Primeiros actos en Lugo da Semana Santa

Venres 16 ás 20:30h no Salón Rexio do Círculo das Artes de Lugo: Pregón de Joaquín María García Díez, que foi alcalde de Lugo. Previamente ao pregón, o Orfeón Lucense, dirixido por Marcos Fernández Mosquera, ofreceu un concerto no que interpretou as seguintes obras:

1. SICUT CERVUS (Palestrina)

2. DULCIS CHRISTE (Graccini)

3. IN MONTE OLIVETI (Juozas Naujalis)

4. O CRUX AVE (Rihards Dubra)

5. NON NOBIS DOMINE (Burrows)

Organista: Luis Varela Castiñeira

Sábado 17 na Catedral de Lugo “III Concerto de Música Sacra” a cargo da Banda Filharmónica de Lugo, dirixida por Iván Martínez Sabio, co seguinte programa:

Marcha para os funerais da raíña Mary de H. Purcell (entrada e bis)

1. Cantata 147, de J. S. Bach

2. Ecce Sacerdos, de A. Bruckner

3. Réquiem, de D. Maslanka

4. Hosanna in Excelsis, de O. Navarro

6. La Sangre y la Gloria, de A. Lozano

5. La Madrugá, de A. Moreno

7. Cordero de Dios, de R. Dorado

A fe dun pobo

Para axudarnos a comprender e vivir mellor esta forma de “piedade popular” que é a celebración da nosa Semana Santa, pode ser útil escoitar de novo ao Papa Francisco, que, a este respecto, insiste en lembrarnos que o Evanxeo ha de encarnarse sempre nun pobo e nunha terra, nunha cultura; de feito, en moitas terras e en moitas culturas. Porque a cultura non se reduce a folclore; senón que abarca a totalidade da vida dun pobo, a súa forma de relacionarse con todas as cousas, cos homes e con Deus. A dinámica propia da Encarnación é a inculturación no Pobo de Deus nun tempo e nun lugar determinado.

Subliña así Francisco, en continuidade co Vaticano II, o protagonismo do Pobo de Deus, da experiencia vivida de todos os seus membros, dunha fe aberta ao mundo enteiro e a todas as culturas.

Neste horizonte habemos de entender tamén nós esa gran expresión de “relixiosidade” popular que é a tradición lucense da Semana Santa. Non se trata simplemente dun conxunto de exercicios piadosos, complementarios aos grandes xestos litúrxicos de realización da fe, senón dunha forma de vivir o propio ser cristián en todas as súas dimensións, privadas e públicas, e de manifestar o propio amor polo Evanxeo.

Valoremos, pois, as celebracións da nosa Semana Santa como a expresión vital dun Pobo cunha identidade precisa e concreta, que non se celebra a si mesmo, senón que ten no seu centro e no seu corazón ao Señor Xesús e a fe nel, cuxos pasos no camiño da Paixón honra, medita e pon ante os ollos de toda a nosa cidade: a súa entrega na Última Cea, o seu sacrificio na cruz, a Caridade do seu Corazón, acompañado sempre pola Santísima Virxe María, a súa Nai, unida a El tamén nas maiores dores, a soidade e a angustia, ata o día da Resurrección gloriosa.

O conxunto de actos e procesións que nos propoñen estes días as nosas Confrarías ten un gran valor. Son xestos cargados de forza misioneira, que significan unha presenza propositiva da fe, da experiencia e da cultura cristiá na nosa cidade.

Que o Señor lles premie a súa obra a todos os que nos transmitiron a vida da Igrexa e, en particular, a aqueles que fan posible esta expresión da nosa “piedade popular” lucense. E a nós nos dea saber vivir na fe unha Semana Santa máis, unidos como Pobo de Deus, para que a nosa presenza sexa na nosa terra manifestación visible e palpable de vida boa, dunha humanidade que a fidelidade ao Evanxeo renova permanentemente en todas as súas dimensións: intelixencia, sensibilidade e corazón.

Alfonso Carrasco Rouco,

Bispo de Lugo

[Ver texto en castelán]

Presentación da Semana Santa de Lugo

Na capela de san Froilán da Catedral de Lugo, presentáronse na mañá do 14 de marzo o programa e o cartel da Semana Santa deste ano.

O coordenador da Xunta de Confrarías de Lugo, Ramón Basanta, presentou unha novidade: o Martes Santo na procesión do Bo Xesús e do Nazareno: á altura do convento franciscano, producirase o “Encontro de Maria con Xesús camiño ao Calvario”. En fraternal colaboración coa Confraría do Desencravo do Señor e das Maiores Dores de María Santísima, as portas do Convento Franciscano abriranse para que a Virxe das Dores (na súa Cuarta Dor) atópese co seu Fillo camiño ao Calvario. O exército de Terra entoará un cántico propio para este emotivo acto.

Para a concelleira de Cultura, Carmen Basadre, pensar na Semana Santa é pensar na nosa historia, nas nosas vivencias. Temos que sentirnos orgullosos dos aspectos polos que a Semana Santa de Lugo é única: o Santísimo Sacramento sae a procesionar, o paso da Virxe da Esperanza está acompañada da Armada Española, a imaxe da Virxe do Rosario patroa de Lugo únese coa do seu Fillo Resucitado.

O responsable da área de Promoción do Territorio e Turismo da Deputación Provincial, Eduardo Vidal, congratulouse da participación das institucións e de que este ano se coloquen en varios lugares lonas co cartel da Semana Santa. Todo isto fará que a Semana Santa sexa máis visible, máis querida e que se valore o traballo dos organizadores. Finalizou desexando que o bo tempo climatolóxico acompañe ás distintas celebracións.

O Vicario Xeral da Diocese, Mario Vázquez Carballo manifestou que cando contemplamos a beleza das imaxes estamos contemplando a beleza da fe fundamentada na verdade e no ben. Son 3 valores inseparables que a Igrexa sempre impulsou. Cómpre vivir isto, porque se fallan os fundamentos, o demais pode quedar nuns ramalletes externos importantes pero se non hai expresión interna dos fundamentos da fe, o demais sería difícil que puidese subsistir.

[Ver programa]

Celebracións de Semana Santa na Catedral

Mércores 12 de abril, ás 11 h na Catedral de Lugo, o Bispo Mons. Carrasco Rouco, presidirá a Misa Crismal, na que concelebran os sacerdotes da Diocese. Nesta celebración, que manifesta a comuñón do Bispo cos seus presbíteros, bendinse os óleos que despois se reparten ás parroquias para a administración dos sacramentos.

Xoves Santo ás 18 h faise memoria da Santa Cea coa institución da Eucaristía e do sacerdocio. O lavatorio dos pés recorda que El anticipou o sacrificio supremo do Calvario, e deixounos como nova lei o seu amor. Preside o Sr. Bispo.

Venres Santo

Mañá, 12 h.: Sermón das Sete Palabras. Acto de piedade que comenta as palabras de Cristo na Cruz. Predica o Delegado de Xuventude, José Antonio Adrio.

Tarde, 18 h.: Celebración da Paixón do Señor presidida polo Bispo Mons. Alfonso Carrasco

Sábado Santo, ás 23 h SOLEMNE VIXILIA PASCUAL que preside o Sr. Bispo. Tras bendicir o Lume Novo, acéndese o Cirio Pascual, símbolo de Cristo que ilumina a todo home, e resoa xubiloso o gran anuncio da Resurrección.

Domingo de Resurrección, a partir das 11.40 h procesión do Santo Encontro e a continuación Solemne Misa Pontifical de Resurrección. Mons. Carrasco Rouco preside esta Eucaristía. Asisten autoridades civís e eclesiais e unha representación das confrarías; ao finalizar impártes a bendición papal. Trala Eucaristía, procesión do Cristo Resucitado.

Primeiros actos da Semana Santa de Lugo

DOMINGO DE RAMOS, 9 de abril:

  • Ás 11,30 h. bendición de ramos e palmas. Concentración na Praza de Santa María e comezo ás 11,40h da procesión da entrada triunfal de Xesús en Xerusalén. Ao retorno da mesma, continúa a Eucaristía na Catedral.

  • Ás 19 h. procesión da Virxe das Dores de Maria Santísima. Participa na procesión a Banda Municipal de Meira. Ao remate intervirá o “Orfeón Xoán Montes”, interpretando a “Salve Raíña”.

  • Ás 20 h. na Catedral: Eucaristía, con canto de Vésperas. (Ilmo. Cabido e fieis).

  • De 10 da mañá ata as dúas da tarde, e de 5:30 ás 7 da tarde na Catedral, Bicapés de Xesús Nazareno

LUNS SANTO 10 de abril

  • Ás 10,15 h. na Catedral Eucaristía, co canto de Laudes (Ilmo. Cabido e fieis)

  • Ás 20 h na Catedral: Eucaristía, co canto de Vésperas. (Ilmo. Cabido e fieis).

  • Ás 20,30h procesión da Virxe da Esperanza

MARTES SANTO 11 de abril

  • Ás 10,15h na Catedral: Eucaristía, co canto de Laudes. (Ilmo. Cabido e fieis).

  • Ás 20 h na Catedral: Eucaristía, co canto de Vésperas. (Ilmo. Cabido e fieis).

  • Ás 20:30h Procesión do Bo Xesús e do Nazareno

MÉRCORES SANTO 12 de abril

  • Ás 11,00 h. na Catedral Misa Crismal coa bendición dos óleos e a consagración do Santo Crisma, que logo serán levados a tódalas parroquias da Diocese.

  • Ás 20 h na Catedral: Eucaristía, co canto de Vésperas. (Ilmo. Cabido e fieis).

  • Ás 20,30 h procesión do Cristo do Perdón, da Virxe da Piedade e Viacrucis

A %d blogueros les gusta esto: