Semana Santa

O Bispo de Lugo, monseñor Alfonso Carrasco, presidiu a Misa de Ramos na Paixón do Señor, que concelebraron cóengos da catedral e varios dos párrocos da cidade de Lugo. Asistiu un gran número de fieis.

Na súa homilia, Mons. Alfonso Carrasco, indicou que «comezamos a celebración da Semana Santa neste día do Domingo de Ramos no que acompañamos á imaxe do Noso Señor montado naquel burriño que entraba en Xerusalén. Mentres a xente se alegraba, El seguramente sabía moi ben o que facía e onde baixaba e cal era o destino que o agardaba».

Tamén sinalou que o primeiro consello que Xesús nos dá, e que pode acompañarnos nesta Semana Santa, é o de orar. Porque para seguir o seu camiño o home debe levar no seu corazón unha certa vixilancia, para ser quen de responder aos desafíos que aparecen na vida.

Xesús foi condenado no medio do boureo. Pídesenos a oración que nos axude a manter o noso corazón libre cando non consigamos que a nosa voz se oia máis que a dos demais, cando o boureo sexa forte.

E ás 19:30 h tiña lugar a procesión da Virxe das Dores, organizada pola Confraría do Desencravo do Señor e das Maiores Dores de María Santísima. Participaron autoridades eclesiásticas, civís e a Banda de Música de Meira.

No Círculo das Artes o mércores 8 de abril tivo lugar o Pregón de Semana Santa a cargo de Ramón Basanta, Irmán Maior da Confraría do Desencravo, que cumpre 75 anos. No ano 2020, a Confraría que celebraba o seu 75 aniversario era a da Borriquiña, e estaba previsto que o pregoeiro fose Ramón Basanta, ao procesionar na súa infancia como soldado romano. Por respecto a esa confraría, pronunciou o pregón preparado para aquela ocasión. Con presenza de autoridades relixiosas e civís, os actos estiveron presentados por Isabel Lagares.

Tralo visionado dun vídeo de Andry Milan sobre a Semana Santa, actuou o Orfeón Lucense dirixido por Marcos Manuel Fernández Mosquera. Ao órgano estivo Luis Varela Castiñeira. Interpretaron 5 pezas de M. Villanueva, San Germano, J. S. Bach, Mozart e Theodore Dubois.

Ramón Basanta comezou o seu pregón lembrando a transmisión da fe no ámbito familiar, e varias percepcións sensoriais (aroma no intre de pasar o ferro para preparar os hábitos, sons de tambores e trompetas…). Seguíu coa historia da Semana Santa lucense desde os anos 1980 e referiuse a un momento de especial importancia na súa vida persoal:

“Corría o ano 1987, un ano despois de ser nomeado Irmán Maior da miña confraría e na noite do Xoves Santo, antes de volver á miña casa, pasei polo local onde tiñamos gardado o paso do Desencravo… Ao arrimarme á cruz, a miña mirada deslizouse cara ao rostro de Xesús. Ese rostro demacrado, contorsionado nun xesto de agonía, cos seus ollos en branco. E a miña mente viuse invadida por unha serie de preguntas: Por que terías que morrer así? Cal foi a necesidade de tanto sufrimento? A partir dese momento ese rostro espertou en min unha inquietude que marcará o resto da miña vida.

“A cruz non é un invento de Deus, senón dos homes… Xesús foi elixido para ensinarnos a amar, a convivir, a descubrir a verdade, a desmontar a hipocrisía, a mirar a Deus, a mirar aos homes. Quixo axudarnos a superar a finitude, a soportar a angustia de ser criaturas imperfectas. Tróuxonos a palabra pai, a palabra irmán, a palabra liberdade. Rompeu as amarras dunha maneira de concibir a lei, aquela que a pon por riba das persoas. Non se someteu aos poderes do templo nin políticos, senón ao amor do Pai.

“A cruz era inevitable, a maldade humana fíxoa inevitable. Desde aquela vivo profunda e apaixodamente a Paixón de Cristo. As celebracións de Semana Santa convertéronse na forma de vivir a miña fe, de compartila cos meus irmáns e de transmitila a todos aqueles aos que poida chegar”.

Finalmente, Ramón Basanta fixo un repaso polas procesións e actos litúrxicos da Semana Santa.

O mércores 6 de abril no Círculo das Artes de Lugo ás 8 da tarde terá lugar o Pregón de Semana Santa a cargo do Irmán Maior da Confraría do Desencravo, Ramón Basanta. No ano 2020, cando a Confraría da Borriquiña celebraba o seu 75 aniversario, estaba previsto que o pregoeiro fose Ramón Basanta, ao procesionar na súa infancia como soldado romano. Por respecto a esa confraría, pronunciará o pregón preparado para aquela ocasión. Ademais de ser o Irmán Maior da súa Confraría, Ramón Basanta é o Coordinador da Xunta de Confrarías de Semana Santa de Lugo, membro da Orde Franciscana Segrar e do Centro Eucarístico Lucense.

A parte musical do pregón correrá a cargo do Orfeón Lucense, co seguinte programa:

1. Christus Factus Est M. Villanueva

2. Cristo al morir tendea Fra Marc’Antoni da San Germano

3. Jesus Bleibet Meine Freude J. S. Bach

4. Ave Verum Corpus W. A. Mozart

5. Adoramus Te, Christe Theodore Dubois

Organista: Rvdo. D. Luis Varela Castiñeira

Director: D. Marcos Manuel Fernández Mosquera

Na cidade de Lugo o 1 de abril deuse a coñecer como vai ser a Semana Santa da capital lucense. Foi ás 11:30 h na capela de San Froilán da Catedral de Lugo.

O primeiro en intervir foi o coordinador da Xunta de Confrarías de Semana Santa de Lugo, Ramón Basanta, que sinalou, entre outras cousas, o seguinte:

“Fíxose un esforzo para que a nosa Semana Santa sexa cada vez máis coñecida sobre todo no Estado Español, pois dentro duns anos pretendemos optar a ser unha Semana Santa con recoñecemento de nivel nacional. Fíxose un pequeno vídeo que vai ser exposto nas pantallas de oficinas de Correos de Lugo, Monforte, Viveiro, Ferrol, Santiago, Madrid e Barcelona”.

“Á Semana Santa lucense pásalle algo así como á cidade, moita xente a descoñece pero cando vén aquí por primeira vez e a ve, sempre se queda sorprendida ao non agardar que sexan como é. Pensan que é unha Semana Santa con menos actos, con menos vistosidade, pero marchan falando moi ben desta celebración”.

A continuación falou representando á Deputación Pablo Rivera (da área de Promoción Económica e Social):

“Presentar a Semana Santa prodúceme satisfacción porque é volver ao esplendor da Semana Santa despois de dous anos de longa pandemia… A Deputación apoia a confrarías á hora de restaurar pasos, entre outras cousas, porque cremos no respecto absoluto á tradición, á cultura, ao turismo e á economía… Igual có traballo en equipo dos costaleiros permite acadar o seu obxectivo de culminar a procesión, tamén noutros ámbitos a unidade fainos máis fortes”.

A seguinte intervención foi a da Concelleira de Gobernanza do Concello de Lugo, Paula Alvarellos:

“Falamos dunha celebración local considerada de interese turístico galego da que cómpre subliñar o importante labor que realizan as confrarías da nosa cidade, impulsoras dese recoñecemento. Desde o Concello valoramos esta celebración como unha gran oportunidade, xa que se compaxina por suposto a devoción e o sentimento relixioso con outros eidos, como pode ser a cultura”.

E pechou o acto o Vicario Xeral da Diocese e deán da Catedral, Mario Vázquez. Destacou varios actos: Eucaristía do Domingo do Ramos na praza de Santa María, oración pola paz mundial (no mesmo lugar o 8 de abril), a Misa Crismal o Mércores Santo.

Porque Lugo é a cidade do Sacramento, como deán manifestou a súa gran ilusión de que a Confraría Sacramental da Santa Cea do Señor fose a confraría das confrarías.

Tamén sinalou Mario Vázquez a necesidade de valorar que en Lugo todos os anos é Ano Santo, pola indulxencia plenaria cotiá e permanente que ten o privilexio

Venres 26 de marzo: VÍA CRUCIS POLAS VÍTIMAS DO COVID -19 ás 18:30 h na Catedral

Organiza a Xunta de Confrarías de Semana Santa

28 de marzo: DOMINGO DE RAMOS: Eucaristía e bendición de ramos ás 12 h na Catedral

Colabora a Confraría da Entrada Triunfal de Xesús en Xerusalén.

O domingo 28 de marzo ás 19:30 h na igrexa dos PP. Franciscanos celébrase unha EUCARISTÍA EN HONRA Á VIRXE DAS DORES

Organiza a Confraría do Desencravo do Señor e das Maiores Dores de María Santísima.

Ao remate, o Orfeón Xoán Montes interpretará a “Salve Raíña”

O luns 29 de marzo na igrexa Parroquial de Santiago “A Nova” EUCARISTÍAS EN HONRA Á VIRXE DA ESPERANZA ás 12.00 h e 19.00 h

Organiza a Insigne Confraría da Virxe da Esperanza

Intervirán membros da Banda de Música do Tercio Norte da Armada Española, que interpretarán ao final das dúas misas a “Salve Mariñeira”.