Novo equipo directivo de Mans Unidas Lugo

Este ano hai un relevo no equipo directivo da Delegación de Mans Unidas en Lugo. O anterior equipo directivo, formado por Laura Campoy (Delegada), Pilar Cadahía (Vicedelegada), María Jesús Fernández (Tesoureira), Berta López (Secretaria) e Miguel Vázquez (Consiliario), fixo posible proxectos de desenvolvemento grazas á súa gran talla humana, dedicación, esforzo e co apoio dos voluntarios. O novo equipo confórmano Josefina Varela (Delegada), Pilar Cadahía (Vicedelegada), Marina Otero (Tesoureira) e Ana Castro (Secretaria) e Miguel Ángel Álvarez (Consiliario), que seguirá fortalecendo a dimensión social da fe.

O luns  12 de novembro hai unha xornada de estudo a cargo formadores de Mans Unidas España. E durante o ano 2019 haberá sesións de formación para os voluntarios da organización e para calquera persoa interesada nas cuestións a tratar: os documentos Sacramentum caritatis e Caritas in veritate de Benedito XVI. As reunións deste grupo de reflexión-formación, que dirixirá Miguel Ángel Álvarez serán no local de Mans Unidas (rúa da Cruz, 3, Lugo) ás cinco da tarde o 21 de xaneiro, o 18 de febreiro, o 11 de marzo, o 8 de abril, o 13 de maio e o 17 de xuño.

Carta do Sr. Bispo con motivo do Día da Igrexa Diocesana

Queridos irmáns: celebramos un ano máis o Día da Igrexa Diocesana. O lema escollido [Somos unha gran familia] convídanos a dirixir a mirada aos lugares e ás persoas concretas coas que vivimos a nosa fe. En efecto, do mesmo xeito que ninguén existimos sen as nosas circunstancias, sen enraizamento e vinculación a unha familia concreta, así tampouco existimos como fillos de Deus sen unhas persoas e unha historia particular.

Non seriamos cristiáns sen ser bautizados un día, rodeados dos nosos seres queridos e co noso párroco; nin viviriamos como tales sen participar concretamente nos sacramentos e sen a compañía cotiá de moitos fieis ao noso carón.

Se a Igrexa non fose accesible a nós nun lugar, en comunidades e parroquias, o noso ser cristián sería abstracto. Pero, por providencia divina, a «familia eclesial» faise presente para cada un na súa Igrexa diocesana, na que recibe e pon en práctica a fe e o amor verdadeiros, que son universais, pero tamén moi concretos, como experimenta o cristián nas súas relacións máis cotiás: amamos ao próximo cunha «caridade» que vén de Deus mesmo; pero sen este amor concreto ao próximo que vemos e tocamos, non podemos falar do amor de Deus, a quen non vemos (1 Xn 4, 20).

Así pois, pertencendo a unha parroquia e a unha diocese determinada estamos na Igrexa católica, estendida por toda a terra. Pero, sen a nosa familia eclesial concre-ta, afastámonos da gran unidade da Igrexa universal e debilítase a vivencia da fe.

Non desprecemos nunca a nosa historia particular, a nosa parroquia, a nosa diocese. Nela e por medio dela ofrécensenos os valores e a sabedoría maiores, o amor máis verdadeiro e a vida sen límites. Porque o máis grande de todos, o Deus eterno, quixo demostrar o seu poder facéndose igual a nós, habitando entre nós, para salvar e encher de ben e de vida aos que somos pequenos, e temos mesmo o corazón estreito e endurecido.

Coidemos esta familia diocesana como un gran tesouro, aos nosos irmáns e irmás, aos nosos sacerdotes, ás persoas de vida consagrada, os templos, as tarefas e as iniciativas comúns; porque nesta familia, na súa humildade, están encerradas as riquezas máis decisivas da vida.

Non nos espanten ou escandalicen os seus límites, saibamos ver o tesouro do Evanxeo, a plenitude de graza e de verdade, que a Igrexa fai presente no medio das nosas casas. Non valoremos só a beleza e a limpeza dos nosos edificios, aínda que niso se manifeste o interese e o agarimo, senón sobre todo a presenza do Señor Xesús, a promesa de vida, a esperanza que brota ao estar na súa compañía.

Aceptemos vivir como irmáns, seguindo os ensinos de Cristo; axudémonos no camiño de cada día, ofrezamos a nosa man nas dificultades, acompañémonos nos momentos de dor e de soidade.

Aprendamos a ver en cada persoa a dignidade de alguén amado por Deus, fagamos propia a caridade do Señor Xesús, que non veu buscar a sans e xustos, senón a enfermos e pecadores, e que El alimenta no corazón dos seus, de quen permanecen ao seu carón, de xeito especial cando é recibido na eucaristía.

Con este amor universal, que non coñece límites, que ten entrañas de misericordia, daremos a proba mellor de cal é a «familia» á que pertencemos, de quen é o noso Pai, o noso Mestre e o noso Señor.

Mons. Alfonso Carrasco Rouco

Bispo de Lugo

Día da Igrexa Diocesana

 O Día da Igrexa Diocesa

O Día da Igrexa Diocesana (11 de novembro) lémbranos que formamos parte dunha gran familia que debemos coñecela, apreciala e comprometernos con ela.

 O Sr. Bispo Mons. Alfonso Carrasco, con motivo do Día da Igrexa Diocesana, invita na súa carta pastoral a “coidar esta familia diocesana como un gran tesouro, aos nosos irmáns e irmás, aos nosos sacerdotes, ás persoas de vida consagrada, os templos, as tarefas e as iniciativas comúns; porque nesta familia, na súa humildade, están encerradas as riquezas máis decisivas da vida […] e  tamén invita a valorar “sobre todo a presenza do Señor Xesús, a promesa de vida, a esperanza que brota ao estar na súa compañía”.

[Carta pastoral do Sr. Bispo]

Algúns datos da Diocese, referidos ao ano 2017

Actividade pastoral

Sacerdotes 263      Relixiosos 177      Misioneiros 53

Actividade celebrativa e evanxelizadora

Bautizos 768     Matrimonios 340      Comuñóns 769

Unción de enfermos 323     Confirmacións  377     Catequistas 356

Actividade caritativa e asistencial

Centros sociais e asistenciais  8       Persoas atendidas 4.000

[Ver máis datos]

 

[Subsidio litúrxico]

Actividades de difusión misioneira

Concurso Infancia Misioneira

Con motivo da celebración da Xornada de Infancia Misioneira 2019, cuxo lema é Con Xesús a Belén. Que boa noticia!, Obras Misionais Pontificias e o Secretariado de Infancia Misioneira convocan o concurso: “Conta a noticia! Crea a túa revista”.

Trátase de que cada participante sexa director, redactor ou maquetador da súa propia revista anunciando a Boa Nova de que Xesús xa está entre nós.

Poderán participar nenos de educación primaria, en equipos de 2 a 6 persoas, que antes do 24 de decembro presentarán as revistas na Delegación Diocesana de Misións de Lugo. Nesta fase diocesana escolleranse os traballos que se enviarán a Obras Misionais Pontificias para participar na fase nacional do concurso.

[Bases]

Convivencia de animación misioneira

O Instituto Español de Misións Estranxeiras (IEME) organiza unha Convivencia de Animación Misioneira en xaneiro (días 7 – 10) dirixida a sacerdotes diocesanos, diáconos e seminaristas en etapa de pastoral para animar entre eles o espírito misioneiro e que este espírito contaxie tamén os plans e programas pastorais.

Obxectivos concretos:

  • Compartir a Pastoral Xuvenil á luz do Sínodo.

  • Coñecer experiencias e traballo da Igrexa con mozos, aquí e en misión.

  • Reflexionar sobre o fenómeno xuvenil no anuncio misioneiro do Evanxeo.

[Programa]

Coaching familiar. Encontros de pais

 

O Centro de Orientación Familiar Diocesano en colaboración co Instituto da Familia de Ourense, leva adiante Encontros de pais nos que formarse e reflexionar sobre a familia e as emocións. En sesións mensuais de hora e media de duración, os asistentes abordan de xeito práctico os retos aos que se enfrontan os pais:

  • Como coidarse un mesmo para coidar á familia.
  • Comunicación en familia.
  • Acompañar aos fillos nas súas dificultades.
  • Familyfullnes (busca construír a familia, centrarse no positivo e mellorar lazos interpersoais)
  • Intelixencia espiritual.
  • Ciber trío (Pais – Fillos – Móbiles)

 Estes Encontros, que van pola segunda edición, comezan o martes 13 de novembro no colexio Divino Mestre de Lugo (rúa Portugal, teléfono 982 21 68 44) e o 14 de novembro no Colexio Salesiano Divina Pastora de Lugo (praza da Milagrosa, tlf: 982 21 49 57). Non é necesariamente para pais de alumnos destes centros senón para calquera persoa en calquera circunstancia que vexa a responsabilidade de mellorar como pai.

[Máis información]

A %d blogueros les gusta esto: