Novena da Graza

A Novena da Graza na Parroquia San Francisco Xavier (Lugo) comeza o 4 de marzo e estará predicada polo misioneiro xaveriano Miguel Taboada Tabuenca. Tras dez anos en Brasil, Miguel vive agora en Murcia, onde colabora coa súa comunidade no Servicio Conjunto de Animación Misionera

Horarios da Novena

  • Mañá: 7:30 rosario e procesión, 8 e 12 Novena e Eucaristía

  • Tarde: 6 rosario. 6, 30 e 8 Novena e Eucaristía

  • Domingo: 10; 11: 30; 12: 30 e 18: 30

Darase a venerar a reliquia do santo nas misas e hai confesións en todos os actos.

Actos especiais

  • Día 6 de marzo: Unción de enfermos ás 4,30h da tarde

  • Día 8: Celebración comunitaria do perdón ás 19h

  • Día 10: Procesión de fachos despois da Eucaristía das 8 da tarde.

  • Día 11: procesión desde o Barrio de Montirón ás 9,30h da mañá.

Carmen Fernández de la Cigoña interveu nas Xornadas Abertas de Teoloxía

O martes 27 febreiro no Salón Rexio do Círculo das Artes (Lugo) tivo lugar baixo o título “Educar en la afectividad hoy: legislación, familia, escuela” a segunda conferencia das Xornadas Abertas de Teoloxía. A relatora foi a Doutora en Dereito e docente de Historia do pensamento político español e Doutrina Social da Igrexa (DSI) Carmen Fernández de la Cigoña Cantero.

 Para a relatora, hai que ter moi claro que a educación está destinada a un ben: a perfección da persoa. Desde a concepción cristiá, desde a teoloxía e a DSI entendemos que o ben existe (consecuentemente o mal existe e non todo dá igual) e a persoa debe dirixirse ela mesma polos seus propios medios e axudada polos demais a ese fin específico que ao final sen dúbida coincidirá co ben. E debemos educar na verdade en canto que nos encamiñamos cara ao ben. Porque a verdade tamén existe, como consecuencia da existencia do ben.

En canto á lexislación, Carmen Fernández de la Cigoña lamentou que en España a Lei de Educación sexa moeda de cambio entre as distintas forzas políticas.

Retiro de Coresma organizado pola Delegación de Apostolado Segrar

É un retiro aberto a todos os segrares de parroquias, movementos e asociacións.

 Será o vindeiro sábado 3 de marzo, de 10h a 13:45h, no Seminario diocesano de Lugo, e acompañará o retiro José Luis Vázquez Coego, subdelegado de Catequese.

O horario do retiro será o seguinte:

  • 10:00 Acollida
  • 10:15 Oración
  • 10:30 Primeira charla
  • 11:30 Descanso
  • 12:00 Segunda charla
  • 12:45 Preparación eucaristía
  • 13:00 Eucaristía

Xornada de Portas Abertas no Seminario

O venres 2 de marzo o Seminario Menor Diocesano celebra a II Xornada de Portas Abertas deste curso. Está dirixida ás familias e aos rapaces interesados no coñecemento do Seminario Menor, así como a calquera outra persoa desexosa de achegarse a esta realidade diocesana. Será un momento para dar a coñecer a proposta educativa, as instalacións, o funcionamento ordinario da vida académica e comunitaria, algunhas das actividades e proxectos que se realizan ao longo do curso… A asistencia é libre, e non é necesario confirmala previamente; abonda con presentarse na Aula Magna (acceso dende o vestíbulo principal).

  • 18h  Tralo saúdo e a presentación, visítanse as instalacións do Seminario Menor, con algunhas paradas en sitios puntuais para coñecer as actividades e os ritmos de funcionamento do Centro.   
  • 19:30 h Remate.

Con esta II Xornada de Portas Abertas o Seminario quere achegarse ás familias que están  pensando no Centro de ensino para os seus fillos no próximo curso ou máis adiante no tempo, permitindo un coñecemento de primeira man do lugar e do proxecto educativo.

Está aberta a reserva de praza para o curso 2018/19 en ESO e BAC (internado ou mediopensionista). Para máis información:

teléfono 982 220 100  e no correo info@seminariodelugo.org

O arcebispo de Oviedo, Mons. Jesús Sanz, inaugura as Xornadas Abertas de Teoloxía

O 26 de febreiro iniciáronse as XXXII Xornadas Abertas de Teoloxía coa presenza do arcebispo de Oviedo, Mons. Jesús Sanz OFM, que despois de caracterizar á sociedade actual (seguindo entre outros autores a Zygmunt Bauman) foi comentando o papel dos 5 suxeitos implicados na tarefa educativa:

  • Educando. “A persoa humana é unha obra de arte que ten simultaneamente un sinfín de posibilidades e un sinfín de limitacións. Ambas son un regalo. As posibilidades de quen ten algo que dicir, algo que poder construír. Para que non se conciba o centro do universo chamándose a si mesmo deus, está a limitación de saber que non se sabe todo, non se pode todo e non se ten todo. O educando é unha obra de arte en bruto. Esa obra de arte é única e irrepetible porque fixérona en serio, non a fixeron en serie”.
  • Educador. “Ten que ser como nai nodriza que sabe transmitir nutrindo a quen está acompañando. Propón, regala. Educar é non permitir que a outra persoa termine sendo inane e morra de fame de descubrir o que leva dentro”.
  • Familia. “Quen a controle sabe que ten nas súas mans a medio e longo prazo, o mañá. Por iso a familia ten neste momento tantos intentos de control, de mixtificación, de confusión e de disolución”.
  • Escola. “Importante non só por ensinar os contidos das ciencias e das artes, tamén se convive cunha xeración e hai uns mestres que van formando sen formatear unha visión adulta e madura na propia vida”.
  • Comunidade cristiá. “É unha síntese das preguntas do corazón humano e das respostas reveladas por Deus. É o lugar onde a miña pregunta é abrazada e respondida por un Mestre. Na comunidade cristiá a miña vida humana atópase cun ti que me permite crecer ata a maduración”.
A %d blogueros les gusta esto: