Lugo

Pregón de Nadal en Lugo

O 21 de decembro tivo lugar o Pregón de Nadal no salón de actos de Afundación (Lugo). O acto foi presentado por Manuel Romay López, presidente da Asociación de Belenistas de Lugo, que organizaba o evento. E o pregón deuno o notario José Manuel López Cedrón, para quen no Nadal trátase de conmemorar, de lembrar que Xesús nace en Belén por amor á humanidade, por todas as xentes de boa vontade. Tamén sinalou que ningunha outra celebración resistiría se sufrise os ataques soportados polo Nadal, que é indestrutible. E a pesar de que a vida nos apartase da vida dos nosos antergos, hai unha luceciña que non se apaga.

Despois das palabras de José Manuel López Cedrón, o público asistente puido disfrutar da interpretación de varias panxoliñas, polo Orfeón Xoán Montes, dirixido por Pablo Rico Echegaray.

Reliquias do beato José Gregorio Hernández na Catedral

O 4 de decembro, a Catedral de Lugo acolleu as reliquias de primeiro grao do beato José Gregorio Hernández. Tras unha procesión desde o pazo episcopal ata a Catedral, Mons. Alfonso Carrasco presidiu a Eucaristía solemne. Na homilía sinalou as ensinanzas principais de José Gregorio: 1) ante as dificultades da vida, confiar no cumprimento das promesas do Señor; 2) gardar memoria da historia: José Gregorio é un símbolo da historia e da memoria dos venezolanos; 3) Deus xera nos nosos corazóns, como fixo no de José Gregorio, unha fonte de vida que fai posible a caridade verdadeira, a axuda ao próximo.

A experiencia dun campaneiro

A miña experiencia como campaneiro voluntario remóntase a 1991, cando un compañeiro da Adoración Nocturna -Juan Jesús Valín- e eu subimos ao campanario da igrexa parroquial de Santiago (A Nova) durante as procesións eucarísticas de Corpus Christi e a Ofrenda do Antigo Reino de Galicia a Xesús Sacramentado. Un ou dous anos máis tarde, pasamos do campanario parroquial ao da Catedral: era a Adoración Nocturna quen se encargaba desa función e pedíanos esa colaboración aos adoradores. Pertenzo á quenda da Nosa Señora do Pilar desde 1988 e ao de San Francisco de Asís desde a súa fundación. Volteei campás con xente pertencente á Adoración Nocturna, con membros das confrarías de Semana Santa, voluntarios da Pastoral Penal e de Radio María, así como con algún amigo persoal. Nun momento determinado, a Xunta de Confrarías de Semana Santa tomou a substitución da Adoración Nocturna na función de xestionar a subida de campaneiros voluntarios á torre do campanario catedralicio.

Foron moitas as veces que subín ao campanario da Catedral -ao redor de tres décadas facéndoo- e en todas as ocasións resultou unha experiencia sumamente gratificante: pola sensación de resultar útil á diocese e pola xente excelente que me acompañou, sen regatear esforzo algún, nesa bonita tarefa.

Normalmente, sóbese en tres ocasións ao ano: Domingo de Pascua de Resurrección, para acompañar o acto do Santo Encontro, o domingo de Corpus Christi e o seguinte domingo, o da Oitava de Corpus, para contribuír á solemnidade das procesións que teñen lugar tras a correspondente celebración eucarística. Tamén o fixemos por outros motivos: xornada mundial pola paz, renuncia do Papa Benedito XVI ou declaración da Catedral de Santa María de Lugo como ben Patrimonio da Humanidade -vinculado ao Camiño Primitivo de Santiago- pola UNESCO. Lembro o funeral por frei José Gómez, un día frío e chuvioso, no que tocamos a defuntos cunha sensación tan triste como a meteoroloxía do día. Uns días despois, nun día asollado, tocabamos alegremente para recibir a D. Alfonso Carrasco como novo pastor da diocese.

Debo facer algunha referencia ao estado do campanario da Catedral. Varias das campás menores están fóra de uso, deterioradas. E o badalo da Froilana, desprendido e sen repor. No primeiro caso, a solución é complicada, pois unha campá rota non pode repararse sinxelamente, require outra solución. Ignoro se nalgún momento, co plan de restauración de catedrais, reporanse ou non as campás menores e se o sistema se automatizará, como no caso da Catedral compostelá. No segundo caso, repor o badalo da campá maior, non ten especial dificultade.

Finalizo expresando a miña gratitude á Adoración Nocturna, Xunta de Confrarías e Cabido catedralicio, que me brindaron a posibilidade de vivir unha experiencia tan fermosa. E por suposto, a toda a boa xente coa cal tiven a oportunidade de compartir esa experiencia.

José Francisco Ruiz-Giménez Tuñas

Presentado un novo número da revista Lvcensia

María Quiroga Figueroa

O 17 de novembro presentouse o número 65 da revista que publica a biblioteca do Seminario: Lvcensia. O acto, presidido por Mons. Alfonso Carrasco Rouco, estivo dirixido polo reitor David Varela Vázquez e tamén contouse coa presenza do director da publicación, Gonzalo Fraga Vázquez e do membro do consello de redacción, Óscar González Murado.

A parte central do acto correu a cargo da autora do primeiro artigo, a licenciada en Xeografía e Historia, María Quiroga Figueroa, que comezou sinalando:

“O Museo Provincial de Lugo ten unha serie de pequenas coleccións que quedan solapadas ou ensombrencidas por outras máis chamativas ou atraentes para o público  xeral. Este é o caso da pequena colección de louza dourada mudéxar e mourisca. A pesar de tratarse unicamente de 19 pezas, o seu interese radica en que nos transporta a catro séculos de historia do noso país”.

E sobre o contido do seu artigo “La colección de loza dorada española en el Museo Provincial de Lugo” indicou que tiña dúas partes:

“Por un lado analizamos o valor histórico artístico de cada unha das pezas e por outro reconstruímos a historia da propia colección: as súas orixes, a forma de ingreso no Museo”.

Mons. Alfonso Carrasco pechou o acto, e entre outras cuestións, sinalou:

“Que siga tendo lugar unha presentación significa que a vida segue, que a redacción segue traballando -algo que quero agradecer-, que o centro de vida e cultura que representa a biblioteca do Seminario segue abrindo camiño… A vida do centro educativo onde está instalada a biblioteca deu pasos, medra, o que é unha delicia para todos”.

 

Percorrido pola arquitectura funeraria da Catedral

O luns 31 de outubro ás 17h. na Catedral e no Museo Diocesano Catedralicio de Lugo realizarase durante 45 minutos a actividade denominada “O patrimonio funerario na Catedral de Lugo máis aló do sepulcro de Santa Froila”. O obxectivo é valorar o impresionante conxunto de obras de tipo funerario que se distribúen polo templo, máis aló da peza ben coñecida, sita na Capela de San Froilán, o medieval sepulcro de Santa Froila.

No Museo explicaranse a tumba romana e as lápidas funerarias medievais da vila de Rábade.

A tumba do Cabaleiro Vasco Pérez de Viveiro, no transepto, as tumbas dos García de Gayoso na Capela do Pilar ou a de Pedro da Cal e Catalina da Pena na do Ecce Homo configuran un magnífico exemplo de arquitectura funeraria dos séculos XV a XVII. A gótica xirola da Basílica tamén será centro de atención polas tumbas sitas na Capela de San Xoán ou na Capela de Santiago, poñendo énfase na Capela da Nosa Señora dos Ollos Grandes, a cal non ten ningunha sepultura no seu interior como parte do voto que os cóengos debían realizar ao entrar no Cabildo.

A Capela Maior da Catedral tamén foi secularmente lugar de enterramento destacado, sendo o lugar de eterno descanso de prelados do século XVIII como Francisco Yzquierdo Tavira, Manuel Santa María Salazar ou Lucas Bustos de la Torre. Tamén o Bo Xesús é lugar de enterramentos de bispos, sendo un caso destacado o do prelado do século XIX Santiago Rodríguez Gil.

A actividade remata na zona visitable do claustro, onde se lembrará aos ilustres cóengos que descansan no cemiterio capitular, construído no corredor sur do claustro en 1803. Sacerdotes como Francisco Vázquez Saco ou Ángel Garrote comparten espazo con outros como Alfredo Lorenzo López, insigne fundador do Museo Diocesano de Lugo.

Na actividade lembrarase a función inicial da Catedral como lugar de enterramento ao longo das súas naves, transepto ou xirola, estipulando os prezos de cada zona e localizando as tumbas de personaxes importantes para a historia de Lugo como Juan Pallares Gayoso (autor do Argos Divina) ou Tomás Ramírez de Arellano (patrocinador da fachada do Bo Xesús).

A actividade terá un custo de 2 euros, contando coa participación de persoal da Catedral e o Museo Diocesano Catedralicio de Lugo. As inscricións poden facer por teléfono no 683 166 703 ou por email na dirección: catedraldelugo@artisplendore.com.

Organizan: Artisplendore, Catedral de Lugo, Delegación de Patrimonio Histórico-Artístico e Museo Diocesano Catedralicio de Lugo.

A %d blogueros les gusta esto: