solidariedade

Proxecto para dotar dun motor eléctrico a un pozo en Kivingoni (Kenia)

As Irmás Terciarias Franciscanas do Rabaño de María (Lugo) patrocinan o proxecto “Se non hai auga non hai vida” para dotar dun motor eléctrico a un pozo de auga en Kivingoni Village (Kenia) e participan as parroquias das que se encarga o sacerdote Miguel Ángel Fernández Vilariño. Unha relixiosa da congregación, a irmá Jacinta, coñece ben o tema por ser natural de Kenia e explica así a situación:

“Hai unhas décadas, coa axuda dun misioneiro, montouse un sistema para recoller auga da chuvia, pero acumulábase tanta xente para ir recoller que aínda erguéndose ás 2 da madrugada, ás veces volvíase a casa sen nada tras pasar unha noite enteira agardando a quenda.

“Desde España colaborouse hai uns poucos anos cun pozo e un motor que funciona cun xerador. Por un lado, a xente está bastante contenta con isto porque xa non hai que facer cola, pero non desapareceron todos os problemas, pois pode fallar o xerador e a reparación soe saír cara, ademais de que non sempre hai diñeiro para costear a gasolina do xerador. Cando pasa isto vai buscarse auga onde non é potable.

“Co novo motor eléctrico non só habería auga potable senón tamén máis auga para os cultivos”.

  

Proxecto solidario “Sen auga non hai vida”

O xoves 17 de outubro ás 17 h, preséntase o proxecto solidario “Sen auga non hai vida”, na casa das Irmás Terciarias Franciscanas do Rabaño de María e Irmás Casa Fogar Madre Encarnación de Lugo (rúa Músico Falla, 16).

Solicitante: Miguel Ángel Fernández Vilariño, Sacerdote, Párroco de Conturiz e anexas, e membro do equipo de Pastoral Sanitaria do HULA

Obxectivo: adquisición dun motor eléctrico para un pozo en Kivingoni Village (Kenia) de xeito que as súas xentes poidan gozar de auga potable.

Beneficios que reportaría:

1.- Previr enfermidades intestinais contraídas por beber auga non potable

2.- Combater a desnutrición, xa que coa auga poderanse obter alimentos procedentes de rega das súas pequenas hortas.

3.- Evitar que os nenos falten á escola, xa que sobre eles recae a tarefa de traer a auga desde sitios que están a varios quilómetros, coa posibilidade de chegar á zona e non haber auga abondo.

4.- Abastecer de auga aos fogares deste pobo. Nos fogares é necesario para beber, cociñar, lavar as roupas e o aseo.

5.- Atrasar a desertización do pobo de Kivingoni, no que só chove unha vez cada catro anos.

Contía necesaria para levar a cabo o proxecto: 4.000 €

Cáritas de Sarria organiza unha Merenda solidaria

Cáritas Interparroquial de Sarria celebrará o día 28 na sociedade recreativa A Unión unha Merenda solidaria co fin de recadar fondos para as persoas necesitadas do municipio e a súa contorna.

Os asistentes disfrutarán dunha merenda con bebidas e alimentos doados por numerosos locais colaboradores. Tamén hai actuacións musicais e actividades para os nenos.

A iniciativa celébrase xa desde fai uns seis anos. Na pasada edición congregáronse 300 persoas e colaboraron un centenar de establecementos.

O pasado ano Cáritas Sarria entregou alimentos a 400 persoas e asistiu no seu roupeiro a 200 persoas, ás que repartiu máis de 6.000 pezas.

Solidariedade coa Igrexa universal

O día dos santos Pedro e Paulo é tamén a ocasión na que se lembra especialmente unha iniciativa de solidariedade que leva moitos anos poñéndose en práctica: o Óbolo de San Pedro. É a axuda económica ofrecida polos fieis de todo o mundo directamente ao Santo Padre para soster as obras de caridade da Santa Sé e as funcións dos organismos que colaboran no exercicio do seu ministerio pastoral ao servizo da Igrexa universal. Compartindo profunda e humanamente estes principios, a Santa Sé acollerá cada unha das donazóns que se efectúen. Compartir intencións, valores e o compromiso cara aos máis necesitados cos que cada fiel ha de cumprir cada día.

Proxecto solidario da Parroquia San Antonio de Padua, Lugo

Caritas Parroquial de San Antonio de Padua de Lugo ten en proxecto a construción dun galiñeiro artesanal para unhas 20 galiñas. Este galiñeiro estará situado nun terreo situado en Santiago de Saamasas, nunha eira pertencente á casa de Domingo de Souto que a cede para tal fin.

OBXECTIVOS

1. Xerar recursos para a axuda solidaria ás persoas necesitadas da contorna da Parroquia.

2. Divulgar a acción solidaria que se realiza desde a Parroquia de San Antonio de Padua de Lugo.

3. Estimular iniciativas en beneficio dos desempregados e persoas que viven en precario.

4. Crear un espazo orixinal de encontro e integración para persoas que reciben axuda, no que se fomenten valores como o respecto e o esforzo.

5. Construír utilizando materiais reciclados, na medida do posible.

6. Recuperar os traballos e costumes tradicionais do mundo rural galego como medio para xerar recursos materiais e en especie.

7. Involucrar na construción do galiñeiro ao alumnado do centro escolar máis próximo.

8. Dar a coñecer este proxecto a través da venda dos ovos no mercado local ou noutro lugar adecuado.

REALIZACIÓN

Para levar a cabo este proxecto cóntase cun deseño elaborado polo alumnado do colexio Divino Mestre de Lugo. Así os estudantes coñecen de primeira man e participan activamente neste proxecto solidario. A realización concreta será os meses de setembro e outubro do presente ano 2017.

ORZAMENTO

Calcúlase un investimento total de 1000 euros.

DIVULGACIÓN

O proxecto vincúlase a un reto persoal que se levará a cabo a partir do 17 de xuño de 2017: completar en bici o Camiño de Santiago desde a cidade de Roma. Tres membros do Club Ciclista Melidense unirán dúas cidades emblemáticas, tanto pola súa historia como pola súa influencia social e cultural en occidente. Ademais, son dous destinos únicos de peregrinación. Os membros do club ciclista divulgarán a iniciativa solidaria da Parroquia de San Antonio a través dos seus contactos nas redes sociais.

A %d blogueros les gusta esto: