Durante os próximos días os que sintonicedes a COPE ou Radio María teredes ocasión de escoitar esta mensaxe: “Por San Xosé, día do Seminario” ou tamén algo referente ao lema escollido para este ano: “Señor, que mandades facer de min?” tomado de Santa Teresa de Xesús.
É que os seminarios existen, e existen todos os días do ano. Por iso temos que celebrar o día do seu patrono dunha forma especial. Os seminarios existen porque existe Deus e porque hai homes que seguen escoitando a súa chamada e decídense a seguilo como sacerdotes de Xesucristo.
Estamos afeitos ver o Seminario como lugar de formación, pero é moito máis. O Seminario é unha verdadeira familia, porque a presenza de Deus Pai e do seu Fillo Xesucristo séntese dunha forma especial.
Os seminaristas son mozos que atoparon un tesouro que, nestes tempos, está escondido á maioría das persoas da súa idade. Eles saben de “quen se fiaron” e quen “manda na súa vida”. Saben que van da man daquel que non pasa nunca, que é un valor seguro, e ademais, están dispostos a dar a súa vida por anuncialo ao mundo, e por compartir coa humanidade este tesouro.
Os seminaristas estudan, traballan, xogan, comparten, viven, pero, sobre todo, son felices porque se fiaron… Porque, quen non se vai a fiar do “Amigo que nunca falla”?…
“Por San Xosé, día do Seminario”. Nestes días reza polo Seminario, polos seminaristas, polos formadores e profesores…. Ora polos sacerdotes e pola Igrexa.
Miguel Ángel Álvarez Pérez
A Nosa Voz
O horizonte do ensino relixioso en España
Sen ánimo de polemizar, quero aclarar algunhas cuestións que me parecen verdades de sentido común, para aqueles que estamos dispostos a dialogar, a razoar, e a vivir nun contexto de liberdades e de respecto aos dereitos fundamentais do ser humano.
O ensino da Relixión na escola (Ere), especialmente en España, volve ser motivo de debate. Este debate, para aqueles que afirman que co novo currículo da Ere, vólvese ao nacionalcatolicismo, debería estar pechado fai moito tempo. Así sucede no 99% dos países de Europa. A Ere está, cuns contidos básicos e elementais, nos países máis desenvolvidos da Unión Europea (nalgúns de xeito obrigatorio) e nos que mellor calidade de ensino hai.
En primeiro lugar, un erro grave a este respecto, é ignorar que a formación relixiosa nos centros escolares é obxecto dun dereito fundamental. E, en segundo lugar, -outro grave erro-, consiste en non querer atribuír á materia a mesma importancia recoñecida ás demais materias curriculares. Sen formación relixiosa ándase mal pola vida e polo mundo.
Estes dous erros provocan notables desorientacións e fan case imposible o debate. Por exemplo, a ninguén se lle ocorrería pensar que se pode ensinar cristianismo á marxe do estudo das outras grandes relixións monoteístas. Nunca se fixo así. Ou que se pode falar de Deus sen ensinar as formas de relacionarse con El. Por exemplo, todo o relativo á oración e á liturxia, coa carga que conleva de socialización, educación para o silencio e a contemplación, etc. Ou as relacións insubstituíbles para unha comprensión da realidade entre a fe e a arte, o patrimonio relixioso e o turismo, a fe e a razón, a ciencia e a fe, etc. Como se pode dialogar con alguén que non é capaz de concibir que se pode ser crente e pensador, ou que, de feito, a filosofía e a fe sempre camiñaron xuntas ata o século XIX? Como podemos chegar a un acordo un crente e un incrente, ou un agnóstico, se descartamos desde o principio toda posibilidade de relación entre a fe e a ciencia? É que non se pode ser científico e crente? É que non é compatible afirmar que estamos no mundo porque hai un Deus creador e ao mesmo tempo que as sementes da vida evolucionaron de moitos xeitos? As teorías científicas tamén cambian e evolucionan e elas soas non teñen a última palabra.
Cáritas leva a cabo a acción divulgativa “Grandes mulleres”
Cáritas Diocesana de Lugo, xunto coa Asociación Enriqueta Otero e Aliad Ultreia, desenvolve unha acción de empoderamento feminino con motivo da celebración o día 8 de marzo do Día da Muller.
A acción levarase a cabo na mañá do día 6 no Mercado Municipal de Quiroga Ballesteros e do día 7 ao 13 do mesmo mes na Biblioteca Intercentros do Campus de Lugo.
Con tres paneis visualízase a acción cunha mensaxe de positividade, autoestima e fortaleza.
Nos dous primeiros paneis, baixo o lema Grandes mulleres, hai fotos de féminas da historia que loitaron polos dereitos civís, nas artes ou nas ciencias. O terceiro panel, baixo a mesma lenda, permanecerá tapado por unha cortina que se espera as participantes abran. Ao facelo, todas atoparán a unha gran muller que lles resultará moi coñecida: elas mesmas veránse reflectidas nun espello formando así parte do elenco de mulleres loitadoras, mulleres importantes, mulleres que fan historia; porque elas mesmas son tamén grandes mulleres.
Acción formativa de Cáritas e proxecto “Emprégate”
Ata o 13 de marzo terá lugar a acción formativa: “Informática básica para a procura dun emprego” actividade incluída no proxecto EMPREGO CÁRITAS DIOCESANA DE LUGO no marco do PROGRAMA OPERATIVO PLURIRREGIONAL DE LOITA CONTRA A DISCRIMINACIÓN 2007-2013. Actividade cofinanciada con fondos pertencentes ao Fondo Social Europeo e ao Ministerio de Sanidade, Servizos Sociais e Igualdade IRPF 2014.
Ata o 13 de marzo está aberto o prazo para inscribirse no proxecto Emprégate de promoción e apoio ao autoemprego. É un proxecto que xurdiu no ano 2012, dentro do Programa de Emprego de Cáritas Diocesana de Lugo.
Con Cáritas colaboran das asociacións empresariais Mulleres Empresarias de Lugo e Xoves Empresarios de Lugo. Entidades que formarán parte dun equipo de traballo composto por técnicos de Cáritas, voluntarios de Empresas con Corazón (Proxecto de Cáritas Lugo que busca a colaboración de empresas e autónomos co fin de axudar ás persoas que máis o necesitan) e outros profesionais coñecedores da realidade empresarial actual.
A Fundación Barrié e Cáritas suman esforzos para reducir o abandono e o fracaso escolar
Ponse en marcha o «Programa de atención a menores e educación familiar», que se desenvolverá ata decembro de 2015 cun orzamento total de 300.000 euros, dos cales 150.000 serán aportados pola Fundación Barrié.
As accións previstas inclúen bolsas de estudo e actividades de apoio escolar dirixidas por voluntarios de Cáritas para fillos de familias en situación de urxencia ou vulnerabilidade social.
As cinco Cáritas Diocesanas de Galicia (Santiago de Compostela, Mondoñedo-Ferrol, Lugo, Ourense e Tui-Vigo) asumen a xestión do programa, a través de profesionais da súa rede en Galicia e voluntarios vinculados ao ámbito educativo.
O programa engloba diferentes accións de intervención:
· Un acompañamiento personalizado por parte de profesionais de Cáritas. Entre outras accións, desenvolveranse visitas a domicilio e actividades de formación específica, como alfabetización e talleres de competencias básicas, economía doméstica ou reforzo da comunicación na familia.
· Outra achega do programa será o apoio económico ás familias mediante axudas complementarias para a compra de libros e material escolar, así como becas para que os seus fillos poidan acceder, en igualdade de condicións, a recursos especializados e actividades extraescolares.
· Para rematar, o programa prevé tamén a elaboración de documentación, talleres e campañas de sensibilización en centros escolares.
Sebastián Mora, secretario xeral de Cáritas Española, no acto de presentación do convenio lanzou unha chamada á esperanza e unha invitación a asumir o compromiso de todos á hora de construír alternativas para as persoas que non teñen os seus dereitos fundamentais cubertos.
O secretario xeral de Cáritas Española estivo acompañado no acto polos directores das Cáritas Diocesanas de Galicia.