Vida e actualidade da Diocese de Lugo
O Movemento Bíblico de Lugo invita a vivir un encontro pascual en Chantada o sábado día 6 de abril. Ás 11 da mañá sae un autobús diante da parroquia de San Francisco Xavier, rúa Roi Xordo 6, (Lugo). O regreso será ás 6, 30 h da tarde aproximadamente.
Para información, dirixirse antes do xoves 4 de abril ao correo movimientobiblicolugo@gmail.com
Recentemente, nun medio de comunicación social de alcance nacional, escoitei unha entrevista a un señor, ao que trataban de teólogo, e que criticaba e xustificaba á vez, a algúns dirixentes de Israel respecto ao actual conflito israelí-palestino, fundamentándose en textos bíblicos do Antigo Testamento. Este feito, unido á celebración do Domingo da Palabra de Deus (celebrado en toda a Igrexa o pasado 21 de xaneiro) e instituido polo Papa Francisco o trinta de setembro de 2019 a través da carta apostólica Aperuit illis, é o que me motivou a reflexión deste artigo. É necesario devolver a Biblia á sociedade e ao pobo crente. Devolvela non quere dicir que está ausente. O que realmente hai que devolver é a capacidade de comprendela, de saber lela e interpretala segundo os canons da eséxese e da boa hermenéutica.
A Biblia é o libro máis vendido da historia. Segundo datos actuais vendéronse xa máis de 3.900 millóns de copias en todo o mundo, o que a converte no libro máis vendido de todos os tempos. Probablemente xamais haberá un libro que supere á Biblia en vendas xa que os demais (Don Quijote ou Harry Potter, por exemplo) están a unha distancia practicamente inalcanzable.
O Concilio Vaticano II deu un gran impulso ao redescubrimento da Palabra de Deus coa Constitución Dogmática Dei Verbum. Naquelas páxinas que sempre merecen ser meditadas e vividas, emerxe con claridade a natureza da Sagrada Escritura, a súa transmisión de xeración en xeración, a súa inspiración divina que abrangue o Antigo e o Novo Testamento e a súa importancia para a vida da Igrexa. Segundo o Papa Francisco, a celebración do domingo da Palabra de Deus expresa un valor ecuménico, porque as Escrituras indican aos que se poñen en actitude de escoita, o camiño a seguir para chegar a unha auténtica e sólida unidade. E insiste: estas palabras conteñen grandes ensinos, por iso non poden ser soamente patrimonio dalgúns, e moito menos unha colección de libros para uns poucos privilexiados. A Biblia é o libro do pobo de Deus que ao escoitalo pasa da dispersión e da división á unidade. Este carácter de convocatoria da Santa Biblia e vínculo de comuñón da Igrexa católica o pobo experiméntao especialmente na Eucaristía. A homilía ten aquí unha función específica: contribuír a explicar o sentido dos textos proclamados. A comprensión e a interpretación desde a escoita atenta, pero tamén desde o estudo, son fundamentais. Comprender isto non é doado. A súa aprendizaxe supón polo menos cinco cursos de estudos de teoloxía xa que as materias relacionadas coa Biblia ocupan maioritariamente os Estudos Eclesiásticos.
Na Diocese de Lugo o Movemento Bíblico Diocesano adquiriu gran importancia grazas ao gran escriturista e especialista no tema J. Antonio González García, fundador do movemento bíblico, e ao Bispo Fr. José Gómez, gran impulsor das viaxes de estudos a Terra Santa. Por todo iso é importante preocuparnos por lela, comprendela correctamente e vivila sendo capaces de distinguir as concepcións condicionadas polo tempo das verdades sempre actuais e nunca perecedoiras. Así evitaremos a lectura salvaxe e interpretacións destrutivas froito da ignorancia ou do descoñecemento. Coñecer a Escritura é coñecer a Cristo e gustar en plenitude a alegría que brota da verdade.
J. Mario Vázquez Carballo
Vicario Xeral da Diocese
O tema do curso 2023-2024 que organiza o Movemento Bíblico de Lugo será: Introdución ao Antigo Testamento. AS GRANDES EXPERIENCIAS RELIXIOSAS DO ANTIGO ISRAEL. En oito sesións adquírense coñecementos básicos da Biblia, achegándose ás grandes experiencias relixiosas do pobo de Israel e ás súas diferentes tradicións literarias.
A presentación do curso será o mércores 25 de outubro ás 5 da tarde nas aulas de teoloxía do Seminario.
Os interesados poden elixir a forma de participar presencial, en liña ou mixta.
Os encontros presenciais serán nas aulas do Seminario os mércores penúltimo ou último de cada mes, de 17: 00 a 18: 30 h. O encontro presencial será unha plataforma de diálogo e traballo colaborativo, profundizando na realidade comunitaria da Palabra de Deus, a escoita compartida, a comunicación de experiencias, o estudo de textos, debates.
As persoas que non teñan posibilidade de acercarse aos encontros no Seminario farán o estudo a través de Moodle e seguirán o encontro en liña.
Aqueles que fagan o curso a través de Moodle e tamén poidan acercase aos encontros seguirán o modelo de participación mixto.
Preténdese favorecer unha aprendizaxe personalizada, segundo os intereses do alumno, que será autónomo, consciente da súa propia aprendizaxe.
O Movemento Bíblico de Lugo convida a seguir a aventura do Evanxeo de Marcos, coa certeza de que resultará interesante descubrir o Evanxeo máis primitivo, en toda a súa sinxeleza, pero tamén en toda a súa riqueza. Foi un dos monumentos máis primitivos da nosa fe.
A través de Internet o xoves 23 de febreiro ás 17 h haberá un seminario en liña sobre o Evanxeo de Marcos
Os interesados deben comunicarse con: movimientobiblicolugo@gmail.com
O 17 de xaneiro ás 18 h no salón de actos do Seminario presentouse a 4ª edición da Biblia.
O primeiro en intervir foi o vicepresidente de SEPT e responsable da edición Silvestre Gómez Xurxo, que valorou o traballo de Xosé Antonio Salgado Agromartín: “Fixo a tradución do libro de Daniel, que ten as súas dificultades por cuestións de uso das linguas. Desde o punto de vista literario, podo dicir que fixo unha tradución fermosísima e unha introdución tremendamente aclaratoria. Teño un pero que poñer ao labor de Xosé Antón Salgado: a min a pena que me dá é que non tivese traducido máis libros. Dígoo de corazón e congratúlame dicilo publicamente”.
O biblista e tradutor Xosé Antonio Salgado Agromartín comentou as dificultades da tradución: “O libro de Daniel é un libro antiquísimo, pois foi escrito alá polo ano 165 a. C. e cun xénero literario -apocalipse- a base de símbolos, que eran coñecidos polos lectores inmediatos, non así para nosoutros, que temos unha cultura moi distinta”.
Xosé Antonio Salgado refrescou os seus coñecementos das tres linguas bíblicas: grego, hebreo e arameo; repasou os datos históricos que rodean ao libro de Daniel.
Tamén falou da necesidade de promover a lectura da Biblia.
O Secretario Xeral de Política Lingüística da Xunta Valentín García Gómez, anunciou que dende o Goberno galego vai abrirse unha serie de publicacións de textos litúrxicos en contido dixital para que estean a disposición de todas as persoas que queiran acceder á Palabra de Deus ou que polo seu labor como cregos, catequistas… necesiten acceder aos textos precisos para poder oficiar, axudar aos catequizandos… en calquera parte do mundo no noso idioma. Neste ano 2023 publicarase o Misal galego en aberto en internet.
Clausurou o acto Mons. Alfonso Carrasco, que entre outras cuestións, referiuse ao significado que ten a Biblia para Galicia: “Acompaña a histora deste pobo, que chegou ao ano 1965 con forza suficiente para dicir: vamos a dar este paso culturalmente tan grande, tan relevante, como é a tradución ao galego porque vemos a importancia do galego e da Biblia e facemos un traballo enorme para facer esta tradución. Este pobo está acompañado pola Biblia desde que ten memoria, dende que se escribe en latín nas terras de Galicia, e ata agora, aquela realidade inicial e ao longo da historia, aquela realidade de pobos que foi a que constituíu a historia do que hoxe chamamos Galicia, estivo sempre acompañada pola Biblia.”