Mans Unidas

Esta semana teñen lugar os actos da Campaña Contra a Fame que organiza Mans Unidas. Aínda que xa comezaron o luns da semana pasada cunha conferencia do capitán da Garda Civil Miguel Angel Iglesias, que falou sobre a muller e os dereitos humanos.

A misioneira Rosario Martínez está dando o seu testemuño por distintos puntos da Diocese. Por exemplo, o xoves 7 de febreiro pola mañá estará no Colexio da Fonsagrada e pola tarde na Parroquia, primeiro cos nenos da catequese e despois na Eucaristía. No arciprestado da Fonsagrada hai un grupo formado por voluntarias de Mans Unidas que desenvolve actividades de sensibilización ao longo de ano, especialmente no Colexio, onde sempre teñen moi boa acollida as súas propostas.

Na cidade de Lugo o venres terá lugar a tradicional «cea da fame». Os actos serán no Seminario Diocesano e comezarán ás 5 da tarde coa presentación da campaña e o testemuño da misioneira, despois a celebración da Eucaristía e, por último, o café solidario. O donativo que se pide é de 5 €.

Desde Mans Unidas chámasenos á solidariedade para financiar os dous proxectos que van realizar no Terceiro Mundo. A colecta do próximo domingo será destinará a este fin. Pero ademais de diñeiro, Mans Unidas tamén necesita máis voluntariado como un reforzo para apoiar e organizar novas actividades. As portas están abertas para todo o mundo. Ás veces, só cunha pequena presenza ou a simple axuda para a distribución de materiais xa se fai un gran labor.

[Materiais da Campaña 2019]

Miguel Ángel Álvarez

Imaxe: cathopic

Con motivo dos 60 anos de Mans Unidas e a próxima campaña contra a fame, a Delegación de Lugo organizou no Salón de actos do vicerreitorado (Lugo) o luns 28 unha conferencia do Capitán da Garda Civil Miguel Ángel Iglesias Blanco sobre Dereitos humanos e a muller no século XXI, facendo unha enumeración de dereitos vulnerados.

Comezou sinalando que a Garda Civil formárao para ser garante dos dereitos humanos. E ao longo da súa intervención recalcou a necesidade de ter uns sólidos valores, pois iso significa non só ser un bo garda civil, senón un bo cidadán e unha boa persoa. Debido ao poder coercitivo que teñen as forzas de seguridade, aos seus membros esíxelles máis á hora de apoiar os dereitos humanos da poboación á que serven.

Como oficial enfermeiro da Garda Civil, Miguel Ángel Iglesias, estivo embarcado no buque oceánico Río Segura, que rescata migrantes no Mediterráneo. Interveu en dous grandes rescates: primeiro foi de 515 persoas e prolongouse durante máis de nove horas. O segundo, de 625 migrantes, durante preto de dez horas. A partir desta misión realizou unha investigación (‘Análise de máis de 1.400 intervencións de enfermaría en FRONTEX: Visión Policial vs. Humanitaria’) coa idea de dar a coñecer a situación e mellorala.

O 3 de decembro Mans Unidas Lugo inicia o Recanto de Nadal na praza de Ángel Fernández Gómez (detrás do Concello). Trátase dun espazo no que ata o día 13 se venderán obxectos para uso propio ou regalar, co seguinte horario: de 11 a 13:30 h e de 17 a 20 h. O recadado neste mercado solidario destínase aos dous proxectos que neste ano 2018 está apoiando a Delegación de Lugo:

BRASIL Consolidación da agricultura familiar do distrito do alto Capim

Beneficiarios directos: 103 familias

Á fronte do proxecto: Felipe Bannitz, Instituto de Socioeconomía.

Importe: 61.781 €

HONDURAS Defensa de dereitos de mulleres e nenas vítimas de violencia

Beneficiarios directos: 7882 persoas

Á fronte do proxecto: D. Carlos Guillermo Paz Guevara. Cáritas San Pedro de Sula

Importe: 75.459 €