Novo número da revista Lvcensia

A revista Lvcensia, publicación da Biblioteca do Seminario Diocesano, ofrece no número 61 temas variados, como corresponde á súa condición de miscelánea. Temática variada pero toda referente a temas ou personaxes relacionados con Lugo. Este número de Lvcensia sae puntualmente, fiel á súa cita de outono, aínda que sen a presentación oficial que soía facerse.

Con motivo do trinta aniversario da publicación, Adolfo de Abel Vilela, asiduo colaborador da revista desde os seus inicios, presenta un resumo do que foi Lvcensia estes anos. Outro artigo trata sobre a presenza de Galicia en publicacións de Madrid e Cataluña, por parte do profesor César Camoira Vega. Concepción Fernández, profesora da Universidade de Santiago de Compostela, realiza un estudo pormenorizado do Acróstico de Odoario. Aurelia Balseiro lembra a figura do primeiro director do Museo Provincial de Lugo, Luís López-Martí. Outros temas de interese son as biografías de Frei Antonio Vázquez, por parte de José M. Pascual e do Padre Manuel Carreira Vérez, astrofísico falecido este ano e con raíces en Vilalba, estudo de Carlos Viscasillas. A historia da Schola Cantorum do Seminario é abordada por José Molejón, os curas e curatos do antigo arciprestado de Luaces, por Óscar G. Murado e un estudo sobre a cultura do café, por Ángeles Miranda.

A revista Lvcensia publica o seu número 60

Lvcensia celebra os seus 30 anos de existencia cun volume con variedade de temas, como é habitual, e cunha entrañable lembranza do que foi a presentación do primeiro número de Lvcensia. Acontecemento que tivo lugar na sala de lectura da Biblioteca do Seminario no outono de 1990, como se quixo reflectir na portada do número 60 nunha pequena homenaxe aos seus fundadores. A pesar das dificultades sempre saíu adiante grazas en gran parte ao inestimable apoio da Diocese e por suposto ao interese de colaboradores, lectores e subscritores, apoios hoxe en día imprescindibles debido á ausencia de subvencións, aínda que nunca se enfrontou a unha situación como a que estamos a vivir. A pesar diso, Lvcensia cumpre co seu prazo de publicación pero non coa súa presentación para non poñer en risco a saúde dos asistentes. Queda a esperanza do reencontro con todos eles no outono.

En canto aos contidos, outro aniversario importante é o centenario do nomeamento de frei Plácido Rei Lemos como bispo de Lugo, celebrado o ano pasado, ao que se lle dedican varias páxinas neste número por parte de Gonzalo Fraga e José Ramón Figueiredo. E seguindo con aniversarios especialmente importantes para a nosa cidade, Lvcensia faise eco da primeira exposición de pintura galega celebrada no Círculo das Artes de Lugo, da man de Carlos Gegúndez.

Importante tamén é a orixe das coleccións incorporadas ao fondo do Museo de Lugo, como pon de manifesto Aurelia Balseiro presentanndo un traballo cuxo obxectivo baséase en mostrar os principais conxuntos de bens culturais, en orixe pertencentes a coleccionistas concretos, posteriormente incorporados ao museo, así como a súa forma de ingreso, integración ou adaptación entre as coleccións museísticas propias.

A figura de Carvalho Calero, autor homenaxeado este ano no día das Letras Galegas, é o centro de dous artigos presentados, un deles pola directora do Colexio Fingoi, Siña Fernández e María Casar, profesora do mesmo, onde exerceu como director, e outro por Luisa Doval que recolle o testemuño dos libros escritos e dedicados por alumnos e amigos que se achan na Biblioteca do Seminario de Lugo.

Abel Vilela, que segue investigando no Camiño Primitivo, colabora neste número falando sobre as capelas de San Pedro de Fóra, Virxe do Camiño, Casa da Concha e os hospitais da Ponte e da Porta Falsa.

Outros artigos centrados na historia de Lugo e a súa provincia, son os presentados por Ernesto Iglesias que estuda a presenza dos xudeus en Monforte; Óscar González realiza un rigoroso estudo sobre o antigo arciprestado de Luaces e Gonzalo Fraga recolle os arrendamentos do cabido catedralicio de Lugo, segundo relata “resulta curioso e instructivo o que nas actas capitulares se achega do arrendamento de administracións, rendas, tenzas, empréstimos e outros emolumentos, tanto polas disposicións adoptadas polo Cabido sobre a materia como polas oscilacións e vicisitudes a que estiveron suxeitos aqueles bens eclesiásticos”.

Presentación do número 59 da revista Lvcensia

María José López Caldeiro

Na aula magna do Seminario o venres 29 de novembro presentouse o número 59 da revista Lvcensia. Miscelánea de cultura e investigación.

No acto, presidido polo sr. Bispo D. Alfonso Carrasco Rouco, falou Mª José López Caldeiro de Santa María de Penamaior (Becerreá). Este convento tivo o seu importante papel na Vía Künig -Camiño Francés por Lugo-, pois o seu templo ten elementos propios dunha igrexa de peregrinación (vieiras, axedrezado xaqués…). Tamén tiña unha reliquia do lignum crucis e contaba cos elementos necesarios nun lugar de paso de peregrinos: hospedería para aloxalos e enfermaría para sandar o seu corpo.

Presentación do número 59 da revista Lvcensia

Na aula magna do Seminario o venres 29 de novembro ás 18:30 h preséntase o número 59 da revista Lvcensia. Miscelánea de cultura e investigación, que edita a Biblioteca do Seminario Diocesano.

O acto estará presidido polo sr. Bispo D. Alfonso Carrasco Rouco e o director da publicación, D. Gonzalo Fraga. Mª José López Caldeiro falará de Santa María de Penamaior e o seu papel nunha variante do Camiño de Santiago.

A celebración dos trescentos cincuenta anos da Ofrenda do Antigo Reino de Galicia ao Santísimo Sacramento permanentemente exposto na catedral de Lugo foi motivo de reunión de varios conferenciantes para falar deste evento. Lvcensia faise eco deste acontecemento cun artigo do Bispo diocesano alusivo aos conceptos tratados nestas conferencias.

Adolfo de Abel Vilela presenta un artigo sobre o mestre de obras Fulgencio Durán, centrándose no edificio do Pazo das Pombas. Pablo Ferrín explica os diversos usos dos chantos, acompañando o seu estudo con fotografías da parroquia de Bocamaos. Aurelia Balseiro homenaxea a un dos mecenas máis importantes do Museo, Antonio Fernández López. Miguel García-Fernández e Luis Manuel Ibáñez expoñen no apartado de “Texto” a documentación respecto ao burgo do Piñeiro, orixe da actual cidade do Cabe.

Outros artigos de interese versan sobre a Real Cédula do ano 1754 en favor do Cabido da Santa Igrexa de Lugo, documento que se conserva no Museo Provincial, sobre o órgano da catedral obra do franciscano Manuel Fernández Fernández e sobre as conclusións ás que chega Santos Ferro para a hipotética reconstrución do Priorado Santiaguista de Vilar de Donas.

Presentación do número 58 da revista Lvcensia

A Biblioteca do Seminario presentou o número 58 da revista Lvcensia o 10 de xuño na aula Magna do Seminario Diocesano. No acto, presidido polo Sr. Bispo don Alfonso Carrasco, interveu o doutor en Historia Gonzalo Francisco Fernández Suárez. Sobre o significado da Ofrenda do Reino de Galicia ao Santísimo, sinalou que é a última e máis senlleira mostra do personalismo do Reino de Galicia, sendo a súa Xunta unha especie de Parlamento rexional, órgano de interlocución entre o propio Reino e o monarca.

O 1 de marzo de 1669 fixáronse unhas condicións que se debían ter en conta con respecto ao donativo achegado polo Reino. E Gonzalo Francisco destaca dúas: 1) a Catedral lucense adquirirá unha renda fixa e suplirá unha posible merma da devandita renda; 2) durante o ofertorio no sexto domingo previo á festividade do Corpus o rexedor máis antigo do Concello de Lugo depositará en mans do señor Bispo o ofrecemento dos 1.500 ducados.

Portada e sumario do número 58 da revista Lvcensia
A %d blogueros les gusta esto: