Mes: Setembro 2017

Seminario Diocesano: apertura solemne do Curso Académico

O domingo 1 de outubro terá lugar a solemne apertura do Curso Académico 2017-2018, do Seminario Diocesano, o Instituto Teolóxico Lucense e o Instituto Superior de Ciencias Relixiosas San Dámaso. 

 Ás 17:00 h. na Capela Maior do Seminario hai unha Eucaristía Votiva do Espírito Santo, presidida polo Sr. Bispo da Diocese, Mons. Alfonso Carrasco Rouco.

Ás 18:00 h na Aula Magna comezará o acto académico:

  • Lectura da Memoria do Curso 2016-2017 por parte da Secretaria do Seminario Diocesano, Montserrat López Vázquez
  • Apertura do Curso polo Sr. Bispo
  • Lección inaugural: «1517-2017. Del conflicto a la comunión», por D. Benito Méndez Fernández, Profesor Titular de Cátedra no Instituto Teolóxico Compostelán. Docente de Teodicea, Eclesioloxía Fundamental e Sistemática, e Cursos do Bienio. Profesor extraordinario de Eclesioloxía no Instituto Teolóxico Lucense.

Máis de 40 seminaristas cursarán no Seminario Menor os diversos cursos da ESO e do BAC, nas súas diversas modalidades. Deles, 25 alumnos son residentes internos no Seminario, e o resto mediopensionistas. Como novidade, este ano o Seminario Menor estrea a xornada única, distribuíndo en horario só de mañá as clases e dedicando as tardes ao estudo, á formación espiritual, ao deporte e a outras actividades extraescolares.

No Seminario Maior vivirán este curso catro seminaristas, que estudan o Bacharelato/Grao de Estudos Eclesiásticos no Instituto Teolóxico Lucense (ITL), afiliado á Facultade de Teoloxía da Universidade Eclesiástica San Dámaso. Ditos estudos están dispoñibles para que se matricule calquera persoa interesada nunha formación filosófico-teolóxica de nivel universitario. Un quinto seminarista, xa diácono, amplía estudos en Madrid e colabora na parroquia da Milagrosa as fins de semana durante a súa etapa pastoral. A eles súmanse como alumnos do ITL, os seminaristas do Seminario Misioneiro Redemptoris Mater (pertencente ao Camiño Neocatecumenal), erixido na Diocese de Lugo. Foron cinco seminaristas no último curso e espéranse novas incorporacións para o presente.

No Instituto Superior de Ciencias Relixiosa San Dámaso estudan, ben todos aqueles interesados na titulación de Bacharelato/Grao en Ciencias Relixiosas (que capacita, entre outras cousas, para a docencia do Ensino Relixioso Escolar ESO/BAC), ben aqueloutros que, coa titulación de Grao en educación infantil ou primaria desexan optar a ser docentes de Ensino Relixioso neses niveis. Ao ser un centro a distancia, acolle alumnos en formación nestes dous ámbitos de todas as zonas da comunidade autónoma.

Por outra banda, no edificio do Seminario Diocesano, que se abre o domingo ao longo do curso, teñen lugar moitos eventos de interese diocesano, como retiros, cursos de formación, convivencias… así como colaboracións diversas con outras realidades. Como mostra, desde fai uns meses o Seminario é o lugar de ensaio da Banda Filarmónica de Lugo, e das súas novas iniciativas: a banda infantil e o coro infantil. O edificio nobre do Seminario segue ofrecendo, na súa segunda planta, o servizo de Casa Sacerdotal para os sacerdotes da Diocese que desexan residir nela.

“Compartindo a viaxe”: campaña de Cáritas en favor dos migrantes

“Compartindo a viaxe”, é o nome da campaña global que Cáritas Internationalis emprende en favor dos migrantes do mundo en atención ao chamamento que en diversas ocasións fixo o papa Francisco en favor dos migrantes. Iníciase o 27 de setembro e durará ata setembro de 2019

É unha campaña de sensibilización pública que promove oportunidades e espazos para que se reúnan os migrantes e as comunidades e compartan historias e experiencias, co obxectivo de fortalecer vínculos entre os migrantes e as comunidades. Promóvese a visión dunha soa familia humana, mundial e unida.

Todo aquel que estea interesado pode unirse á campaña, especialmente persoas con experiencia na emigración, que poden ser invitadas a compartir a súa viaxe, xa sexan migrantes ou comunidades afectadas pola migración.

[Web oficial da campaña]

A quen queres máis: a papá ou a mamá?

Estamos demasiado afeitos aos dualismos e a ter que escoller entre dúas opcións: A quen queres máis, a papá ou a mamá?. Esta é a pregunta típica que lles facemos aos nenos sen saber o dano que podemos provocar na súa inocencia e bondade. O normal é que contesten que queren aos dous. Pero nós, non satisfeitos, volvemos insistir.

No Evanxeo do próximo domingo tamén se nos suscita unha cuestión, que, a primeira vista, parece que tamén adoece de dualismo: “Quen dos dous cumpriu a vontade do seu pai?” Neste caso a resposta é clara. A vontade cumpriuna o que “fixo” non o que “dixo”. Xa saben iso de que “obras son amores e non boas razóns”.

Neste texto evanxélico van ser moitos os que atopen unha xustificación para a súa forma de pensar e o seu estilo de vida, precisamente por ese dualismo do que falaba ao principio. Non vai faltar quen diga que non fai falta rezar (dicir), nin ir a Misa para facer obras boas. Tampouco vai faltar quen diga que os que intentamos rezar e imos a Misa somos os peores porque “dicimos” moito, pero facemos pouco ou nada. Se cadra non lles falta razón, pero tampouco ten por que ser así. Non todo ten que ser dualismo. Precisamente para os cristiáns isto é un reto: que as nosas obras se correspondan coas nosas palabras. As dúas cousas son posibles. Non é necesario escoller nin pelexarnos porque só unha sexa a importante. Non, as dúas son importantes, ¡como non vai ser importante a coherencia!. Pero… por que imos ter que escoller só unha cousa cando podemos escoller as dúas?

Xa que hoxe imos de ditos e refráns sigo con outro máis: Non se pode repicar e andar na procesión. É certo. Hai cousas incompatibles, pero outras non o son. Nós, os cristiáns temos a sorte de poder e deber loar a Deus (rezar, falar con Deus, dicir) e facer o ben e a vontade de Deus ao mesmo tempo. Con outras palabras repetíronnos isto mesmo os Papas Xoán Pablo II e Bieito XVI: “Non teñades medo de Cristo! El non quita nada, e dáo todo”.

Miguel Ángel Álvarez

Tomado da revista dixital Falando Baixiño, nº 159

Moita oración e reiniciar o sistema

Comezo contando algo que me pasa con bastante frecuencia. Moita xente acode a min, non só para auxilio espiritual, senón tamén por problemas informáticos e telefónicos, por chamalos dalgún xeito.

Xa saben: “como se fai tal cousa?”, “non me funciona isto”, “apareceume isto aquí”. Habitualmente son cousas moi sinxelas de arranxar e fágoo sen maior problema. Por iso, cando me preguntan como o fixen, respondo de forma irónica dicindo que hai cousas que só saen con moita oración. Pero o único que fago é apagar e volver acender, ou dito doutra forma, “reiniciar ou resetear”. Se a cousa é moi grave, a intervención ten que ser máis agresiva e hai que restaurar o sistema, volvéndoo aos valores de fábrica. Outras veces hai que formatear ou poñer un disco duro novo ademais de ampliar memoria. É frecuente que os equipos se volvan lentos por virus ou por acumulación de arquivos e aplicacións de todo tipo que non serven para nada. Xa, no peor dos casos, non queda outra alternativa que comprar un equipo novo porque o que tiñamos quedou obsoleto e non cumpre coas esixencias actuais.

Non son experto nin técnico nin científico, pero é fácil pensar que os móbiles, que non se apagan nunca, acaban saturados e fallando. Ata as máquinas necesitan un pequeno descanso ou desconexión para empezar de novo e funcionar correctamente. Trátase de que o sistema poña as cousas no seu sitio.

Outras veces as máquinas acenden mal e prodúcese un fallo no proceso de arranque. Cando isto pasa, a única opción é empezar de novo para facer o proceso completo sen saltarse ningún paso.

Pois se así ocorre coas máquinas que só fan unha cousa e sempre do mesmo xeito, e non teñen sentimentos e alma, pensen agora canto máis as persoas.

Opino que isto mesmo tamén serve para a Igrexa e todos os que a formamos. Todos necesitamos rezar máis, moita oración, e nunca mellor dito, tamén reiniciar o sistema ou restauralo por completo para poñer en marcha con forza a Nova Evanxelización.

Na vida de moitos cristiáns e da Igrexa hai moitas cousas que non funcionan: imos a remolque e cansos, sáltanse pasos no proceso de iniciación, ou non damos os correctos.

Non podemos volver á idade de 5 anos, pero si podemos nacer de novo, como lle dixo Xesús a Nicodemo. Necesitamos retiros, momentos de oración (moita oración), exercicios espirituais para facer un alto no camiño cotián e restaurar os nosos sistemas para comezar de novo e atoparnos de verdade con Xesucristo. Cantas veces para arranxar unha casa en ruínas hai que tirar todo e facela de novo?

Non é nada distinto ao que fixo Xesucristo: “Destruíde este Templo e en tres días levantareino […] Pero El referíase ao Templo do seu corpo” (Xn 2, 19-ss). Morrer ao home vello e resucitar ao home novo.

Esta tarefa pódenos asustar un pouco por medo a perder o que xa temos (case tanto como perder os contactos do móbil). Pero se non o facemos, corremos o perigo de que a casa termine sendo unha chea de lixo cuberto de silveiras.

 

Miguel Ángel Álvarez Pérez

Párroco de San Froilán

Inicio do curso do Seminario e da catequese

O pasado domingo 17 de setembro tivo lugar no Seminario a presentación do curso académico 2017-2018 que terá por lema E non temas o imposible

Este ano a proposta é que se dea un paso de confianza e que se mire ao presente e ao futuro con ollos de esperanza. Cansos dun mundo que sempre canta as peores accións, invítase a dicir que si a Deus, a asumir o reto que supón deixar a Deus actuar na vida de cada un, a aceptar que El pode facer posible o que a un lle parece imposible.

En fin, invítase a rezar, soñar, arriscar, non pechar portas, abrir a vida, saír ao mundo, ver aos máis pobres.

Pola súa parte, as delegacións de Catequese de Galicia elaboran o material para o curso catequético 2017 – 2018 nas parroquias. Trátase de vivir este labor pastoral no dinamismo e creatividade que requiren os tempos actuais. E tamén manterse en comuñón como catequistas. O lema deste curso é Parroquia, familia que inicia na fe.

 O 2 de outubro ás 19h no Seminario será o encontro de inicio de curso dos catequistas

[Materiais curso catequético 2017-18]

A %d blogueros les gusta esto: