Belén electrónico na igrexa de San Martiño de Folgosa (O Corgo)

Desde fai dous anos por Nadal funciona un belén electrónico na igrexa de San Martiño de Folgosa (O Corgo).

Este ano poñerase a funcionar pola festa da Inmaculada e poderá verse todos os domingos e días festivos ao finalizar a Misa das 11 ou se algún grupo quéreo visitar poñéndose en contacto con Alfonso (teléfono 674 552 302).

Meditación de Nadal en tempos de tribulación

Nestas datas tan entrañables non é habitual retirarse en silencio para a práctica da meditación. Orar, pensar e meditar cústanos máis aínda no medio das présas, do bulicio e do consumo que estes días nos envolven. No entanto quero ofrecer algunhas reflexións que poidan axudarnos a recuperar as orixes do Nadal.
Aínda conservamos na liturxia, a Vixilia de medianoite (popularmente coñecida como Misa do Galo ou dos pastores) para celebrar en actitude de espera orante o nacemento de Xesús. Para os cristiáns e unha gran maioría de cidadáns no mundo, pola influencia que a milenaria cultura cristiá na sociedade, o mes de decembro vístese de festa polo Nadal, é dicir, polo misterio da Encarnación do Fillo de Deus na historia da humanidade. Acontecemento único que marcou a historia. Acontecemento real, verdadeiro e salvífico. Un feito histórico esperado no Xudaísmo e anunciado polos profetas en expectativa mesiánica. El é o Deus grande que se fai pequeno pola súa propia vontade e por exceso de amor. O ‘descoñecido’ que quere darse a coñecer, a Palabra que quere dicirse e deixarse amar polos sinxelos e humildes no corazón do mundo. É “a Palabra de vida que vén para acender os corazóns apagados” e para espertar do sono aos durmidos e desesperanzados.
“E fíxose home”: ante este artigo do Credo, poñémonos de xeonllos cando recitamos a Confesión de fe. É o artigo da humanización e encarnación do noso Deus, o central do Credo cristián en relación co Misterio da Trinidade. O pensamento dos teólogos de todos os séculos vira en torno a el e, a piedade do medievo e da temprana modernidade, a oración meditativa da que derivou a pintura e a pulcra beleza da relixiosidade cristiá, concentrábanse nas etapas da infancia de Xesús para sentir nelas o inconmensurable que confesamos cando dicimos: “Descendit de caelis”. É dicir, Xesús fíxose neno, xestouse no seo dunha muller da que recibiu a súa carne, o seu sangue, o seu latexo, a súa xentileza, a súa fala. Cargou co peso desa historia, viviuna e sufriuna de novo, sacándoa de todas as súas negacións e fatalidades. Por iso chama a atención o significativo lugar que Xesús asigna á infancia na condición humana: “Asegúrovos que se non cambiades e vos facedes como os nenos, non entraredes no reino dos ceos” (Mt 18,3). Na infancia realízase ata tal punto o específico do ser humano, que está perdido quen na nenez non atopou o esencial. Xesús recordaba a súa infancia como uns anos moi felices e ata se di que foi para el o valor do modo máis puro de existir humanamente. Por iso é polo que o cristianismo proclama o respecto á vida e ao neno, á familia e ao fogar, e non por cuestións románticas, nin de xuízo moral, senón e sobre todo pola centralidade do noso credo: Deus fíxose home. Así, o cristianismo é a relixión da misericordia, do corazón dun Deus próximo sempre aos miserables (cor misere), das relacións interpersonais, da proximidade aos pequenos, aos que sofren e aos que se senten espidos e fríos na súa corporeidade. É a relixión da pel sensible (sensibilidade) onde o esencial pasa pola carne, pola vida, polo sufrimento, pola compaixón. Velaquí, un gran misterio para unha permanente meditación: como é posible que Deus se faga home, sen deixar de ser Deus e sen menoscabo da realidade creatural asumida? Como é Deus e como é o home para que poidan entrar en comuñón? Este é o escándalo da encarnación. A historia orixinal e verdadeira do Nadal. Un escándalo que o mundo deberá seguir soportando en tempos de tribulación, de laicismos hipertrofiados e neopaganismos cutres. Feliz meditación de Nadal.

J. Mario Vázquez Carballo. Vicario Xeral da Diocese.

Actos solidarios e musicais en parroquias da Diocese

Recollida de xoguetes en San Clodio, Quiroga. Ata o día 21 de decembro as parroquias de Quiroga e San Clodio recollen xoguetes novos ou usados en bo estado coa finalidade de distribuílos despois a través da Cáritas interparroquial de San Clodio-Quiroga.

Confraría Nosa Señora do Pedregal (Meira) Continúan o día 13 co taller de manualidades iniciado o domingo anterior. Confeccionan un boneco solidario que se poderá comprar o domingo 20 de decembro (feira) no posto da confraría. Coa súa compra, a un prezo asequible, axúdase a xente necesitada.

Cáritas interparroquial de Silleda organiza os días 19 e 20 diante da igrexa un mercado de pasteis, licores, conservas e outros produtos artesanais.

Parroquia de San Francisco Xavier, Lugo: festival o sábado 12 ás 17 na igrexa. Sortéase unha cesta de Nadal e o recadado será a prol de Cáritas parroquial.

Cáritas parroquial de Santiago A Nova (Lugo) organiza unha recollida de alimentos os días 11 e 12 deste mes.

O día 13 ás 20.30h terá lugar en Santiago A Nova o Concerto de Nadal, que contará coas actuacións de Cantar Delas e o Coro parroquial de voces brancas.

Na igrexa de S. Froilán, Lugo, o 12 de decembro ás 20,30 h. actúan a Coral Ecos do Miño Astelu (Misa) e Orfeón Xoán Montes (Concerto). 

Na igrexa de igrexa de S. Lourenzo de Albeiros o 13 de decembro, ás 12,45 h. Coral Cantar Delas (Misa) e Conxunto Vocal Lugh, (Concerto). Tanto nesta actuación como na anterior recóllense alimentos para ser distribuídos por Cáritas

Campaña de Nadal na parroquia A Milagrosa (Lugo)

As actividades máis reseñables da campaña 2015-2016 son:

– Cea benéfica o venres 11 de decembro ás 20:30 horas no salón parroquial. Antes celébrase a Santa Misa ás 19:30 horas. O donativo que se pide son 10 euros. Aprovéitase esta ocasión para invitar a persoas que atravesan momentos complicados e difíciles, a participar desta comunidade.

– Entrega extraordinaria de alimentos en Nadal. Repártese unha bolsa de alimentos o día 23 de decembro para a celebración do Nadal, que se suma á entrega de alimentos que se fai todos os xoves do ano. A parroquia só recolle alimentos no templo, isto é, non ten puntos de recollida fóra do mencionado.

-Entrega de xoguetes o día 5 de xaneiro pola mañá. Recóllense na parroquia a partir do 23 de decembro.

-Programa Apadriña a unha familia. Búscanse padriños e madriñas que se involucren en crear oportunidades e apoiar familias necesitadas -tanto económica como socialmente- cun compromiso de axuda material e de acompañamento durante un periodo de tempo.

Preparación do Nadal cos nenos na Parroquia de San Antonio, Lugo

As sesións de catecismo do xoves, venres, sábado e domingo (10, 11, 12 e 13 decembro respectivamente) na Parroquia de San Antonio de Padua substitúense por unha celebración conxunta que será o venres día 11 de 17.00 a 19.00 horas.

O grupo Scout Tesela e o equipo de catequistas organizan unha actividade estruturada en diversos puntos distribuídos polas instalacións parroquiais, cada un enfocado a unha tecnoloxía ou propósito diferente. Así os asistentes poderán percorrer todos os postos sen unha orde concreta, tanto se queren ver todos os puntos coma se non, dedicar máis ou menos tempo a un ou outro.

MAXI-TOUCHPAD: Coma se fose unha pantalla táctil xigante, os participantes poderán pintar ou estampar a súa firma, mensaxe… nun mural que logo decorará durante as festas unha parede da parroquia.

POMBA VIRTUAL: Constará dun ordenador con conexión a internet cunha conta de correo creada específicamente, onde poderán escribir un e-mail de felicitación navideña e envialo ao enderezo desexado.

PHOTOCALL: Un espazo ben iluminado e cunha parede de fondo onde cos accesorios fabricados polos nenos do Grupo Scout Tesela faranse fotos divertidas e orixinais para facer postais personalizadas ou para envialas a través de internet.

VIDEOCALL: Para o video posterior aquí recompílanse vídeos persoais, individuais ou grupais onde a xente poida transmitir a súa mensaxe navideña dun xeito divertido e diferente.

CHOCOLATE@CHURROS.COM: Unha mesa onde conseguir un chocolate quente con churros e outros doces e compartir un momento de distensión e charla.

CONFESIONARIO DE ORIENTE: Webcam onde se gravará un video persoal coa carta aos Reis Magos (para que se poidan enviar aos pais correspondentes) ou os teus desexos para estes Nadal.

REPORTEIRO EN LIÑA: Cunha cámara e un micrófono irá gravando, entrevistando á xente e animando o ambiente en xeral.

CLAUSURA E LIPDUB: O encontro finalizará cun pequeno acto na igrexa, onde se verá un pequeno vídeo onde participan distintos grupos da parroquia desexando feliz Nadal a todos os asistentes. Haberá unha sinxela coreografía facendo o reporteiro on-line gravacións previas que fagan o efecto dun gran lipdub.

Esta actividade diríxese a todas as familias da parroquia.

A %d blogueros les gusta esto: