Presentación da revista Lvcensia

A revista que publica a biblioteca do Seminario Diocesano, Lvcensia, sae á luz co número correspondente a este segundo semestre de 2023. E o xoves 16 de novembro na Aula Magna do Seminario Diocesano presentouse o novo número nun acto presidido por Mons. Alfonso Carrasco e dirixido polo reitor David Varela.

O primeiro en intervir foi o director da revista, Gonzalo Fraga, que deu a coñecer os contidos do número 67 de Lvcensia.

A continuación tomou a palabra o historiador Felipe Arias, coautor do primeiro artigo:

“A ara de Curbián é moi interesante porque presenta unha divindade prerromana, indíxena, e un dedicante, quen fai o voto, que ten uns nomes romanos. Ou sexa, é un símbolo, unha mostra moi clara e moi representativa do que supón a romanización.  Trátase dun sincretismo entre o panteón indíxena prerromano e o mundo romano. É igual que hai a ara de Curbián, dedicada ao deus Bandua Balecco, por un señor que ten nomes romanos, tamén hai aras que están dedicadas por homes de xinea indíxena, prerromana, castrexa a deidades do panteón clásico. Prodúcese ese intercambio e a ara de Curbián, vén completar moi ben ese panorama”.

A restauradora Uxía Aguiar, coautora do primeiro artigo, explicou o proceso de restauración da ara de Curbián:

“Primeiro determinouse cal era o estado real de conservación da ara toda vez que levaba tantos anos depositada en Curbián. Despois da diagnose deseñouse un tratamento específico para esta peza: retirada dos elementos que xeraban certo deterioro ou que enmascaraban as texturas, as inscricións, en definitiva, poñían en certo perigo a conservación da mesma. E trasladouse ao depósito diocesano de bens culturais que foi o espazo onde se restaurou para logo pasar ao Museo Diocesano e Catedralicio”.

Clausurou o acto Mons. Alfonso Carrasco, que sinalou o seguinte:

“Cando a identidade ten unha apertura profunda permite o encontro e o enriquecemento mutuo. E alégrome de ver que esta actitude, esta posibilidade, continúa na historia. Tambén hoxe a revista Lvcensia é un momento de encontro de xentes, de estudos diversos, de persoas que acudimos e reunímonos de novo. Esta casa segue sendo un lugar no que camiños, identidades, perspectivas culturais seguen encontrándose. Esta apertura é moi importante nos tempos que vivimos. Creo que é propio da fe cristiá ter unha apertura a todo o que é humano e poder valorar calquera cosa boa”.

Acto de presentación da revista Lvcensia

O pasado 22 de maio presentouse o número 66 da revista que publica a Biblioteca do Seminario, Lvcensia, acto presidido polo Sr. Bispo da diocese, Mons. Alfonso Carrasco e presentado polo reitor do Seminario, D. David Varela.

A primeira intervención correu a cargo do director da revista, D. Gonzalo Fraga, que presentou o novo número:

“A temática deste número abarca distintos temas de historia, arte ou patrimonio. Son temas que nos convidan a valorar a riqueza que nos legaron os nosos antepasa-dos e que disfrutamos. Para aprender a historia hai que coñecela. Por iso, ten sentido que partindo desta historia limitada e no seu ámbito xeográfico, podamos tamén contribuír a unha visión máis ampla da historia. No concepto de historia incluímos as distintas manifestacións de ciencia e da cultura nas súas diversas vertentes. Todo pasado é historia e todo pasado é unha lección para o presente”.

A continuación o graduado en Historia da arte, Adrián Flores, autor do primeiro artigo da revista, presentou o seu traballo:

“Se nos preguntásemos que icono ou imaxe representa mellor ao cristianismo, non habería dúbidas en afirmar que sería Cristo crucificado. No artigo “El crucificado jansenista del clérigo José Mª Padilla” presentamos unha destas imaxes, en especial a doada por Padilla del Águila á Catedral de Lugo no ano 1869 ao seu falecemento. Se nos paramos a mirar esta imaxe con detemento, poderemos con-amornar que as súas características o converten nunha peza especial e podémola distinguir doutros crucificados que teñamos visto. E é que as súas características o enmarcan nunha tipoloxía concreta, a dos crucificados xansenistas. A principal idea do xansenismo era a perda da graza, é dicir, que co pecado orixinal cometido por Adán e Eva no paraíso, a humanidade perdeu o privilexio de ser salvada por Deus e soamente os que actuasen coa graza eficaz, baseada nunha fe e nunha moral estrita, poderían ser salvados ao final das súas vidas”.

E pechou o acto Mons. Alfonso Carrasco Rouco, que se referiu ao feito de que haxa novos estudosos: “é unha razón para a alegría, para nós e para a cidade de Lugo”. E sobre o número de Lvcensia que se presentaba comentou que “está moi envorcado na historia e en moi boa medida nos contextos a nós máis cercanos das nosas parroquias e da nosa arte eclesiástica. A vinculación coa arte eclesiástica e coa historia eclesiástica é natural en Lvcensia, pero é natural tamén na nosa tradición. É a nosa historia real, unha historia mesturada do propio das ciencias humanas e do propio das ciencias eclesiásticas”.

Presentación do número 66 da revista Lvcensia

O luns 22 de maio, ás 18:30 terá lugar o acto de presentación do número 66 da revista Lvcensia, na aula Magna do Seminario.

O acto estará presidido polo bispo, Mons. Alfonso Carrasco Rouco, coa intervención do director da revista,  Gonzalo Fraga Vázquez e, como colaborador deste número, o autor convidado é Adrián Flores Vázquez, que falará sobre o Cristo xansenista doado polo arcediano de Dozón, José María Padilla, á Catedral en 1868.

Este Cristo é unha peza curiosa polos materiais empregados para a súa realización, así como pola tipoloxía do crucificado que segue a iconografía xansenista, deste tipo só existen dous máis no Museo da Catedral.

Atendendo á variedade que enriquece a cultura do noso ámbito local, Lvcensia aborda unha temática de ampla composición. Neste número poderá o lector aproximarse a temas que van desde a historia e arte da nosa Catedral a diversas zonas da xeografía provincial ou diocesana. Lugo, O Corgo, Silleda, Bóveda ou Antas de Ulla serán os concellos nos que se centrarán os contidos deste número. Deste último concello provén a imaxe de portada do novo número: é o cruceiro de Frádegas (Antas de Ulla), no que destaca a bóla estriada sobre a que se eleva a cruz (século XIX).

A Biblioteca do Seminario Diocesano, co apoio da Diocese, é a editora da revista comprometida co noso pasado e presente, sempre fiel aos seus principios fundacionais.

Presentado un novo número da revista Lvcensia

María Quiroga Figueroa

O 17 de novembro presentouse o número 65 da revista que publica a biblioteca do Seminario: Lvcensia. O acto, presidido por Mons. Alfonso Carrasco Rouco, estivo dirixido polo reitor David Varela Vázquez e tamén contouse coa presenza do director da publicación, Gonzalo Fraga Vázquez e do membro do consello de redacción, Óscar González Murado.

A parte central do acto correu a cargo da autora do primeiro artigo, a licenciada en Xeografía e Historia, María Quiroga Figueroa, que comezou sinalando:

“O Museo Provincial de Lugo ten unha serie de pequenas coleccións que quedan solapadas ou ensombrencidas por outras máis chamativas ou atraentes para o público  xeral. Este é o caso da pequena colección de louza dourada mudéxar e mourisca. A pesar de tratarse unicamente de 19 pezas, o seu interese radica en que nos transporta a catro séculos de historia do noso país”.

E sobre o contido do seu artigo “La colección de loza dorada española en el Museo Provincial de Lugo” indicou que tiña dúas partes:

“Por un lado analizamos o valor histórico artístico de cada unha das pezas e por outro reconstruímos a historia da propia colección: as súas orixes, a forma de ingreso no Museo”.

Mons. Alfonso Carrasco pechou o acto, e entre outras cuestións, sinalou:

“Que siga tendo lugar unha presentación significa que a vida segue, que a redacción segue traballando -algo que quero agradecer-, que o centro de vida e cultura que representa a biblioteca do Seminario segue abrindo camiño… A vida do centro educativo onde está instalada a biblioteca deu pasos, medra, o que é unha delicia para todos”.

 

Presentación dun novo número de Lvcensia

O xoves 17 de novembro ás 18:30 h. terá lugar a presentación do número 65 de Lvcensia na aula magna do Seminario. Presidirá o acto Mons. Alfonso Carrasco, intervirán o director da revista, Gonzalo Fraga; o reitor do Seminario, David Varela.

Como colaboradora invitada, a museóloga María Quiroga Figueroa presentará a colección de louza dourada mudéxar e mourisca no Museo de Lugo. Son 19 pezas (ss. XV – XVIII), procedentes por exemplo das coleccións privadas de José Villaamil e Castro, e de Santiago Rocamora Negróns, a colección deste último foi doada ao museo por José Fernández López.

Neste novo número, Alberta Lorenzo lembra o labor das Sociedades Galegas de Instrución tomando como exemplo Roupar, estudando a arquitectura escolar.

Pablo Ferrín fala dos diversos usos das campás, concretándoo nas vías de entrada a Galicia a través dos chamados Camiños Maiores.

José Antonio Ferreiro publica o testamento do bispo Frei Francisco Yzquierdo, bispo promotor da igrexa de San Bartolomé, a Porta de Santiago, a fonte de San Vicente… Documentos inéditos axudan a coñecer a historia de Lugo na Idade Moderna.

Óscar González Murado ofrécenos unha visión do antigo arciprestado de Luaces, as súas capelanías e capeláns. Aclara por que as capelanías non sempre tiñan capela.

Lois Ladra, do Proxecto CORGORAL, publica máis de 400 refráns.

Abel Vilela fai un repaso sobre a biografía de Ramón Lías Yepes, fundador da sección de Adoración Nocturna de Lugo.

Angel Utrera estuda cruceiros das 28 parroquias de Antas de Ulla.

Manuel Carriedo continúa coa segunda parte da cronoloxía dos bispos lucenses do século VIII abordando o final do bispo Odoario e a súa sucesión.

A %d blogueros les gusta esto: