Convenio entre Bispado e Consellería de Cultura para impulsar o Museo Diocesano e Catedralicio

Convenio Museo 2 Na presentación aos medios do convenio, o director do Museo César Carnero falou do convenio como un agasallo adiantado do cumpreanos, pois no 2018 o Museo cumprirá 100 anos.

O conselleiro de Cultura Román Rodríguez, afirmou que é o primeiro convenio que en Galicia se asina con esta orientación e agradeceu a sensibilidade de Mons. Alfonso Carrasco neste tema. Tras catalogar os bens de natureza artística da Diocese, as pezas de maior interese trasladaránse ao Museo. Desta maneira, segundo o Conselleiro, as persoas do lugar de orixe das obras de arte, sentirán orgullo delas.

Para o Bispo de Lugo, coidar o patrimonio artístico forma parte dunha gran empresa de coidar o noso rural e a nosa tradición. O Museo Diocesano e Catedralicio representará a vida da nosa terra, e quen o visite encontrará o eco da vida das parroquias. “Non quereriamos, dixo Mons. Alfonso Carrasco, que as nosas parroquias perdesen a súa memoria e identidade”.

O investimento total desta intervención será de 332.000 euros

Convenio Museo 3

Celebración de San Tomé no Seminario

Copia de San Tomé 2

O xoves 28 de xaneiro celebrouse a Festa de San Tomé de Aquino 2016 no Seminario Diocesano, Instituto Teolóxico Lucense e Extensións de Lugo do ISCRSD e do IITD.

A Capela Maior acolleu a Eucaristía presidida polo Excmo. e Rvdmo. Sr. Bispo de Lugo, Mons. D. Alfonso Carrasco Rouco. A continuación, na Aula Magna tivo lugar o acto académico no Ano Xubilar da Misericordia, consistente nunha conferencia titulada “La naturaleza del perdón divino” de D. Adolfo Rodríguez Iglesias, sacerdote diocesano de Astorga, Profesor de Teoloxía e Director-Delegado do ISCRSD de Astorga.

Os actos están abertos ao público en xeral.

Cadea de Oración pola Vida Consagrada

O día 27 de xaneiro terá lugar un novo encontro con motivo da Cadea de Oración pola Vida Consagrada. Nesta ocasión será na capela do Mosteiro da Inmaculada (praza de Santo Domingo, Lugo), coas Agustinas Recoletas.
Horario: 17:30 Rosario
18:00 Eucaristía e a continuación vésperas

O acto enmárcase na celebración do Ano da Vida Consagrada, que será clausurado o 2 de febreiro de 2016, na Xornada Mundial da Vida Consagrada

Do pergameo á era dixital

Arquivo

Todas as institucións van xerando documentación ao longo da súa historia. En orixe, esta documentación ten un valor xurídico que se vai perdendo co tempo para adquirir outro valor, o histórico. Son as pegadas do paso da institución pola historia as que nos evitan caer no alzhéimer e poder mirar cara atrás sen nostalxia para ver o treito do camiño feito en común. E así lle pasa, con máis razón, a unha institución bimilenaria como a Igrexa. E a Igrexa local ou diocesana tampouco é allea a estas circunstancias.

Dita documentación, xurídica ou histórica, sempre se conservou como ouro en pano, baste pensar nos papeis vellos que cada un de nós deposita nas súas casas. Ao mesmo tempo, os propios papeis constitúen un arquivo particular e determinado e, por extensión, o lugar onde se conservan -a arca- constitúe o arquivo, adquirindo así unha identidade propia. O paso dos anos fai que se incremente o volume da documentación conservada e, tamén, que se vexa afectada polos factores medio-ambientais. Por iso cómpre tomar as medidas necesarias para conservar os documentos e, en segundo lugar, difundilos.

Deste carácter introspectivo, de coñecer a propia identidade e de responder a preguntas, nace a disposición ao público da documentación para o seu estudo. Canto máis se facilite o seu acceso e o estudo, máis se progresará no coñecemento das propias institucións. Pero o uso da documentación tamén contribúe ao seu propio deterioro e destrución. Deste xeito, neste momento, temos outros medios e outros soportes para facilitar que se acceda á información sen necesidade de tocar os orixinais. Estamos falando dos medios dixitais que nos permiten consultar documentos en liña coma se tivésemos os orixinais entre as mans.

No caso da Igrexa de Lugo temos dous grandes arquivos: o Arquivo Diocesano, estrictamente xerado pola institución diocesana, polo Bispo e a súa Curia; e o Arquivo Central parroquial, que naceu para albergar os arquivos parroquiais nos anos 70 do século XX. A dixitalización -que non é máis que ofrecer a mesma información noutro soporte- dos libros que estamos levando a cabo afecta aos arquivos parroquiais. Neses arquivos consérvase a documentación referida á vida parroquial: desde os rexistros sacramentais (bautismos, confirmacións, matrimonios, defuncións) ata os libros de contas das parroquias ou os libros das confrarías existentes en cada unidade parroquial e abrangue, grosso modo, a documentación xerada desde finais do século XVI ata a actualidade, aínda que a correspondente aos últimos cen anos non está a disposición dos usuarios por motivos de privacidade e protección de datos. Nesta sección están os libros que conteñen os datos para reconstruír ou refacer historias familiares, aínda que non é toda a documentación e por iso é necesario recorrer a outras fontes arquivísticas. Dedúcese, xa que logo, que a orde do arquivo non é a orde que cadaquén queira darlle, senón que o arquivo ten vida propia, e os seus coidadores deben ser os que a descubrirán e os que han de saber guiar.

A Igrexa non ten medo á investigación e ao desenvolvemento da ciencia histórica e quere achegar a súa vida e a súa historia aos homes de boa vontade usando os medios que ten á súa disposición, tamén na era dixital.

Óscar González Murado

Director do Arquivo Diocesano

Jaume Vives fala sobre a persecución a cristiáns en Iraq

Jaume Vives Vives

O xornalista Jaume Vives é autor de varios libros, entre eles El horror del Estado Islámico: Cristianos sirios e iraquíes refugiados en Líbano. Recentemente viaxou a Iraq para gravar un documental, Guardianes de la fe sobre a persecución que sofren os cristiáns neste país.

Desde o luns 25 ao xoves 28, está percorrendo os colexios da Diocese para falar co alumnado sobre estes temas e dar o seu testemuño, ademais de ter outras charlas abertas ao público en xeral:

Luns, día 25, ás 20.30 h no salón do Museo Municipal de Lalín.

Martes, día 26, ás 18.30 h na parroquia de San Froilán. E ás 20.30 no salón de actos do Seminario diocesano.

Mércores, día 27, ás 21 h nos locais da Delegación da Mocidade (Casa diocesana de Exercicios)

O xoves, día 28, Día da Paz. Ás 12h, na praza de Santa María concentraranse os alumnos dos colexios relixiosos e Jaume Vives diríxese a eles uns minutos para a continuación camiñar ata a porta da Misericordia da Catedral e ter un intre de oración no interior.

A %d blogueros les gusta esto: