Concerto solidario organizado por Mans Unidas

O 27 de xuño ás 20:30 h o Círculo das Artes de Lugo acolle un Concerto solidario a favor de Mans Unidas. Intervirán a Banda Sons e Soños (Rábade, Begonte, Outeiro de Rei), dirixida por Armando Morales e o grupo musical “Los Potes”, con cancións dos anos 1950-70.

A entrada-donativo (5€) pode conseguirse na Delegación de Mans Unidas (r/ Cruz, 1 B, 1º) ou no Círculo das Artes (1 hora antes do concerto).

Experiencia gastronómica “Viño e algo +”

Viño e algo + é unha iniciativa conxunta da Diocese de Lugo e un grupo de destacados hostaleiros lucenses para celebrar os 350 anos da Ofrenda do Reino de Galicia.

Desde o 25 ao 30 de xuño dez locais de hostalaría (A Nosa Terra, Paprica, Canedo, Consulado, Cachivaches, Campos, Casa Paco, Fiordilatte, Restaurante España, Vinissi) ofrecerán un viño de denominación de orixe Ribeira Sacra e unha tapa ou unha especialidade da casa. Os consumidores recibirán unha tarxeta con datos históricos/curiosidades referentes ao devandito acontecemento e á Catedral. Porque do que se trata é de promocionar a singularidade da Catedral lucense, así como toda a súa riqueza e importancia tanto relixiosa como artística e cultural.

O Centro Eucarístico Lucense, o cabido da Catedral e a Diocese de Lugo desexan destacar que a aparición do cristianismo supuxo un empuxe extraordinario para a propagación e o desenvolvemento do cultivo dos viñedos da Ribeira Sacra. Coa elección dos viños desta denominación únense tamén á proposta de candidatura para que a Ribeira Sacra sexa declarada Patrimonio da Humanidade, como o é desde 2015 a Basílica de Lugo.

A necesidade do viño para a consagración e a celebración da Santa Misa, fixo que as primeiras comunidades cristiás e os primeiros Padres da Igrexa fomentasen a súa produción. Deste xeito, o pan e o viño para o cristianismo non son uns meros produtos. O “tomade e comede” e “tomade e bebede” de Xesucristo na Última Cea convérteos en algo máis que símbolos, de feito, son mediación para a Presenza Real na Eucaristía.

Sacerdotes do Arciprestado de Chantada peregrinaron a Suegos

Sacerdotes do Arciprestado de Chantada ante a casa natal de San Xosé Mª de Suegos

O día vinte e dous de maio, os sacerdotes do Arciprestado de Chantada, que coincide coa Comarca conformada por tres concellos (Carballedo, Chantada e Taboada) fixeron unha peregrinación á parroquia de Santa Eulalia de Suegos (Pol), a terra natal de San Xosé María Díaz Sanjurjo. Era unha emotiva maneira de celebrar a clausura dos retiros espirituais e a formación permanente do clero que se realizaron neste curso pastoral. Participaron dez sacerdotes acompañados por José Lebón Sánchez, moi querido polos cregos da zona de Chantada. Foron recibidos con agarimo por Jesús Trigo López, natural de Suegos e párroco desta comunidade. Visitaron a casa natal do santo e foron acollidos moi afablemente polos familiares do mártir do Tun-King, conversando sobre a xenealoxía do santo e sobre algúns detalles desta familia. A continuación houbo un breve retiro e a Misa concelebrada por todos. Como final, no templo, rezouse ante a imaxe do santo dando grazas a Deus e presentándolle as coitas de cadaquén. Presidiu todos estes actos o Delegado Diocesano de Clero e párroco de Meira, Miguel Asorey Otero que nos acompañou a ver o Pedregal de Irimia, berce do río Miño, visitar a igrexa de Santa María de Meira, que foi mosteiro cisterciense do ano 1142, o segundo máis antigo da Orde en Galicia despois de Oseira 1137. Terminouse o entrañable encontro cunha comida de fraternidade na localidade de Mosteiro.

Curso de música litúrxica do Corpus Christi

Está organizado pola Delegación de Liturxia de Diocese de Lugo e polo Centro Eucarístico Lucense, que nos últimos seis anos vén desenvolvendo, entre as súas múltiples actividades, o Festival Internacional de Órgano do Corpus Christi de Lugo, ciclo que ten como principal obxectivo realzar a través da música para órgano a Solemnidade do Corpus Christi, festa por antonomasia da Cidade de Lugo, a Cidade do Sacramento.

Realízase este curso coa intención de contribuír á formación musical e litúrxica daqueles músicos que realizan distintas funcións no ámbito da música sacra: directores de formacións vocais, organistas, cantores, monitores, etc.

Despois do notable éxito da primeira edición da Noite Coral nesta cuarta edición haberá o 6 de xullo a II Noite Coral Lucense, coa que se desexa conectar o Curso de Música coa cidadanía. Trátase dun circuíto nocturno de concertos polos templos da cidade e un concerto final no claustro da Catedral.

[Información e inscrición]

Sacramentum caritatis

A celebración eucarística do Corpus Christi, adornada coa presenza silenciosa de fieis das parroquias da cidade, vestida de gala e coloreada de branco cos nenos da primeira comuñón, remóntanos ao clima espiritual do Xoves Santo, o día en que Cristo, na véspera da súa paixón, instituíu no Cenáculo a santísima Eucaristía. Deste xeito, o Corpus Christi constitúe unha renovación do misterio do Xoves Santo, co fin de obedecer á invitación de Xesús de proclamar ao mundo aquel misterio da última Cea que revelou na intimidade aos apóstolos.

Na liturxia do día da solemne festa do Corpus Christi cántase na secuencia o seguinte refrán: “é certeza para os cristiáns: o pan convértese en carne, e o viño en sangue”. É por iso festa singular que constitúe unha importante cita de fe e de loanza para toda a cristiandade pero con especial devoción e tradición na cidade e na Diocese de Lugo. Na exhortación postsinodal á que fai referencia o título deste artigo lembraba Bieito XVI que o misterio eucarístico “é o don que Xesucristo fai de si mesmo, revelándonos o amor infinito de Deus para cada ser humano” (SC,1).

A celebración, durante este ano, dos 350 anos da Ofrenda do Antigo Reino de Galicia a Xesús Sacramentado na Catedral de Lugo (1669-2019) contribúe a enaltecer a inmemorial devoción ao Santísimo na nosa cidade. A exposición conmemorativa que percorre as sete capitais de provincia do Antigo Reino de Galicia mostra datos e documentos dos nosos arquivos lucenses que poñen de manifesto o tesouro relixioso, cultural e social que se xerou a través de tres séculos e medio de historia pola antiquísima tradición que xurdiu aquí para a defensa da fe na presenza real de Xesús Sacramentado.

Existe tamén outra antiga tradición eucarística na nosa Diocese que vén desde o século XIV, confirmada por fontes históricas e arqueolóxicas. Refírome á do Cebreiro. Esta fermosa historia relata que un sacerdote cando celebraba a Eucaristía pensaba que naquel cru inverno (como todos os invernos do Cebreiro) no que a neve se amoreaba e o vento aumentaba, ninguén se achegaría á celebración da Santa Misa. Pero equivocábase o sacerdote. Juan Santín, labrador de Barxamaior chegou exhausto até o Mosteiro para participar na celebración. O celebrante, de fe titubeante, non soubo valorar abondo o sacrificio daquel campesiño nun día tan intempestivo. No momento da consagración decátase e ve, cos seus propios ollos, como a Hostia santa convértese en carne sensible, e o contido do cáliz, en sangue que latexa e tingue de vermello o mantel do altar. Asombrado, o sacerdote preguntábase que era aquilo que vían os seus ollos.

Quixo así o mesmo Xesucristo fortalecer a débil fe daquel monxe pero tamén a de todos. Foi un milagre asombroso. O grandioso é que hoxe segue sucedendo en cada celebración eucarística, en cada primeira comuñón, en cada ser humano que se achega con fe á Eucaristía ou en cada un que, necesitado de confianza, dúbida ou mesmo se mofa da fe dos crentes. A noticia do milagre estendeuse por todas partes xerando unha renovada devoción á Eucaristía. Hoxe, con fe renovada proclamamos firmemente estas verdades. E seguiremos dicindo, desde sempre e para sempre: Viva Xesús Sacramentado!

Mario Vázquez Carballo

Vicario Xeral da Diocese

[Artículo en castellano]

A %d blogueros les gusta esto: