xuventude

 33 peregrinos saíron de Lugo o día 16 para participar na Xornada Mundial da Xuventude baixo a organización do Departamento de Xuventude da Conferencia Episcopal Española. Outros mozos van en peregrinacións organizadas por congregacións, movementos, centros educativos…

 Nos días previos aos actos centrais da Xornada Mundial da Xuventude os mozos de Lugo están por Alemaña e a República Checa coñecendo lugares emblemáticos para a vida da fe e lugares nos que se non se tiña en conta a Deus (como Auschwitz).

Do 20 ao 24 de xullo teñen lugar os Días nas Dioceses: en Poznan vivirán a experiencia de compartir a fe cos fregueses da zona. As familias que acollen, que soen ser xente maior, levan varios meses asistindo a clases de español organizadas polo Concello para atender aos acollidos procedentes de España.

A partir do día 26 únense aos dous millóns e medio ou tres millóns de mozos de todo o mundo que estarán en Cracovia xunto co Papa Francisco, para unirse máis a Cristo.

A Inmaculada Xove, de sor Isabel Guerra, símbolo da Pastoral Xuvenil de España está no colexio Mª Auxiliadora de Lugo. O delegado de Pastoral Xuvenil, José Antonio Adrio, guía algunhas das oracións da mañá que están facéndose esta semana (9-12 de maio) co alumnado. O 11 de maio pode visitarse na capela do Colexio entre as 17 e as 18h. Ese mesmo día pola noite estará na Capela Universitaria (Casa Diocesana de Exercicios).
Esta imaxe da Virxe foi encargada pola Conferencia Episcopal Española á artista Isabel Guerra para que percorra as dioceses de España, unindo en oración a miles de mozos. Comezou a súa andadura a partir do Encontro xuvenil Ávila 2015 e de Lugo irá a Tui-Vigo e logo a Málaga.

O 26 de novembro, a partir das 21 h nos locais da Delegación Diocesana de Mocidade (na Casa de Exercicios, rúa Ona de Echave), terá lugar a presentación das actividades que esta delegación dirixe aos mozos.

A este acto están invitados todos os sacerdotes da cidade, membros de movementos e delegacións diocesanas. Despois do encontro os asistentes compartirán unha paella cociñada polos mozos colaboradores da Delegación.

Con este acto, a Delegación presenta os retos e as necesidades que demanda a mocidade de hoxe e cal debe ser a resposta que lles ofrece a Igrexa lucense.

A Delegación de Mocidade supón un punto de encontro de mozos das distintas parroquias e movementos, ofrecendo ademais unha serie de actividades que os aúnen. Entre elas destacan as peregrinacións xuvenís ao Santuario de Fátima (Portugal) e ao Santuario de O Faro (Chantada); “Unha Luz na noite? (evanxelización en zonas de lecer); a Xornada Mundial da Mocidade (Cracovia 2016); e a oración na capela universitaria (os mércores a partir da 21h) na que participan asiduamente uns 35 mozos.