Xornada para profundizar no coñecemento do mosteiro de San Lourenzo de Carboeiro

O sábado 23 de setembro levouse a cabo unha actividade programada polo Museo de Pontevedra con motivo do centenario da creación do Seminario de Estudos Galegos a modo de ‘xeira’ pola comarca do Trasdeza, nesta ocasión centrada no mosteiro de San Lourenzo de Carboeiro. A xornada incluíu a visita, unha camiñada arredor do mosteiro e unha conferencia a cargo de D. Francisco Prado-Vilar, investigador distinguido da Universidade de Santiago de Compostela e do CISPAC (Centro de Investigación Interuniversitario de Paisaxes Culturais Atlánticas), centrada na historia recente da igrexa do Mosteiro, e tamén mostrando imaxes inéditas do seu estado e evolución durante o século XX.

De gran interese é a investigación que Prado Vilar está a levar sobre o roubo e desaparición dos relevos do tímpano occidental da igrexa do Mosteiro, propiedade da Diocese de Lugo dende a desamortización do século XIX, e que figuran nos fondos do Museo Marés de Barcelona. Os documentos de arquivo e a información que manexa Prado Vilar demostran o roubo no 1957 e a súa inmediata denuncia, feitos que, a criterio do investigador, ilexitiman calquera transacción posterior. Postura que comparte o Concello de Silleda, propietario das antigas dependencias monacais e a Diocese de Lugo, propietaria da igrexa do mosteiro de San Lourenzo de Carboeiro.

A xornada rematou gozando do día solleiro polas sendas arredor do Mosteiro.

Francisco Prado-Vilar

Elixir configurar a vida

Esta afirmación é de aplicación para toda persoa humana en calquera situación, pois mesmo non decidir é unha elección. As condicións libres para decidir deben ser: unha aspiración constante para ampliar os horizontes do vivir humano e unha realidade que estea na base das decisións xa tomadas.

Os migrantes e refuxiados son unha preocupación constante na Igrexa, xa que son persoas afectadas por inxustizas e sufrimentos, tamén en situación de empobrecemento. Por iso non estraña que o 24 de setembro fose a 109 Xornada Mundial dos Migrantes e Refuxiados, o que manifesta un compromiso constante con eles a prol da súa liberación e emancipación.

O lema elixido para a xornada deste ano é: “Libres para elixir se migrar ou quedarse”. Este lema pon o eixo da vida social na LIBERDADE como base fundamental do vivir humano. Esta demanda de liberdade supón unha esixencia para moitas institucións que destaco a continuación:

a) Para os gobernos dos países tanto de emigración como de inmigración, co que a ambos se lles demanda que posibiliten as condicións necesarias para que nos países respectivos haxa esa liberdade. A centralidade da liberdade leva consigo a denuncia das ditaduras que a queren impedir mesmo por lei. A algúns deses réximes hoxe se lles chama “iliberales”, cunha linguaxe politicamente neutra para que pasen máis ben desapercibidos.

b) Tamén supón esixir que na relación entre os estados desapareza todo colonialismo e imperialismo. Ese tipo de relación de dominación debe ser desterrada para pasar a unhas relacións de colaboración entre os diversos países.

c) A demanda de liberdade é un chamamento a todas as institucións internacionais para que fagan xustiza no planeta, e esta posibilite un auténtico desenvolvemento dos países en todos os lugares, así como que se garantan as condicións socioeconómicas necesarias para un exercicio real da liberdade para todas as persoas. É unha tarefa esixente dadas as realidades que vemos no noso arredor. As institucións cos seus representantes non poden dimitir desa responsabilidade compartida e inaprazable.

d) Igualmente pon de manifesto o necesario compromiso que toda persoa de boa vontade e todos os cidadáns temos para traballar a favor da liberdade de todas as persoas da humanidade. Isto esixe que promovamos o ben común mundial.

A mensaxe do papa Francisco deste ano 2023 chámanos a comprometernos contra as causas das migracións forzadas ao dicir: “Entre as causas máis visibles das migracións forzadas contemporáneas atópanse as persecucións, as guerras, os fenómenos atmosféricos e a miseria. Os emigrantes escapan debido á pobreza, ao medo, á desesperación. Para eliminar estas causas e acabar finalmente coas migracións forzadas é necesario o traballo común de todos, cada quen de acordo coas súas propias responsabilidades“.

É de xustiza que todos traballemos en garantir a participación equitativa de todos no ben común, no respecto aos dereitos humanos fundamentais e no acceso ao desenvolvemento humano integral. Ao migrante débeselle garantir que poida tomar a decisión con información correcta e condicións serenas. Hoxe faise necesario reivindicar o dereito a non ter que emigrar e a poder vivir na propia terra con paz e dignidade.

A poboación estranxeira en España achégase o 14 % e en Galicia supera o 4 %, aos que se poderían sumar os xa nacionalizados como españois. Viven en situación irregular administrativa uns 500.000, sendo uns 150.000 menores de idade.

Na cultura europea dende o nacemento de Xesús nun cortello e deitado nun pesebre cerca de Belén sábese que a intemperie é o lugar de Deus. A fuxida de Xesús a Exipto e a súa afirmación de que “fun migrante e acolléstesme” convérteo no inmigrante por antonomasia, e acompaña aos migrantes nas rutas migratorias, nos CIE, nas deportacións… Xesús na Cruz móstralles unha radical solidariedade.

É tarefa humanizadora para toda persoa “ser facedor de pontes de encontro” entre persoas, culturas, relixións e países, cada un ao seu nivel de responsabilidade. Niso haberá que superar os medos e o etnocentrismo sendo conscientes de que só hai unha única humanidade.

Antón Negro

Delegado Episcopal de Cáritas

Inauguración da nova sede de Cáritas de Sarria

 

O xoves 21 de setembro tivo lugar a inauguración e bendición da nova sede de Caritas Interparroquial de Sarria, acto que presidiu o Bispo de Lugo Mons. Alfonso Carrasco Rouco. E tamén interviu a directora de Cáritas Diocesana de Lugo Dª Amparo González Méndez.

A inauguración foi na Parroquia Nosa Señora do Rosario – Rúa Formigueiros 0, 3º. Esta sede consta de catro despachos nos que se ofrecerá asesoramento inicial, asesoramento xurídico, orientación para o emprego, etc. Tamén conta cunha sala de reunións e unha aula de formación.

A Igrexa e a educación (I)

Nos albores dun novo curso académico, a ninguén na provincia de Lugo lle resulta indiferente a aposta educativa que a Diocese lucense realizou nos últimos meses. Ao Colexio Diocesano San Lorenzo e Seminario Menor súmanse outros dous colexios e unha escola infantil. A preocupación da Diocese pola formación das novas xeracións é clara, pero non nova.

A Igrexa católica sempre tivo unha particular preocupación polo cultivo da ciencia e a súa transmisión. Xa nos primeiros séculos aparecen as chamadas Escolas catequéticas en Alexandría, en Cesarea e en moitos outros lugares, nas que se ensinaba gramática, filosofía e teoloxía.

Durante a Alta Idade Media un exército de monxes dedícase a custodiar nos seus mosteiros os restos dunha cultura que se desmorona debido ás invasións bárbaras. Reúnen multitude de tratados científicos e grandes obras literarias, estúdanos e cópianos para poder transmitilos a outros centros e á posteridade. Os mosteiros benedictinos foron o último baluarte da cultura naqueles séculos difíciles, caracterizados por continuas guerras. Destacan sabios como Santa Hildegarda de Bingen, abadesa benedictina e autora de eruditos tratados de medicina e botánica.

Na Plena Idade Media xorden as primeiras universidades baixo o amparo da Igrexa. Nelas cultívanse a teoloxía, a filosofía, a medicina, o dereito civil e o dereito canónico. É incontable a pléiade de doutores que iluminaron coa súa ciencia tales institucións e o mundo enteiro.

Nesta época, que poderiamos chamar cristiá, pese ao apelativo de escura e supersticiosa que algúns pretenden atribuírlle, florecen as ciencias e as artes baixo a éxida da Igrexa. No campo da literatura aparecen as grandes obras mestras de todos os tempos e lugares: o Cantar de mio Cid en España,  Chanson de Roland en Francia, Divina Comedìa de Dante en Italia, Parzival de Wolfram von Eschenbach en Alemaña. O mesmo ocorre no campo da arquitectura, como proba a beleza excepcional das catedrais góticas de Colonia, Milán, Burgos, Canterbury e París. E que dicir dos monumentos científicos? A Summa de Santo Tomé de Aquino en teoloxía; os comentarios de San Alberto Magno a Aristóteles en filosofía, as Summulae de Pedro Hispano en lóxica, o Decretum de Graciano en dereito canónico e as Partidas de Alfonso X “o Sabio” en dereito civil. No campo das ciencias experimentais destaca a egrexia figura de Roger Bacon, frade franciscano e un dos iniciadores do método científico. E non podemos esquecer aos profesores do Merton College da Universidade de Oxford, que no século XIV decidiron aplicar as matemáticas á física, sendo, pois, precursores da física moderna.

A Idade Antiga e a Idade Media son testemuñas do vivo interese da Igrexa católica pola ciencia e a educación. Veremos que as seguintes épocas tamén o son. Continuará…

Ignacio Felpeto

Sacerdote da Unidade pastoral de Castroverde

Asemblea da Adoración Nocturna e Festa da Familia Adoradora

O venres 15 de setembro Adoración Nocturna de Lugo celebra a Asemblea Anual no salón de actos do Seminario. Previamente (19 h), na Capela do Seminario celébrase unha Eucaristía e a continuación será cando se presenten á Asemblea os informes de secretaría, tesourería e presidencia. Pechará o acto o Director Espiritual Diocesano e deseguido compártese un viño español.

O día da Asemblea (o vindeiro venres) é o último para apuntarse á Festa da Familia Adoradora, que se celebrará o domingo 24 de setembro.

O Consello Diocesano da Adoración Nocturna de Lugo, reinicia a tradicional Festa da Familia Adoradora, que chega á súa edición número 15. Esta vez será na Fonsagrada, onde funciona unha nova sección adoradora promovida polo actual párroco Miguel Ángel Álvarez Pérez. O programa é o seguinte:

10 h  saída desde a praza de Bretaña

11:45 h recepción de adoradores na Plazuela da igrexa parroquial

12 h  Santa Misa

14:30 h  Comida de confraternidade

17 h  Saída cara á igrexa de Santiago de A Fontaneira, onde se celebrará o acto mariano e regrésase a Lugo.

Os interesados en asistir reservarán praza chamando ao te. 636 693 208 (Ginel). Están invitados a participar adoradores de toda a Diocese (seccións de Lugo, Sarria, Chantada, Lalín, O Corpiño, Monforte).

A %d blogueros les gusta esto: