A fe ensancha os horizontes da razón

O pasado domingo clausurábase o Ano da Fe. Un ano de graza que a Igrexa nos brindou para descubrir de novo o valor da fe e profundar nela.

Neste comentario semanal á encíclica Lumen Fídei chegamos ao final do capítulo segundo. Nesta serie de números achegámonos, por así dicilo, ao Deus-Creador-Enxeñeiro, que fai que todo o que vemos e somos cadre e teña sentido.

Unha primeira cita do número 34 di:

A luz do amor, propia da fe, pode iluminar os interrogantes do noso tempo en canto á verdade. (LF34)

E a segunda cita dinos:

A mirada da ciencia benefíciase asi da fe: esta convida ao científico a estar aberto á realidade, en toda a súa riqueza inesgotable. A fe esperta o sentido crítico, ao non permitir que a investigación se conforme coas súas fórmulas e axuda a decatarse de que a natureza non se reduce a elas. Convidando a marabillarse ante o misterio da creación, a fe ensancha os horizontes da razón para iluminar mellor o mundo que se presenta aos estudos da ciencia. (LF 34)

En contra do que podería pensarse nun primeiro momento, a fe non pon limites á ciencia nin á razón. Como di o Papa, a fe ensancha os horizontes da razón… case poderiamos dicir que a fe fai que a ciencia sexa ilimitada e non se esgote nunca.

A isto podemos engadir o froito solidario que obtemos da ciencia cando está acompañada pola fe, e destinámola para dignificar e facilitar a vida do home e dos pobos. Ben o sabemos, sen a fe, a ciencia vólvese tremendamente destrutiva, só temos que pensar na bomba atómica ou no aborto.

Deus ilumina todo, porque todo é obra súa, nada é alleo para El, tampouco a ciencia.

                                             Miguel Ángel Álvarez

                                            Párroco de San Froilán

Encontro pastoral ao comezo do Ano Litúrxico

O Sr. Bispo convida a participar a todos os diocesanos, sacerdotes, consagrados, laicos no encontro diocesano de inicio do Ano Litúrxico, que terá lugar en Silleda-Siador o próximo día 3 de decembro.

O encontro desenvolverase da seguinte maneira:

  • 11:00. Acollida no salón parroquial da Casa reitoral de Silleda, oración e desenvolvemento do tema: “O Ano da Fe e a encíclica Lumen Fidei” por Luciano Armas Vázquez

  • 12:30. Descanso

  • 13:00. Celebración penitencial na igrexa parroquial de Silleda

  • 14:15. Comida fraternal.

  • 17:00. Eucaristía no Santuario da Saleta en Siador.

A comida, por 15 euros, será nun restaurante de Silleda. Desde Lugo disponse un servizo de autobús, sendo o prezo do mesmo de dez euros. A saída será ás 9:30 da mañá desde a Praza de Bretaña. Cómpre apuntarse para a comida e o autobús antes do 28 de novembro. Teléfono: 982 21 42 65

Xornada interdiocesana de Pastoral Xuvenil

Xornada interdiocesana xuvenil

A Diocese de Mondoñedo – Ferrol toma o relevo a Lugo na organización este ano da Xornada Interdiocesana de pastoral Xuvenil. Será o 30 de novembro baixo o lema “Saír ás periferias existenciais dos mozos”.

Durante a xornada, destinada a axentes de pastoral, catequistas, sacerdotes, consagrados, e todos os que participan desta pastoral, haberá talleres relacionados con experiencias de anuncio e evanxelización: acollida cristiá no Camiño de Santiago, iniciativas de primeiro anuncio en parroquias urbanas, as experiencias de Ceas Alpha e un achegamento á natureza e manifestacións da nova era e novas espiritualidades presentes na sociedade. Esta última cuestión presentada por Lugo. 

Así mesmo proxectarase a película Un Deus prohibido, á que seguirá un taller sobre o cinema e a Nova Evanxelización coa presenza dos produtores da película.

Presentación dun novo número de Lucensia

Presentación Lucensia n. 47

O día 27 presentouse o número de outono da revista Lvcensia. Un dos artigos “Juan Francisco de Castro (Doctor Castro) de Lugo” foi presentado polo autor, Óscar González Murado, que insertou ao personaxe investigado nun grupo de esclesiásticos de gran valor intelectual dos que se rodeou o Bispo Armañá a finais do século XVIII. Do Doutor Castro destacou Murado dúas obras: unha (Discursos críticos sobre las leyes…) na que se fai unha madura reflexión sobre o mundo do Dereito e outra (Dios y la naturaleza) na que crea unha arquitectura discursiva sobre Deus.   

Os bispos galegos presentan o Curso de Formación en Matrimonio e Familia

Rueda de prensa obispos_0119

O Arcebispo de Santiago, Julián Barrio Barrio, o Bispo de Mondoñedo-Ferrol, Manuel Sánchez Monge, o Bispo de Lugo, Alfonso Carrasco Rouco, e o Bispo de Ourense, Leonardo Lemos Montanet, compareceron o 26 de novembro pola mañá en Santiago de Compostela para presentar oficialmente o Curso de Formación en Matrimonio e Familia (CFMF) que se iniciará en xaneiro do 2014.

Esta iniciativa conxunta, de todas as dioceses de Galicia, é un proxecto pioneiro en España. Será a primeira vez que un curso destas características se ofreza desde as igrexas diocesanas. Até o momento unha formación similar só se proporcionaba por universidades ou centros específicos.

Nas súas intervencións os prelados galegos destacaron a importancia que a institución familiar ten para a Igrexa. A preocupación polo seu benestar e a necesidade de prestarlle todo o seu apoio, levou á Igrexa galega a elaborar esta proposta concreta, que se materializa nun curso de formación, reflexión e intercambio de experiencias.

Read more

%d bloggers like this: