A Ofrenda de Galicia ao Santísimo

O domingo da oitava de Corpus, a cidade de Lugo volve vestirse de gala para celebrar e renovar a Ofrenda ao Santísimo na nosa Catedral. Este ano o Delegado Rexio do Antigo Reino de Galicia foi o Alcalde do Excmo. Concello de Betanzos, e respondeulle o Arcebispo de Santiago de Compostela.

Dende o día primeiro de marzo de 1669 no que a Xunta do Reino de Galicia, en A Coruña, outorgou escritura favorable á petición do Ilmo. Cabido da Basílica lucense, coa finalidade de conseguir axudas para incrementar o alumeado no Altar Maior, onde está permanentemente exposto o Santísimo dende tempos inmemoriais, dende entón, nunca se interrumpiu tan significativa tradición. Nin as turbulencias político-sociais, económicas e incluso relixiosas, propias dos tempos de antes e de agora, foron capaces de acalar as solemnes celebracións eucarísticas coas invocacións dos oferentes e as respostas dos bispos respectivos. Tanto as invocacións como as respostas son hoxe unha fonte de riqueza histórica, literaria e espiritual. D. José Molejón, cóengo organista emérito da Catedral, contribuiu a esta rica memoria facendo a recompilación, ata o ano 2000, nun tomo editado polo Excmo. Concello de Lugo.

A conciencia da centralidade da Eucaristía e da presenza real de Cristo nas especies eucarísticas permanece clara na Diocese lucense e na nosa cidade. Cada ano celébrase con máis resplandor o Corpus. Recuperáronse, con gran participación, os tradicionais concursos de poesía e fotografía eucarística e patrimonial. Os concertos internacionais de órgano son a ledicia de moitos lucenses que enchen sempre o lugar da actuación. Os cursos de música contan cun alumnado fiel e desexoso de aprender a loar a Deus a través da cultura musical. O Centro Eucarístico Lucense, fundado cando comezou o episcopado do actual Bispo, estase a implantar con enteireza e contribuíndo a incrementar o estudo do apaixoante mundo eucarístico e patrimonial. Como moi ben afirma o Bispo Alfonso Carrasco, nunha recente publicación bilingüe baixo o título Fe Eucarística, pax. 45, (Lugo, 1918), “o noso orgullo foi profesar aquí con firmeza este miserio da fe, ser a Diocese e a Cidade do Sacramento”.

Poetas de Lugo fixeron e fan memoria destes acontecementos relevantes. Velaquí algúns fragmentos para unha feliz memoria histórica. O Licenciado Molina, malagueño, cóengo de Mondoñedo no século XVI, citado entre os ananos ilustres de España nun poema titulado “Descripción del Reino de Galicia” escribía: “E nesta cidade tampouco non calo estar descuberto na igrexa maior o sacramento sen máis cobertor, que noutras igrexas non podo atopalo. A causa e segredo, querendo acadalo, de estar así posto tan gran sacramento, algunhas se din, mais o meu sentimento é que o mellor é decote adoralo” (Cf. Darío Xohán Cabana, Poetas de Lugo, 43, Lugo, 2007).

Valentín Lamas Carvajal, invítanos cuns versos do poema “De riola por Galicia” a volver a Lugo e visitar ao Santísimo:

“Vamos a Lugo, vamos alá,

ala que xa!

Pobo en Galicia tan relembrado,

a Xesucristo sacramentado

decote mostra na Catedral;

iste é o recordo dunha vitoria,

cantan os cregos himnos de groria,

brilan as luces no santo altar”.

José Mario Vázquez Carballo

Vicario Xeral da Diocese

Ofrenda de Galicia ao Santísimo Sacramento

A cidade de Lugo segue celebrando solemnemente o Corpus coa Oitava. Por iso a Catedral acollerá o domingo 10 de xuño ás 12h unha celebración eucarística presidida polo arcebispo de Santiago, Mons. Julián Barrio. O delegado oferente será o alcalde da cidade de Betanzos, Ramón García Vázquez.

Na parte musical, á entrada tocarase a marcha do Antigo Reino de Galicia para gaita e órgano. Acompañará a celebración o Orfeón lucense, coro oficial da Catedral, que interpretará a Misa Galega de José Castiñeira,  cantos en galego do P. Feijoo e o  “Hic Hoc Misterium”, de José Molejón. Ao final tocarase unha marcha procesional do Corpus para gaita e órgano.

Trala celebración e durante a procesión o Grupo Tradicional Os Xílgaros de Lugo dirixido por Óscar Pérez (gaiteiros) e o grupo de baile tradicional de Espazo Artistico 10, dirixido por Xabier Iglesias, interpretarán danzas en Ofrenda ao Santísimo Sacramento.

A Ofrenda do Antigo Reino de Galicia

A cidade de Lugo foi testemuña onte dunha das celebracións históricamente máis importantes que subsiste na nosa comunidade: a Ofrenda do Antigo Reino de Galicia ao Santísimo Sacramento. En 1669 facíase oficial na Coruña a axuda de 1500 ducados das sete capitais do Antigo Reino de Galicia (Lugo, A Coruña, Santiago, Ourense, Mondoñedo, Betanzos e Tui) para o alumado con candeas do Santísimo Sacramento exposto día e noite na catedral, unha ofrenda que co tempo pasou a ser simbólica pero permanecendo durante séculos a esencia deste acto: a devoción eucarística de Galicia.

Sería difícil imaxinar un acto que “vendese” mellor a nosa cidade que ese: o desfile dos alcaldes e autoridades desde esa xoia do barroco civil que é o edificio do concello, a recepción na S.I.C.B. de Lugo (xa con todos os honores un dos tesouros culturais da humanidade), a posterior procesión ao terminar a misa de pontifical, a cidade que lucía a súa mellor aparencia, sen que faltasen a música, as flores e os balcóns engalanados para honrar unha tradición que cos seus máis de tres séculos de historia forma xa parte da súa propia identidade.

É costume que numerosos fieis veñan de fóra o día da Ofrenda para render homenaxe ao Augusto Sacramento; aínda que na actualidade visitan a cidade un número considerable deles, non é comparable aos datos que sucedían fai un século cando, con motivo da Terceira Peregrinación Eucarística, chegaron a Lugo trinta mil peregrinos, mostra da importancia secular deste acto e máis concretamente da adoración ao protagonista deste día tan especial, que non é outro que o Santísimo Sacramento.

O acto central da ofrenda tivo lugar na S.I.C.B. de Lugo ás doce do mediodía, onde as autoridades renderon pleitesía a Xesús Sacramentado, nesta ocasión coa Ilma. Sra. Elena Candia López (alcaldesa de Mondoñedo) como oferente; todo iso celebrado no monumental marco da zona do cruceiro da catedral, co retablo de Cornielles de Holanda (século XVI), o coro de Francisco de Moure (século XVII) ou a propia custodia regalada en 1772 polo Arcebispo de Zaragoza Juan Sáenz de Buruaga como testemuñas de excepción da simbólica ofrenda. A misa de pontifical contou coa presenza dos cinco prelados da comunidade galega: Mons. Julián Barrio Barrio (Arquidiocese de Santiago de Compostela), Mons. Alfonso Carrasco Rouco (Diocese de Lugo), Mons. Luís Quinteiro Fiuza (Diocese de Tui-Vigo), Mons. José Leonardo Lemos Montanet (Diocese de Ourense) e Mons. Luis Angel de las Heras Berzal (Diocese Mondoñedo-Ferrol), ao que por quenda lle toca responder á oferente ao ser Mondoñedo a cidade que encabeza o acto.

A Ofrenda do Antigo Reino de Galicia ao Santísimo Sacramento pon o broche de ouro ás solemnes celebracións do Corpus Christi na Diocese de Lugo e que, desde O Cebreiro ás alfombras florais da Fonsagrada ou desde a procesión de Lalín aos actos da propia capital lucense confirman de novo que Lugo é unha referencia eucarística. Ademais, demóstrase que o orgulloso nome de “cidade do Sacramento” non é só polo privilexio da exposición permanente senón tamén pola devoción coa que esta comunidade católica vive a Eucaristía, símbolo da súa propia identidade cristiá.

Marcos Calles,

Historiador de Arte

Bispo de Mondoñedo-Ferrol, Mons. Luis Ángel de las Heras: Galicia: “Un pobo forte de xente forte na fe.”

Ás 12 da mañá do 25 de xuño comezaba na Catedral de Lugo a cerimonia da Ofrenda do Antigo Reino de Galicia ao Santísimo Sacramento, que se vén celebrando desde 1669. Este acto pon fin ás celebracións do Corpus na nosa cidade.

 

O Bispo de Mondoñedo- Ferrol. Mons. Luis Angel de las Heras, presidiu a Eucaristía na que concelebraron:

O Arcebispo de Santiago de Compostela, Mons. Julián Barrio;

O Bispo de Ourense, Mons. Leonardo Lemos Montanet;

O Bispo de Lugo, Mons. Alfonso Carrasco Rouco;

O Bispo de Tui-Vigo, Mons. Luis Quinteiro Fiuza

O Bispo auxiliar de Santiago, Mons. Jesús Fernández González;

así como membros do cabido de Lugo.

Acompañaron á delegada rexia, alcaldesa de Mondoñedo, Elena Candia, os representantes dalgunha das cidades do antigo Reino de Galicia; así como outras autoridades civís e militares.

Na presentación da Ofrenda, a alcaldesa de Mondoñedo, Elena Candia, comezou afirmando que, aínda que pasaron xa 348 anos, desde a primeira vez que se celebrou a Ofrenda, non a podemos ver como un de tantos costumes que perduran só por arraigo, senón porque somos un pobo de tradición cristiá “firme e asentado nas súas raíces, orgulloso e forte”. E, facendo súas as palabras do poeta mindoniense Álvaro Cunqueiro, expresou: “Loado sexa Deus porque me permitiu nacer, crecer e facerme home neste gran Reino que chamamos Galicia”.

Finalizou a súa Ofrenda lembrando que o “papel de políticos e representantes destacados da sociedade esíxenos servir aos demais e máis nada que aos demais, deixando de lado calquera interese persoal ou de partido”. E concretou a súa petición solicitando a axuda do Santísimo para terminar co paro; potenciar a familia; erradicar a lacra da violencia machista; os problemas de natalidade, despoboación, envellecemento e desenvolvemento da Galicia máis rural”

Na contestación á Ofrenda, o bispo de Mondoñedo-Ferrol, Mons. de las Heras comezou a súa homilía manifestando que hoxe, en Lugo, ante o Santísimo Sacramento “recoñecemos o camiño da fe que o pobo de Deus que peregrina en Galicia percorreu ao longo da historia ata os nosos días; hoxe Galicia mira ao Santísimo”.

Recollendo as palabras da Alcaldesa de Mondoñedo, Mons. de las Heras continuou a súa intervención dicindo que “estes séculos de Ofrenda son signo dun pobo de persoas boas que, mirando a Cristo, dan froitos de caridade cos seus semellantes, especialmente cos máis necesitados, creando así froitos de unidade”.

“Valoro- continuou o bispo de Mondoñedo-Ferrol- que vostede recoñeza, señora alcaldesa, que os representantes elixidos polos cidadáns para gobernar han de pensar no mellor para todos, sen excluír a ninguén. (…) Temos que esforzarnos por superar os intereses particulares, de mirada curta. Xesucristo coñece os nosos temores, acolle e alenta os nosos acertos e esforzos para mellorar e defender a vida”.

Facendo un repaso polas necesidades do pobo galego, e non esquecendo que Galicia é un pobo de emigrantes, pediu que sexamos capaces de acoller aos que veñen á nosa terra buscando un futuro: “Que sexamos mensaxeiros da paz. Cristiáns que se alegran de recibir a paz de Xesús que transforma os corazóns e anuncian o evanxeo da paz nun mundo ferido pola violencia”

Finalizada a celebración eucarística, todas as autoridades eclesiásticas e civís saíron en procesión acompañando ao Santísimo Sacramento polas rúas de Lugo. Durante o percorrido o Grupo Tradicional “Os Xílgaros de Lugo” dirixido por Óscar Pérez e o grupo de baile tradicional de “Espazo Artístico 10”, dirixido por Xabier Iglesias, interpretaron danzas en Ofrenda ao Santísimo Sacramento ao longo do percorrido da procesión.

 

[Textos das intervencións da Alcaldesa de Mondoñedo e do Bispo de Mondoñedo-Ferrol]

Ofrenda de Galicia ao Santísimo Sacramento

A Catedral lucense acolle o día 25 de xuño a partir das doce a OFRENDA DE GALICIA  AO SANTÍSIMO SACRAMENTO. Este ano correspóndelle presentar a Ofrenda á Alcaldesa de Mondoñedo, Dna. Elena Candia López. O Bispo de Mondoñedo-Ferrol, Mons. D. Luis Ángel de las Heras Berzal, responderá e será o prelado que presida a celebración. En declaracións a COPE Mons. D. Luis Ángel, dixo que “a Ofrenda significa que o Santísimo está onde ten que estar, no máis alto das nosas vidas. Cando xurdiu a Ofrenda pretendíase manter o culto ao Santísimo Sacramento e hoxe continuamos con esa tradición. Mantela co esforzo económico que tivo no comezo, pero hoxe evidentemente imos máis alá, entendendo que manter este culto é algo que nos beneficia a todos. E a Igrexa de Galicia é un referente de por onde temos que camiñar e sobre todo é un referente porque o pobo galego, en calquera dos seus recantos, é relixioso, que considera ao Señor por riba de todo: é o seu mediador, o seu avogado, o seu guía”.

A %d blogueros les gusta esto: