A Nosa Voz

Día do Seminario: “Coñece, axuda, reza, ven”

Copia de Día do seminario

 Este ano a celebración é o día 16, por ser laborable o día 19.

O Seminario, especialmente o Menor, é un ben moi grande que se ofrece ás familias e aos mozos. É un recurso educativo de primeira orde que pode resultar de gran interese para quen desexe unha educación cristiá integral, e, por tanto, tamén vocacional.

A Diocese lucense ten unha tradición de Seminario, e moi especialmente de Menor, longamente arraigada. Iso permitiu que neste momento, mentres outras dioceses pensan abrilo ou reabrilo, Lugo conte agora mesmo cun Seminario Menor activo, con 41 seminaristas, persoal e instalacións. É un recurso enorme á disposición da sociedade.

Este lugar educativo está pensado para que os mozos que na infancia ou a adolescencia senten a chamada ao sacerdocio poidan crecer e madurar. E para que outros moitos, que desexan unha educación cristiá, poidan recibila con este específico sentido vocacional.

Notas identificativas (especialmente do Seminario Menor):

– Unha comunidade cristiá-vocacional

 – Un internado (preferentemente)

 – Un centro de estudos (para cursar ESO e BAC)

– Unha realidade que existe en vistas ao Seminario Maior

Apostas:

  – Unha formación académica de calidade

– Unha proposta clara da vida cristiá-eclesial-vocacional

– Un acompañamento persoal específico

[Máis información]

Miguel Ángel Álvarez: Visita Ad Limina, a proximidade do Papa

Bispo Lugo con Papa

Foi noticia. A finais de febreiro e comezos de marzo os bispos españois fixeron a Visita Ad Limina. É a visita que, periodicamente, fan todos os bispos do mundo ás tumbas dos apóstolos Pedro e Paulo, para atoparse co Papa e informalo da situación das dioceses que teñen encomendadas.

Non é algo novo, faise desde sempre. Pero na actualidade, e grazas á globalización dispoñemos de imaxes e detalles case ao instante en calquera lugar do planeta.

Independentemente dos formalismos, este tipo de actos, mostran de forma afable a unidade da Igrexa, así como a proximidade afectuosa do Papa con todos os fieis do mundo a través dos nosos pastores diocesanos.

Pola súa banda, os bispos, que viaxan á Cidade Eterna, lévanlle ao Santo Padre toda a vida diocesana: o bo e o malo. Por suposto, que tamén lle levan o afecto e a proximidade de cada un dos católicos que peregrinamos baixo a guía do Bo Pastor, do que o Papa é o seu vicario.

Hoxe dunha forma especial, do mesmo xeito que facemos sempre na celebración da Eucaristía, pedimos polo Papa, e polos nosos bispos. É bo para nós ter pastores santos, por iso encomendámolos ao Señor, para que todos, eles e nós, vivamos na perfección da caridade.

Miguel Ángel Álvarez Pérez

Semana Vocación-Misión no Colexio A Milagrosa

Entre os días 8 e 14 marzo celébrase a Semana Vocación-Misión no Colexio A Milagrosa (pza. do Ferrol, Lugo) baixo o lema Soñar cun mundo máis xusto e solidario. Este curso realízanse tres actividades:

Bocadillo Solidario: Durante esa semana véndense bocadillos para o recreo.

Rifa: Unha camiseta e un balón do Club Deportivo Lugo, asinados polos xogadores.

O recadado servirá para axudar aos alumnos con necesidades do Centro.

Tenda Solidaria: No salón do colexio hai unha tenda de artesanía para todo o público. O recadado ten como finalidade financiar os “almorzos de Haití” da “MISSIÓN JEAN GABRIEL PERBOYRE” que as Fillas da Caridade teñen en Gonaïves (Haití) para que os escolares poidan comer ao longo do día. 

Horario da tenda: Sábado 8 de marzo (11:30-13:30) (18:30-20:30)

Domingo 9 de marzo (10:00-14:00) (18:30-20:30)

Luns, martes, mércores e xoves (13:30-17:30)

Miguel Ángel Álvarez: A fe en Deus dá estabilidade ao mundo

A cita da Lumen Fidei escollida para comentar nesta ocasión refírese á necesidade dunha sociedade máis fiable. É do número 55 e di:

“Se fixesemos desaparecer a fe en Deus das nosas cidades, debilitaríase a confianza entre nós, pois quedariamos unidos só polo medo, e a estabilidade estaría comprometida”. (LF 55).

A miúdo pénsase que a fe é algo que só necesitamos para cando queremos falar de Deus. É verdade que coñecemos a Deus pola fe, pero tamén é verdade que, grazas á fe, coñecemos unha boa parte das cousas do mundo. Sen a fe, sen fiarnos dos demais, non poderiamos saír á rúa, comer fóra de casa, ir á barbaría, ao médico, subirnos nun ascensor, nin ir á escola.

Pero, todas estás cousas non son das que está a falar o Papa cando di que sen a fe en Deus comprometeríase a estabilidade do mundo.

O que nos quere dicir o Papa Francisco é que sen fe en Deus, ou o que é o mesmo, sen un lugar para Deus no mundo, erixímonos en deuses de nós mesmos. Se é así, cada un imporá aos demais as súas propias leis, será imposible un criterio unánime sobre o que está ben e mal, e, o medo ao que poida facerche o outro será o único que teñamos en común.

Entre outras cousas, poderiamos dicir que Deus pon obxectividade no mundo, dándonos así unha estabilidade necesaria. Non é casualidade que canto menos espazo lle deixamos a Deus máis aumenta a violencia, e, por tanto, o medo.

O mundo necesita estabilidade, a fe en Deus dánola.

Miguel Ángel Álvarez

VI Xornadas para sacerdotes en Montecelo

A Asociación Social e Cultural Porta Maris celebra a sexta edición das súas Xornadas para sacerdotes, os días 19 e 20 de febreiro, en Montecelo, Paderne. O Bispo de Ourense, Mons. Leonardo Lemos e mons. Manuel Sánchez Monge, Bispo de Mondoñedo-Ferrol participan nestas xornadas centradas en distintos puntos da mensaxe evanxélica. Tamén se tratará do estilo sacerdotal que pide o Papa e da faceta comunicativa do Santo Padre.

A %d blogueros les gusta esto: