Preparación do Nadal cos nenos na Parroquia de San Antonio, Lugo

As sesións de catecismo do xoves, venres, sábado e domingo (10, 11, 12 e 13 decembro respectivamente) na Parroquia de San Antonio de Padua substitúense por unha celebración conxunta que será o venres día 11 de 17.00 a 19.00 horas.

O grupo Scout Tesela e o equipo de catequistas organizan unha actividade estruturada en diversos puntos distribuídos polas instalacións parroquiais, cada un enfocado a unha tecnoloxía ou propósito diferente. Así os asistentes poderán percorrer todos os postos sen unha orde concreta, tanto se queren ver todos os puntos coma se non, dedicar máis ou menos tempo a un ou outro.

MAXI-TOUCHPAD: Coma se fose unha pantalla táctil xigante, os participantes poderán pintar ou estampar a súa firma, mensaxe… nun mural que logo decorará durante as festas unha parede da parroquia.

POMBA VIRTUAL: Constará dun ordenador con conexión a internet cunha conta de correo creada específicamente, onde poderán escribir un e-mail de felicitación navideña e envialo ao enderezo desexado.

PHOTOCALL: Un espazo ben iluminado e cunha parede de fondo onde cos accesorios fabricados polos nenos do Grupo Scout Tesela faranse fotos divertidas e orixinais para facer postais personalizadas ou para envialas a través de internet.

VIDEOCALL: Para o video posterior aquí recompílanse vídeos persoais, individuais ou grupais onde a xente poida transmitir a súa mensaxe navideña dun xeito divertido e diferente.

CHOCOLATE@CHURROS.COM: Unha mesa onde conseguir un chocolate quente con churros e outros doces e compartir un momento de distensión e charla.

CONFESIONARIO DE ORIENTE: Webcam onde se gravará un video persoal coa carta aos Reis Magos (para que se poidan enviar aos pais correspondentes) ou os teus desexos para estes Nadal.

REPORTEIRO EN LIÑA: Cunha cámara e un micrófono irá gravando, entrevistando á xente e animando o ambiente en xeral.

CLAUSURA E LIPDUB: O encontro finalizará cun pequeno acto na igrexa, onde se verá un pequeno vídeo onde participan distintos grupos da parroquia desexando feliz Nadal a todos os asistentes. Haberá unha sinxela coreografía facendo o reporteiro on-line gravacións previas que fagan o efecto dun gran lipdub.

Esta actividade diríxese a todas as familias da parroquia.

Nadal, espiritualidade e silencio

 Xa está ás portas o Nadal. Como sucede cos grandes acontecementos históricos, non é doadopermanecer indiferente ante el. Aínda aos máis indiferentes ante o feito relixioso, resultaralles hoxe difícil illarse socialmente, do feito histórico en si. Porque o feito en si, máis aló das orixes das nosas celebracións, é que para o cristianismo, Xesús de Nazaret é o Fillo de Deus. Un Deus que se fixo realmente carne débil, fráxil e vulnerable como a nosa, solidario en todo connosco, menos no pecado. Esta é a realidade do misterio da Encarnación. Esta é o verdadeiro Nadal. Un Deus que deixando de ser inaccesible, pechado no seu Misterio, deuse a coñecer e ensinounos o seu rostro.
Por todo iso os cristiáns celebramos este acontecemento con alegría e gozo. Pero, como cidadáns, non somos alleos ás tentacións típicas do ser humano: o ruído, o consumo desmedido, a perversión do Misterio orixinal, a esaxeración da exterioridade como expresión da ausencia de interioridade na nosa existencia; ou ata a consideración de Deus como un estorbo para a nosa felicidade, etc. Por iso é bo preguntarse: como recuperar a novidade única e irrepetible do Nadal?
O Papa Francisco regalábanos para este Nadal unhas pautas, que fago miñas, e que nos poden axudar para recuperar o Nadal máis orixinal e auténtico. Partindo de que soe ser unha festa ruidosa, invítanos ao silencio para escoitar a voz do Amor Primeiro. E a continuación recorda o que é e debe ser o Nadal: «Nadal es ti cando decides nacer de novo cada día e deixas entrar a Deus na túa alma; o piñeiro do Nadal es ti cando resistes vigoroso aos ventos e dificultades da vida; os adornos do Nadal es ti cando adornas a túa vida coas cores das virtudes; as campás de Nadal es ti cando chamas, congregas e contribúes á unidade e á comuñón».
Resumindo, ti es luz de Nadal cando iluminas coa túa vida o camiño dos demais coa paciencia, a bondade, a alegría e a xenerosidade. Cando cantas ao mundo unha mensaxe de paz, de xustiza e de amor, ti convérteste nun anxo de Nadal; cando conduces a alguén polo camiño da reconciliación fraterna ou ao encontro con Deus, es estrela de Nadal. Ti e eu podemos ser harmonía, música, amizade, fraternidade, felicitación escrita nas mans cheas de obras boas; ti e eu podemos ser mesa de Nadal cando compartimos, cando acollemos nos nosos corazóns e nas nosas vidas, sen ruídos nin grandes celebracións, ao pobre e ao necesitado.
Finalmente, cando, no silencio da noite, acollemos na nosa existencia ao Deus que se nos regala, é e pode ser Nadal para todas as xentes de boa vontade.
A nosa felicitación e os nosos mellores desexos para todos.

Mario Vázquez Carballo

Actos de Nadal en parroquias da Diocese

Na praza da Igrexa, en Silleda, os días os días 19, 20 e 21 instálase unha carpa onde se poderán adquirir doces, licores, mel e produtos artesanais.

En Lugo é o Grupo de Maiores da parroquia de Santiago A Nova organiza a Campaña “Doce Nadal”. Na Sancristía vella da igrexa, haberá repostería, produtos ecolóxicos, donativos, etc. co fin de que no próximo Nadal os irmáns máis necesitados teñan na súa mesa o reflexo e a calor da solidariedade dos seus veciños. Recollida de artigos, exposición e venda os días 19, 20 e 21 de 10 a 14 e de 16 a 21:30 h

Na parroquia San Antonio de Padua (Lugo) o grupo Vida Ascendente organiza os días 20 e 21 “Doce Nadal”. Exposición e venda de postres caseiros feitos por fregueses.

Pregón de Nadal na parroquia de San Clodio de Ribas de Sil o sábado día 20 ás 18h. Pregoeiro: Jesús Manuel Santiago, Delegado de Misións.

En Meira, os obxetos elaborados nos obradoiros de artesanía que organizou a Confraría Nosa Señora do Pedregal os dous últimos domingos, xunto con moitos máis artículos, poñeranse a venda o día 21 na Feira de Meira. O que se recaude destinarase a Cáritas parroquial

Na igrexa de Santa María da Ermida (Quiroga) actúa o día 21 de decembro ás 17:30h a Schola Gregoriana Lucensis.  

Miguel Ángel Álvarez: Deixemos que Deus actúe en nós

Practicamente estamos xa no Nadal. Comercialmente xa hai moitos días que comezou. As rúas están cheas de persoas e de luces, que nos animan a entrar nas tendas, e a comprar máis do que tiñamos pensado.

Pero, no medio de todo isto, a nós interésanos non esquecernos do sentido propio que deu orixe ás celebracións dos próximos días.

E para isto, tamén nos pode axudar a encíclica Lumen Fidei, concretamente o número 35: A confesión cristiá de Xesús como único salvador, sostén que toda a luz de Deus concentrouse nel, na súa «vida luminosa», na que se desvela a orixe e a consumación da historia (LF 35).

Hai outra luz, que non é artificial, que é luz en esencia. Hai outra persoa, que é o único Salvador, Xesucristo, un Deus que é luz de verdade, luz que ilumina a orixe e o destino da humanidade e do mundo. Un Deus que nos crea e que se fai home para salvarnos, para que nós participemos da súa mesma divindade. Un Deus que nace neno, que se fai pequeno, para que os que somos pequenos de verdade, sexamos un día grandes, pola súa infinita misericordia.

Neste Nadal deixémonos iluminar por Xesucristo. Non nos poñamos á sombra do noso egoísmo e autosuficiencia. Deixemos que Deus actúe en nós.

Bo nadal. Vémonos no 2014.

Miguel Ángel Álvarez Pérez

A %d blogueros les gusta esto: