Misioneiros: “Aquí estou, envíame”

Hai uns meses, durante o confinamento, un famoso ciclista italiano, Davide Martinelli, presentouse voluntario no seu pobo de Lodetto para repartir medicamentos e comida entre as persoas necesitadas, especialmente os anciáns que non podían saír dos seus fogares. As súas palabras dino todo: “Teño unha bicicleta, dúas pernas agora pouco adestradas e unha mochila. É unha honra poder ir á farmacia a recoller medicamentos para unha parella de anciáns”. Este xesto, unido a outros moitos, lémbrannos que hai persoas decididas a facer das súas vidas un canto de amor aos demais e compromiso cos pobres.

Entre estes cantores están os misioneiros. Moitos deles están á fronte de comunidades onde a covid cebouse especialmente coa xente. Pensemos en Perú, Brasil, India, Bolivia, Sudáfrica… e tantos outros países onde, a esta pandemia debemos engadirlle a fame, a guerra ou a violencia, entre outras pragas. Que fan os misioneiros? Sobre todo, acompañar, non deixar soa á xente nestas circunstancias tan complicadas, facerse próximo e infundir esperanza. Os misioneiros están á fronte de comedores sociais, roupeiros, dispensarios, hospitais, escolas, e nas súas parroquias predícase unha mensaxe de amor moi necesaria nestes tempos: Deus non nos deixa sós, o seu amor segue sendo a forza que sustenta á humanidade a mirar o presente cun compromiso en favor dos pobres e o futuro con esperanza.

Un misioneiro sabe que o Evanxeo non pode ser virtual, pois Deus non nolo fixo chegar virtualmente desde o ceo, senón que se encarnou; sabe que o amor non coñece fronteiras, pois Deus non fai distinción, senón que todos somos os seus fillos. Viven a mesma vida que vive a xente: se o pobo ten que estar confinado, eles tamén o estarán, se enferma, eles tamén enfermarán; se pasa fame, eles faranse os máis pobres; se sofre a violencia, poranse diante para defendelo, sabendo que a van a sufrir eles. A todo iso móvelles a fe no Deus da vida e o amor aos pobres deste mundo. Responden “aquí estou” á chamada permanente de Deus: “A quen enviarei para aliviar o sufrimento dos meus fillos?”.

O Domund lémbranos que os misioneiros continúan acompañando, infundindo ánimo e esperanza, anunciando o Evanxeo e sementando fraternidade. Todos os cristiáns estamos chamados este día a alzar a nosa oración agradecida e a prover unha axuda económica para que poidan continuar coa súa misión. É un pequeno xesto de fe, humanidade e fraternidade que nos lembra que o noso próximo é todo aquel que necesite axuda, sen que a distancia, a relixión ou a cor da pel sexan unha dificultade.

Non sei se Davide Martinelli é crente ou non. O seu pequeno xesto de humanidade, unido ao de tantos outros e ao dos misioneiros, devolven a esperanza nesta humanidade. Hai futuro mentres sigamos sementando Evanxeo e humanidade no corazón das xentes e sigamos respondendo: “Aquí estou, envíame”.

Jesús Manuel Santiago

Delegado de Misións. Diocese de Lugo

[Artículo en castellano]

Actividades de difusión misioneira

Concurso Infancia Misioneira

Con motivo da celebración da Xornada de Infancia Misioneira 2019, cuxo lema é Con Xesús a Belén. Que boa noticia!, Obras Misionais Pontificias e o Secretariado de Infancia Misioneira convocan o concurso: “Conta a noticia! Crea a túa revista”.

Trátase de que cada participante sexa director, redactor ou maquetador da súa propia revista anunciando a Boa Nova de que Xesús xa está entre nós.

Poderán participar nenos de educación primaria, en equipos de 2 a 6 persoas, que antes do 24 de decembro presentarán as revistas na Delegación Diocesana de Misións de Lugo. Nesta fase diocesana escolleranse os traballos que se enviarán a Obras Misionais Pontificias para participar na fase nacional do concurso.

[Bases]

Convivencia de animación misioneira

O Instituto Español de Misións Estranxeiras (IEME) organiza unha Convivencia de Animación Misioneira en xaneiro (días 7 – 10) dirixida a sacerdotes diocesanos, diáconos e seminaristas en etapa de pastoral para animar entre eles o espírito misioneiro e que este espírito contaxie tamén os plans e programas pastorais.

Obxectivos concretos:

  • Compartir a Pastoral Xuvenil á luz do Sínodo.

  • Coñecer experiencias e traballo da Igrexa con mozos, aquí e en misión.

  • Reflexionar sobre o fenómeno xuvenil no anuncio misioneiro do Evanxeo.

[Programa]

Domund. Cambia o mundo

 

Este é o lema do Domund deste ano que celebramos en outubro, co seu cénit o terceiro domingo do mes coa colecta en favor das misións.

Agora ben, o Domund non se centra exclusivamente en recoller unha serie de donativos -cada vez menor, por certo- en favor das misións. Nace ao amparo das Obras Misionais Pontificias (OMP), en concreto da Obra Propagación da Fe, fundada no século XIX por unha muller, Paulina Jaricot, quen decidiu crear unha rede de axuda ás misións para fomentar a colaboración con todas as Igrexas do mundo e as súas necesidades. Pío XI, en 1922, elevouna a categoría pontificia e púxoa baixo o seu amparo, facendo a toda a Igrexa partícipe de cáusaa misioneira.

O Domund deste ano é especial por dous motivos:

En setembro falecía Anastasio Gil, Director Nacional de OMP en España. Foi o artífice da renovación desta institución no noso país. A Igrexa española débelle moito a este home. Entre os seus logros estivo facer moito máis transparente a cuestión económica, conseguir unha cobertura legal e médica para os misioneiros, achegar as OMP a cada recuncho xeográfico de España, unir a todas as congregacións misioneiras, organizar unha profunda e seria formación misioneira… Anastasio Gil modernizou esta institución, para que o labor dos misioneiros sexa coñecido en toda a sociedade española e a Igrexa siga sosténdoa. Conseguiu que as OMP de España non sexan só unha institución ao servizo da misión, senón unha gran familia onde cada membro considérase responsable da misión, onde todos nos axudamos e animamos, unha familia que se alegra coas boas noticias e que chorou ante a morte do seu pai, porque iso é o que era Anastasio para todos os que formamos OMP.

Por outra banda, estamos na antesala do mes misioneiro proclamado polo Papa Francisco para outubro do ano que vén. Celebraranse os 100 anos da primeira encíclica enteiramente misioneira, a Maximum illud de Benedito XV. O propio Anastasio pediunos en xuño que preparemos desde agora este gran acontecemento para a Igrexa.

Benedito XV escribía a Maximum illud porque a constitución das distintas Obras Misionais, xurdidas ao longo do século XIX e XX, puñan de manifesto que non pode haber ningún cristián sen unha permanente preocupación polas misións. E pedía que se dese prioridade á oración, á esmola, á promoción de vocacións misioneiras nos seminarios e ao traballo das OMP. Cen anos despois, estas catro prioridades continúan sendo unha tarefa na nosa Igrexa, e debemos preguntarnos como podemos realizalas hoxe.

Domund. Cambia o mundo. Entre todos podemos cambiar o mundo. Para iso, debemos pór ás OMP nun lugar prioritario da pastoral da Igrexa e apoiar coa oración, a esmola e a promoción de vocacións misioneiras o labor dos misioneiros. Ese era o desexo de Anastasio Gil. Hoxe, desde o ceo, segue apoiando o labor das súas amadas OMP.

Jesús M. Santiago

Delegado de Misións da Diocese de Lugo

Encontro das Delegacións de Misións en Lugo

O pasado sábado 6 de outubro as Delegacións de Misións galegas tiveron un encontro na Parroquia San Francisco Xavier (Lugo). Acudiron misioneiros, familiares e grupos de animación misioneira. O misioneiro xaveriano Rolando Ruíz deu inicio ao encontro cunha conferencia sobre o lema do DOMUND deste ano: “Cambia o mundo”. Despois, en distintos grupos sacáronse  conclusións sobre a conferencia. Nun deses grupos a irmá Adelaida, misioneira do Divino Mestre, que estivo en Camerún, e que proximamente irá á República Democrática do Congo, comentou que os misioneiros de vangarda, os que están nas misións, non serían nada sen os misioneiros de retagarda, que animan a seguir o seu labor, a non sentirse tan sós e son os que durante todo o ano axudan no labor misioneiro desde aquí.

Á hora da comida puido comprobarse a arte culinaria colombiana, grazas a un matrimonio da Parroquia.

Na sobremesa houbo un tempo de diversión co mago lucense David Méndez, e un compañeiro de León.

A media tarde celebrouse a Eucaristía lembrando a todos os misioneiros.

Finalmente, pasouse un vídeo sobre Anastasio Gil, director nacional de Obras Misionais Pontificias, falecido recentemente, e que acompañara o pasado DOMUND a todas as Delegacións galegas co seu gran espírito misioneiro.

Encontro de misioneiros, familiares e grupos de animación misioneira de Galicia

O próximo día 6 de outubro, ás 11:00 h. na Parroquia San Francisco Xavier (Lugo), haberá un encontro-convivencia de misioneiros, familiares e grupos de animación misioneira das dioceses galegas para compartir o labor dos misioneiros nados en Galicia, con motivo da campaña do DOMUND 2018. O horario da xornada é o seguinte:

11:30 h. Conferencia de Rolando Ruíz Durán, misioneiro xaveriano, en torno ao lema do Domund deste ano: “Domund. Cambia o mundo”.

13:00 h. Traballo en grupos

14:30 h. Comida.

16:30 h. Amenizaranos a velada David, un mago de Lugo.

17:15 h. O delegado de Santiago presentará un vídeo como homenaxe ao Director Nacional, Anastasio Gil, falecido recentemente, e lembraranos “O DOMUND AO DESCUBERTO” que tivo lugar o ano pasado en Galicia.
Farase unha presentación do cartel do DOMUND deste ano e explicarase que son e como funcionan as Delegacións de Misións.

18:30 h. Eucaristía presidida por D. Juan Antonio Fraile, misioneiro comboniano, que estivo durante 22 anos na República Democrática do Congo.

A %d blogueros les gusta esto: