.

– Ás 19:00 Actividades para os nenas/as na Praza de Santa María, organizadas polo Servizo de Infancia e Xuventude de Cáritas Diocesana de Lugo.

Domingo 2 de xuño

– Toda a mañá haberá en Monforte, Melide e Lalín mesas para recoller donativos, atendidas por persoas voluntarias.

– Colectas nas misas de toda a Igrexa Diocesana.

Na foto: Mónica Yáñez, Ginés Plaza e Antón Negro

Cáritas Lugo asina un convenio coa Axencia Tributaria

O Delegado da Axencia Tributaria, José María Núñez Pérez, e o Director de Cáritas diocesana de Lugo, Ginés Plaza Fernández, asinaron o 6 de maio un convenio de colaboración que facilita a presentación das declaracións da renda ás persoas atendidas por Cáritas. Segundo o Delegado da Axencia Tributaria, é algo que se fai con máis institucións e organismos. Aínda que en Galicia é a primeira vez que se asina un convenio destas características. Dixo ademais José María Núñez que “Cáritas é exemplar na súa prestación, non só de bens senón tamén de servizos. E todo o mundo necesita unha declaración da renda, aínda que sexa para xustificar que se teñen rendas escasas”.

Pola súa parte, o Director de Cáritas explicou que se usará a vía telemática, evitando así demoras.

A %d blogueros les gusta esto: