Peregrinación xuvenil a Fátima

Durante este mes de xaneiro permanece aberto o prazo de inscrición para a peregrinación xuvenil a Fátima que organiza Xóvenes polo Reino de Cristo do 9 ao 13 de febreiro. Poden participar mozos de 15 anos (cumpridos ata o 9 de febreiro de 2018) a 35 anos inclusive.

Para inscribirse non pode facerse de xeito individual, senón a través dunha parroquia ou movemento. No caso de Lugo a través da Delegación Diocesana de Mocidade.

Prezo: 85 € (non inclúe o custo do autobús).

[Inscrición]

Festa de San Tomé no Seminario

O 26 de xaneiro o Seminario Diocesano de Lugo, o Instituto Teolóxico Lucense e a extensión a distancia do Instituto Superior de Ciencias Relixiosas San Dámaso celebran a San Tomé de Aquino, cos seguintes actos:

– Ás 19h na Aula Magna, conferencia do profesor no Instituto Teolóxico Divino Maestro de Ourense, José Ramón Hernández Figueiredo (imaxe esquerda), que falará dos antecedentes históricos modernos das conferencias episcopais (séculos XIX e XX).

– Ás 20 h na Capela Maior, Eucaristía presidida polo Bispo, Mons. Alfonso Carrasco Rouco

Celebración de Don Bosco

No Colexio Divina Pastora

A segunda quincena de xaneiro dedícase no Colexio Divina Pastora de Lugo a coñecer mellor a figura de Don Bosco a través de concursos, xogos…

O 26 de xaneiro ás 19:30h celébrase o Día do Carisma Salesiano para as familias.

Entre os días 29 e 31 terá lugar o triduo en honor a San Xoán Bosco na igrexa da Milagrosa ás 19:30h

O 30 de xaneiro, Día Escolar da Non Violencia e da Paz.

O propio día de San Xoán Bosco, o 31 de xaneiro, haberá eucaristías, degustaciones, festivais, torneo.

Finalmente, entre o 5 e o 7 de febreiro preséntanse ás familias os festivais solidarios (os dous primeiros días no Auditorio Gustavo Freire e o día 7 no Colexio).

No Colexio María Auxiliadora

O día 31 desenvólvense as seguintes actividades:

  • Eucaristía en San Francisco Xavier (Primaria) e o Bo Pastor (Secundaria)

  • Oración na capela do Colexio (Infantil)

  • Xogos (todos os niveis)

  • Festival Don Bosco en Primaria (9h) e Secundaria (11:45h)

O 2 de febreiro, estes dous centros escolares, celebran o Día Escolar da Non Violencia e da Paz, conxuntamente con outros centros concertados de Lugo. Ás 11:30h haberá un Xesto pola Paz na praza de Santa María.

Xubileu das persoas que se dedican á protección animal e da natureza

O domingo 21 de xaneiro celebrouse no Santuario do Corpiño o primeiro Xubileu do 2018, o das persoas que se dedican á protección animal e da natureza.

Ás 11:50 h, iniciábase a peregrinación cara á Porta Santa, logo de impartir a bendición do peregrino o Rector do Santuario a gran número de devotos, chegados de diversos lugares: Poio, Ribadavia…

Ás 12:00 h, tivo lugar a Eucaristía, na cal cantou a coral de Pontedeva (Ourense). Ao terminar impartiuse a bendición a todos os presentes, incluíndo os animais que recibiron a bendición no exterior do Santuario.

O próximo Xubileo será o 28 de xaneiro, dedicado aos medios de comunicación.

A programación será como nos anteriores xubileus (se o tempo o permite):

Ás 11:00 h, Saída cara á Igrexa Parroquial de San Pedro de Losón para realizar desde alí ata o Santuario o Camiño dos pastorciños

Ás 11:35 h, impartirá a Bendición a todos os Peregrinos e devotos na Carballeira do Santuario

Ás 11:40 h, comezo da procesión cara á Porta Santa doSantuario.

Ás 12:00 h, Eucaristía por todas as persoas que se dedican a transmitir a información. Ao terminar se impartirá a bendición a todos os presentes.

Cambios acaecidos e… por acaecer

Despois das pasadas eleccións catalás do 21 de decembro hai comentaristas e cidadáns que din que a situación volve a ser como antes. Pero iso non é verdade pois moitas cousas cambiaron considerablemente. Non estamos no punto de partida, senón que o acaecido ponnos nunha realidade distinta. Ademais, loxicamente seguirán producíndose cambios a curto prazo.

1) Na vida sociopolítica xa se produciron diversos cambios e entre eles eu quero resaltar os seguintes:

a) O primeiro é constatar que baixou moito o temor a aplicar o artigo 155 da Constitución. Mesmo nalgúns grupos políticos desapareceu por completo ese temor. Xa tódalas autonomías saben que existe ese artigo e que se pode aplicar sen maiores dificultades.

b) Por primeira vez o Goberno Central destituíu a un Goberno Autonómico e, por tanto, hai precedente para poder facelo máis veces. Este feito queda xa na memoria colectiva para ben e para mal. Ademais, pódese disolver un Parlamento Autonómico e convocar novas eleccións.

c) Case todos sabiamos que non ían ter apoio da Unión Europea, da ONU nin doutros países como anunciaban. Agora é claro para cataláns e demais españois que ese apoio non existe.

d) Tamén se sabía que se irían moitas empresas, aínda que as autoridades catalás preconizaban que non marcharía ningunha e mesmo virían instalarse moitas. Agora é evidente que as empresas marchan neses procesos.

Engadiría un pequeno comentario ao dato da obediencia da Administración Autonómica ao Goberno Central despois do 155: Penso que iso non debe sorprender, pois as persoas cando gañan 20.000 € ao ano ou máis, en xeral non están dispostas a arriscar a súa estabilidade por aventuras. Queren manter o seu nivel de vida e coa independencia había serias dúbidas. A medida que aumenta o nivel de riqueza aumenta xeralmente o conservadurismo do que se ten. Como isto non está ben visto, para tranquilizarnos e manipularnos a conciencia, fannos pasar por progresistas propostas políticas que son atentados contra a vida…

2) Por outra parte a curto prazo penso que cambiarán algunhas cousas. Sinalo dúas:

a) Antes de que pasen 5 anos PSOE e PP deberán apoiarse nos Orzamentos Xerais do Estado. Aínda que non se decatasen polo de agora é evidente que, o feito de que nunca o fixesen, perxudícaos como partidos, perxudica aos seus votantes e tamén ao conxunto dos españois en orde a un desenvolvemento equilibrado do país.

Se no pasado, en vez de pactar os Orzamentos cos partidos nacionalistas, tiveran pactado coas federacións rexionais do PSOE ou PP (incluídas as de Cataluña e Eukadi)… debilitarían aos nacionalistas e fortaleceríanse eles. Serían eles os que levan algo para as diversas comunidades autónomas e non os nacionalistas (Isto axuda a entender os resultados do 21 de decembro pois os nacionalistas case sempre levaron algún beneficio para a Autonomía). O mesmo vale para Cidadáns e Podemos.

b) Outro cambio, que xa se empeza a percibir, é que cos programas educativos non se controla a poboación en sociedades abertas. Tamén Franco quixo controlala, e cara o final do franquismo a Universidade e os Institutos eran da ideoloxía totalmente contraria ao réxime. Vén ser o que se chama a lei do péndulo da historia. Pero que quede claro que con isto non quero cuestionar a importancia fundamental da educación.

3) Os apartados 1 e 2 anteriores están dentro do que é a democracia representativa vixente e homologada na Unión Europea. Non se debe esquecer que os Gobernos teñen a supervisión política, económica e xurídica da UE, así que as Autonomías ou Rexións téñena dos Gobernos (esixencia tamén da UE).

Outra cuestión sería proxectar o qué facer para apostar por unha maior xustiza e democracia tendo presente que somos unha única humanidade.

É certo que temos que afrontar a solución dos problemas dos empobrecidos e famentos, dos refuxiados e inmigrantes mediante unha solidariedade universal. O Mediterráneo ten que deixar de ser un gran cemiterio. Hai que pór fin á violencia e ás guerras, á trata de persoas, á escravitude infantil… Aquí debe estar o compromiso ético e político máis importante. As accións guiadas polo egoísmo agravan a situación dos empobrecidos.

Antón Negro

Delegado Episcopal de Cáritas

A %d blogueros les gusta esto: