Xornada de formación sobre o Directorio para a Catequese

O sábado 28 de xaneiro de 10 h a 13 h a Delegación para a Educación na Fe organizou unha xornada de formación sobre o Directorio para a Catequese.

O Delegado episcopal para a educación na fe, Alberte Leiva, saudou aos presentes, “sempre dispostos a colaborar na misión de contaxiar no medio das familias, parroquias e colexios o bo ambiente do Evanxeo de Xesús. Coñecer e actualizarse en pedagoxía, estar ao tanto do que nos di a Igrexa será como unha vara na que apoiarnos para levar adiante e con éxito a encomenda que o Señor Xesús pon nas nosas mans”

E o delegado de Catequese de Santiago, Miguel López Varela, presentou o Directorio para a catequese. Comezou sinalando que “se non facemos catequese, a Igrexa deixa de ser Igrexa… A catequese está en diálogo co que está a acontecer no mundo”.

Desde o Vaticano II houbo 3 actualizacións do Misal Romano; a Eucaristía é importante, polo que cómpre actualizarse. Como a Igrexa tamén considera que a catequese é importante, preocupouse de ir actualizándose e foi elaborando sucesivamente tres directorios. O actual tamén tivo 3 etapas no seu proceso de redacción e o texto final estrutúrase en 3 partes. As claves de lectura son máis: cristocéntrica e eclesiolóxica, pneumatolóxica, misioneira e kerigmática, teleolóxica, catecumenal, comunitaria, dialóxica, cultural e da inculturación.

A alegría de ser catequistas

Bota a andar un novo curso de catequese e querémolo emprender con moito ánimo. Lembrade: o alento do Señor Xesús precédenos e empúrranos dende sempre.

Este curso teremos como lema “A alegría de ser catequistas”. Esta frase recolle a esencia daquelas persoas que ano tras ano se entregan con xenerosidade a misión de transmitir a fe nas nosas parroquias. Unha alegría que brota do encontro co Señor. O Papa Francisco convídanos a unha nova etapa de evanxelización marcada pola alegría (Evangelii gaudium)

Que alegría ser catequistas chamados polo mesmo Señor Xesús!
Nas nosas mans está a encomenda de axudar a cativos e familias a medrar en amizade con Xesús e no coñecemento da Igrexa.  Ben certo, atoparemos atrancos coma a saturación de actividades, os horarios e as presas… mais non nos ha faltar o Espírito que vive na comunidade e nos inspira e move á acción.

Que alegría ser catequistas que prestan as súas capacidades e o seu tempo nas nosas comunidades cristiás! Esta antiga vocación renova decote na Igrexa o compromiso de proclamar a nosa fe, de pasar uns a outros o testemuño pascual: Cristo Vive!

Que alegría ser catequistas e celebrar collidos das mans a presenza do Deus Amor! É o Señor quen nos convida a comer e beber o pan e o viño da alegría e da fraternidade.

Que alegría ser catequistas que coidan os pequenos detalles! A fe emerxe das cousas pequenas de cada día: do acoller, do empregar palabras sinxelas e doces, do ter xestos de complicidade coas familias, do sorrir, do collerse das mans…

Que alegría ser catequistas e contaxiar a alegría do Evanxeo!

Departamento de Catequese

Delegación Episcopal para a Educación na Fe da Diocese de Lugo

[Folleto explicativo do cartel e suxestións para a 1ª reunión]

Encontro – retiro de catequistas

O Departamento de Catequese da Diocese organiza o sábado 9 de abril de 10 h a 13:30 h na Parroquia do Bo Pastor (Lugo) un encontro – retiro de catequistas. Faise baixo o lema “Camiñando xuntos cara á Pascua”.

A Diocese agradece a cada unha das persoas que leva adiante a catequese e desexa infundirlles ánimo, porque o seu ministerio é fermoso e esencial para as comunidades. Pola súa parte, o papa Francisco preséntalles un reto: “Catequistas creativos, que atopen “novos alfabetos” para anunciar o Evanxeo e non se mostren “cansos e repetitivos”.

Preparación do novo curso catequético

A situación actual permite retomar e continuar coa actividade catequizadora na parroquia, que é a casa común de todos os cristiáns e a casa da catequese por excelencia. Alí os nenos teñen a oportunidade de vivir e aprender, xunto con todos os crentes e cos catequistas, a alegría da fe e de crer en Xesús.

Vai seguir apoiándose e dando continuidade á experiencia nos fogares. Porque a catequese sempre comeza na casa. O fogar e a familia é o primeiro ámbito natural de crecemento e maduración da fe e, nel, os pais e avós son os primeiros catequistas.

O Equipo de Catequese de Galicia axudará a párrocos e catequistas a asegurar esta continuidade da catequese nas parroquias.

[Orientacións sanitarias e pedagóxicas]

[Explicación de lema e cartel]

Instituído o ministerio laical de catequista

Desde esta semana queda instituído o ministerio laical de catequista a través da carta apostólica en forma de “motu proprio” Antiquum ministerium do Papa Francisco, cuxo esquema é o seguinte:

1. “O ministerio de catequista atópase xa nos escritos do Novo Testamento”

2. “Recoñécese este servizo como unha expresión concreta do carisma persoal”

3. “Homes e mulleres animados por unha gran fe e auténticas testemuñas de santidade que, nalgúns casos, foron ademais fundadores de Igrexas e chegaron mesmo a dar a súa vida”

4. “O rico ensino do Concilio Vaticano II impulsa unha notable renovación da catequese”

5. “Fidelidade ao pasado e responsabilidade polo presente son as condicións indispensables para que a Igrexa poida levar a cabo a súa misión no mundo”

6. “O catequista é ao mesmo tempo testemuña da fe, mestre e mistagogo, acompañante e pedagogo que ensina en nome da Igrexa”

7. “O ministerio laical de catequista dá maior énfase ao compromiso misioneiro, sen caer en ningunha expresión de clericalización”

8. “Requírese que estean dispostos a exercer o ministerio onde sexa necesario, e animados por un verdadeiro entusiasmo apostólico”

[Ler carta apostólica do Papa]

A %d blogueros les gusta esto: