Tres notas do traballo dunha Delegación de Misións: apertura, respecto e compromiso

Hoxe atopámonos ante unha nova etapa misioneira que pide unha nova conciencia e comprensión dos aspectos teolóxicos e pastorais da misión. A Igrexa enfróntase a novos interrogantes: que significa evanxelizar nun mundo traspasado pola inxustiza e a desigualdade cada vez máis grande entre ricos e pobres; como evanxelizar a nova cultura que está nacendo; como afrontar o diálogo interrelixioso, sobre todo cando crece a persecución contra os cristiáns por parte de certos grupos fundamentalistas; que significa “saír ás periferias“ para unha Igrexa envellecida e con pouca vida como é a europea; como facer crible unha mensaxe de amor e misericordia cando moitos dos seus membros principais aínda hoxe continúan vivindo como auténticos príncipes…

Todos estes interrogantes hai que respondelos a partir dunha serie de constantes que deben estar presentes en todo momento:

A primeira constante é o que da misión. En primeiro lugar, temos de aclarar o concepto “territorio de misión“. Hoxe utilízase este concepto para designar a aquelas circunscripcións eclesiásticas que están baixo o amparo da Congregación para a Evanxelización dos Pobos, ao ser comunidades eclesiais que non poden subsistir por si mesmas, debido á falta de recursos humanos e económicos. Actualmente están catalogados 1.113 territorios de misión por África e Asia, as illas de Oceanía e América. A misión sempre é ad gentes. Xa que logo, unha Igrexa misioneira é aquela que entra en contacto cos chamados territorios de misión, para anunciar o Evanxeo a quen aínda non oíu falar del, non unha Igrexa que, por comodidade ou medo, queda no seu propio territorio e só pensa nos seus problemas.

A segunda constante é o como da misión. En 1622, o Papa Gregorio XV funda a Congregación Propaganda Fide coa intención de poñer toda a actividade misioneira baixo o seu control e desligala da actividade colonial. E no ano 1659, a Congregación dirixe unha Instrución que se converteu nunha especie de Carta Magna das misións, posto que mostra como ha de levase a cabo e que calidades han de adornar ao mensaxeiro. A grandes liñas, a Instrución recolle o antigo concepto das “sementes do Verbo presentes en todo home“ para mostrar que a misión non se pode realizar dun xeito colonialista, impoñendo os criterios e modos de pensar e de actuar, senón respectando, acollendo e valorando positivamente o bo que hai noutras culturas e relixións, posto que nelas atopamos o abono axeitado para a semente do Evanxeo.

A terceira constante é o quen da misión. O Vaticano II considera a misión como algo propio de todo o Pobo de Deus, posto que forma parte da natureza da Igrexa e ten a súa orixe na Trinidade: na misión do Fillo e do Espírito Santo, segundo o propósito do Pai (cf. Ad Gentes 2). Por iso, Evangelii Gaudium 119-121 fala da Igrexa como un pobo de discípulos misioneiros.

Ler máis

Festival de Infancia Misioneira 2018

O Festival de Infancia Misioneira será o 19 de xaneiro ás 17h no salón da Parroquia do Bo Pastor. Comézase cun encontro co xogador congoleño do Breogán Hervé Kavasele. Compartirá cos asistentes a súa experiencia e faráselle entrega de material escolar para os nenos do seu país. Neste xesto misioneiro e solidario poden participar todos os nenos asistentes levando algo.

A continuación, a compañía de maxia de Juan e Ana Tamariz presentarán un espectáculo chamado “Maxia e alegría”. Con esta actuación preténdese infundir a alegría no corazón dos nenos, actitude necesaria para que poidan abrirse á misión.

 A Xornada da Infancia Misioneira (mundial e pontificia) celébrase o día 28 de xaneiro (IV domingo do Tempo Ordinario).

Mesa redonda sobre a caridade organizada pola Delegación de Misións

O martes 3 de outubro ás 20h no salón de actos da Deputación Provincial hai unha mesa redonda titulada A caridade, alma da misión. Moderados polo Vicario de Pastoral, Luis Manuel Rodríguez, intervirán:

  • Laura Campoy Vázquez, Presidenta de Mans Unidas de Lugo

  • Mónica Yáñez Devesa, Secretaria xeral de Cáritas Lugo

  • Jesús Manuel Santiago Vázquez, Delegado de Misións de Lugo

É un acto organizado por Obras Misionais Pontificias e a Delegación de Misións de Lugo.

Gran misión na Praza Maior de Lugo

Durante cinco domingos de Pascua ás 12h levaránse a cabo misións na praza Maior de Lugo. O contido destes encontros é o das catequeses para a iniciación cristiá que realiza o Camiño Neocatecumenal. Levándoas á rúa, ofrécense a tanta xente que non vai polos templos e á quen Xesucristo quere saír ao seu encontro.

En cada convocatoria, despois de interpretar cánticos, e que algunha persoa conte a súa experiencia de fe, un catequista predica unha das catequeses.

Infancia Misioneira 2017

A Xornada da Infancia Misioneira celébrase o día 22 co lema “SÍGUEME” e nos días previos estará na Diocese de Lugo Rolando Ruíz, misioneiro xaveriano natural de México, que estivo moitos anos en África e agora reside España. Xunto co delegado de Misións, Jesús Santiago, recorrerá diversos puntos da Diocese desde o luns 16, día adicado ao contacto cos nenos e os peregrinos no Cebreiro. O martes 17 estarán en Palas de Rei. O mércores 18 no C.E.I.P. A Gándara de Monforte de Lemos e ás 19:30 h haberá un encontro con catequistas e pais na Parroquia San Francisco Xavier, Lugo. O xoves 19 as actividades faranse con nenos de Mosteiro e Melide. O venres 20 pola mañá no Colexio Divino Mestre de Lugo e pola tarde de 18h a 20h haberá un encontro cos nenos de todo Lugo no Pazo dos deportes. Estarán acompañados por un dos xogadores do segundo equipo do Breogán que fixo a pretemporada con eles e que é de Níxer. Pódese levar algo de material escolar para poder enviarllo aos nenos de Níxer. Será unha acción misioneira concreta en favor dos nenos máis necesitados. Haberá varias actividades durante esas 2 horas nas cales os nenos aprenderán a ser solidarios e misioneIros, ademais de realizar varias actividades deportivas.
O sábado 21 será na Parroquia da Milagrosa e na Misa de 19:30h na Parroquia San Antonio de Padua. E o domingo 22 conclúe esta campaña da Infancia Misioneira en Monforte.

A %d blogueros les gusta esto: