Xa está na rúa o número 43 da revista Lucensia

No salón de actos da Fundación Caixa Galicia presentouse o número 43 da revista Lucensia. José Manuel Blanco López tivo unha intervención na que falou da problemática do Courel (a falta de poboación) e os seus importantes recursos naturais (por exemplo, as aciñeiras de alta montaña, algo único no noroeste peninsular). Tamén comentou que sen parque natural non hai futuro para o Courel.

Monseñor Carrasco Rouco clausurou o acto de presentación de Lucensia dicindo que non hai futuro sen a familia, sen a comunidade, e que unha tarefa dos cristiáns é seguir construíndoas.

PRESENZA DA REVISTA NOUTROS SOPORTES

Dende hai anos os índices de Lucensia están en internet, e agora con este número estréase a edición en formato dixital: pódese adquirir xa na librería La Voz de la Verdad, nas oficinas do Bispado e na Portería do Seminario o presente número 43 en CD ó prezo dun exemplar impreso. Xa está toda a colección dixitalizada e incorporada á Biblioteca de Galicia da Cidade da Cultura (Gaiás, Santiago de Compostela). Dende a administración de Lucensia prepárase a futura distribución complementaria noutros soportes técnicos.

CONTIDOS DA REVISTA

O número 43 da revista Lucensia lévanos, xeograficamente, polo este da provincia de Lugo: O Courel (o seu progreso e a Estación Científica), As Nogais (coa explicación dos seus nomes de lugar).

E no plano histórico, vemos como a Igrexa medieval de Galicia edifica os seus templos e mansións, temos datos sobre a vida do arciprestado de Ferreira-Ferreirúa entre os séculos XVII e XIX. Tamén hai artigos sobre a reconstrución de varias pontes en Lugo (s. XVII), o Colexio de S. Jerónimo ou de Lugo da Universidade de Alcalá e a fundación dos Capeláns e Gardas do Santísimo Sacramento (antecedente da Adoración Nocturna en Lugo).

Tan variados como universais son os temas da sección COMENTARIOS:

  • medallas conmemorativas en el Bularium de Clemente XI;
  • un texto que se refire ao Mosteiro de “Flanello” en Terra de Lemos;
  • a arte na igrexa de Santiago de Zoo (Samos);
  • unha tecnoloxía pioneira con “células nai proxenitoras” en Lugo;
  • poemas espirituais ou místicos “Buscando a Dios” de Vicente Piñeiro González,
  • a devoción popular ó San Vitoiro na provincia de Lugo (s. XVII).

Hai unha nova entrega documental de José Méndez Pérez sobre libros da Catedral de Lugo no Arquivo Histórico Nacional de Madrid.

Ciclo de visitas teatralizadas á igrexa de Sta. Mª de Meira

O mércores 30 de novembro, o sábado 10 de decembro e o mércores 14 de decembro, realízanse visitas teatralizadas á igrexa de Sta. Mª de Meira. Terán unha duración de 3 horas repartidas en dúas partes da seguinte maneira:

Teatralización: de 10.30 a 12:00 e actividades: de 12:00 a 13:30 (non é necesario asistir ás dúas partes. Pódese elixir a que resulte máis interesante).

Con este ciclo dáse a coñecer a historia da vila e do Mosteiro de Sta. Mª de Meira desde a súa fundación no século XII ata a actualidade pero non relatada por un guía senón vivida e contada polos personaxes de cada época: abades, monxes, soldado francés… Estes personaxes caracterizados, escenifican nas súas intervencións todos os acontecementos salientables que aconteceron no mosteiro e na vila.

Despois de cada unha das actuacións teatrais, nas que o público pode participar, haberá unha serie de actividades e xogos medievais e tradicionais que terán lugar na Praza do Convento, e que están destinados tanto para nenos coma para maiores.

A asistencia e as actividades son gratuítas. Prégase confirmar asistencia mínimo 5 días antes da representación elixida.

Contacto: Oficina de Turismo de Meira. Pza. do Convento s/n. Meira.

Teléfono: 618.679.632
Fax: 982.330.102
e-mail: turismo@concellodemeira.com

Cáritas está levando a cabo un programa de emprego no sector de hostalaría

Dentro das actividades de Cáritas Diocesana para favorecer o acceso ao emprego está o programa “Abrindo portas”. Durante este mes de novembro quince persoas con difícil inserción laboral están recibindo formación en traballos básicos de bar, restaurante e cociña tanto a nivel teórico como práctico en distintos establecementos de hostalaría.

A Asociación de Hostalaría de Lugo imparte as ensinanzas: servizo básico de restaurante e bar, aprovisionamento de bebidas e comidas rápidas, manipulación de alimentos e prácticas en empresas.

No curso, participan desempregados, mulleres en situación vulnerable ou de exclusión, inmigrantes, xoves que sufriron fracaso escolar e persoas en paro con difícil inserción no mercado laboral. Todos os alumnos que superen a formación de maneira satisfactoria formarán parte dunha bolsa de emprego como camareiros.

Cáritas Diocesana acolle de bo grado a colaboración de empresas neste programa, posibilitando prácticas formativas, contratando a algún dos participantes no curso a ou con achegas económicas para sufragar gastos.

A Coral do Hospital, invitada a participar nun concerto na igrexa de San Pedro

O día 19 de novembro celébrase o Concerto de Outono na igrexa de San Pedro (Lugo) ás 20:30 horas. Ademais da Coral Polifónica do Hospital Xeral – Calde, participa Cantar Delas, o coro que organiza o acto. ambas as dúas agrupacións musicais están dirixidas por Fernando G. Jácome. Ao final do concerto, cantarán conxuntamente unha peza dos “Contos de Hoffmann” de Offenbach.

A %d blogueros les gusta esto: