Intervención de Jaume González Padrós nas Xornadas Abertas de Teoloxía: os sentidos transfigurados

O segundo día das Xornadas Abertas de Teoloxía foi o martes 14 de marzo, tamén no Salón Rexio do Círculo das Artes de Lugo, onde o Doutor en Teoloxía Jaume González Padrós tivo unha intervención titulada Unha participación que renova a vida e na que se referiu, entre otros temas, aos ollos da fe.

 Nós sabemos que é certo o que di o apóstolo das xentes, San Paulo: a fe vén da escoita, da predicación. Daquela temos a tentación, especialmente os cristiáns occidentais, de quedarnos con esta afirmación e desenvolver unha exposición da fe meramente a partir dunha linguaxe verbal descoidando a imaxe, os ollos da fe.

Lembrou González Padrós a Transfiguración do Señor por indicarnos que se nós non temos uns sentidos transfigurados non seremos quen de ver na santa humanidade de Cristo a súa filiación divina, a súa divinidade.

O relator puxo un exemplo do que é posible grazas á mirada transfigurada:

 Entra o sacerdote na igrexa, venera o altar, ergue a vista, ve á asemblea e di “O Señor sexa convosco”. Di isto porque está vendo ao Señor presente no medio da asemblea. E a asemblea mirando ao sacerdote, revestido con ornamentos do kyrios glorioso, e aínda sabendo que é un home pecador, coas súas debilidades e as súas manías, recoñece, ve, afirma, profesa que o Señor está presente no espírito sacerdotal do celebrante e contesta “E contigo tamén”.

Inicio das Xornadas Abertas de Teoloxía

O 13 de marzo comezaron as XXXVII Xornadas Abertas de Teoloxía en Lugo baixo o título “Un encontro actual con Cristo”.

O doutor en Teoloxía Antonio Astigarraga Mateos impartiu unha conferencia dividida en dúas partes. Na primeira describiu a situación actual da celebración litúrxica, advertindo de varios erros:

Moitas veces non é doado recoñecer a liturxia da Igrexa nas celebracións dalgúns sacerdotes; máis ben hai que dicir “é a súa Misa” da que el dispón como quere. Ante isto o recomendable é ler a Ordenación Xeral do Misal Romano e as introducións de todos os libros litúrxicos para saber o porqué, os principios teolóxicos, eclesiolóxicos, cristolóxicos que explican que a Igrexa organizase a Eucaristía tal como está estruturada.

Outros erros sinalados por Antonio Astigarraga: “hai Eucaristías nas que prevalece a convivialidade, e apártase a primacía de Deus; pérdese o sentido do sagrado; introdúcese o espectacular, o folclórico; concédese demasiada importancia ao subxectivismo, ao emotivo.

E a segunda parte da conferencia tratou da íntima unión entre Eucaristía, domingo e Igrexa:

 “A Eucaristía é o punto de referencia máis significativo da celebración do domingo, ten que ser o eixo, o centro do domingo e á súa vez o domingo establecerase como o día principal da celebración da Eucaristía.

“Realmente entre a Misa de domingo e a Misa de cada día, pois non hai diferencia esencial, as dúas son Eucaristías. A particularidade da Misa dominical é celebrarse no día da resurrección de Xesucristo”.

A seguinte xornada é o martes 14 de marzo ás 20 h no Salón Rexio do Círculo das Artes, onde o Doutor en Teoloxía Jaume González Padrós terá unha intervención titulada Unha participación que renova a vida.

IX Encontro interdiocesano de Pastoral Penal

Baixo o lema Outro cumprimento de pena é posible o 11 de marzo celebrouse o IX Encontro interdiocesano de Pastoral Penal na Casa de exercicios espirituais de Santiago, que presidiu Mons. Julián Barrio. Tamén estiveron presentes Mons. Fernando García Cadiñanos e Mons. Francisco José Prieto.

A mañá estivo adicada ao relatorio da ex-secretaria xeral de Institucións Penais, Mercedes Gallizo, que adicou parte da súa intervención a Concepción Arenal. Aínda que quedou o estereotipo de que Concepción Arenal era unha boa persoa, tamén foi unha gran intelectual. Neste último aspecto logrou que a transmisión das súas ideas chegase a un amplo número de persoas, non só a outros intelectuais.

En palabras de Clara Campoamor, “a fe católica de Concepción Arenal ten unha paixón polo ben do próximo” e a mesma Campoamor considera que foi no mundo penal onde mellor desenvolveu Arenal a súa obra.

Concepción Arenal foi pioneira na humanización da vida das prisións, sempre tendo en conta a dignidade da persoa. Tamén foi das primeiras persoas que analiza o contexto das persoas que cometen delictos, falando da fatalidade social. Mercedes Gallizo considera que a pesar do tempo pasado desde a época de Concepción Arenal, hai que lamentar que non haxa tanto cambio como debería no feito de que a maioría dos presos son persoas pobres.

No Encontro tamén se viron experiencias como as dos traballos en beneficio da comunidade (alternativa á entrada en prisión para delitos relacionados coa seguridade vial…) e a peregrinación polo Camiño de Santiago por parte de presos.

Charla do misioneiro comboniano Daniel Cerezo

No marco da celebración da Novena da Graza na parroquia San Francisco Xavier, o 10 de marzo o padre predicador Daniel Cerezo deu unha charla sobre interculturalidade. E o comboniano Daniel Cerezo comezou sinalando que a renovación da Igrexa pasa pola interculturalidade, algo que non debe ser visto como obstáculo senón como enriquecemento.

A hospitalidade na Biblia: vese no Levítico, nos Evanxeos… non se practica a desgusto, é amor aos estraños.

Xesús como forasteiro: veu ao mundo como forasteiro, identifícase cos forasteiros, se  nos poñemos ao servizo do forasteiro, seremos merecentes do Reino de Deus.

Xesús como hóspede: o sitio de Xesús é onde chega e o acollen. Xesús cea coa xente considerada respetable e cos indesexables. Sempre está á escoita.

Xesús como anfitrión: intenta que a hospitalidade non sexa unha carga. Na Última Cea ofrécese a si mesmo e vese que a hospitalidade de Xesús esténdese a todos, incluso ao traidor.

Propostas para poñer en práctica a interculturalidade:

  • comida parroquial 1 vez ao mes ou cada 2 meses
  • visitar a domicilio a persoas, tanto sexan da Igrexa como alonxados
  • mes da koinonía
  • que unha persoa da parroquia se encargue de acoller a quen chega por primeira vez,…

Institución do lectorado e acolitado a tres seminaristas

De esquerda a dereita: Jesús, Salomón e Santiago

O sábado 11 de marzo, o Bispo de Lugo, Mons. Alfonso Carrasco Rouco, instituirá como lectores e acólitos aos seminaristas do Seminario Redemptoris Mater de Lugo: Santiago Lillo, Jesús González e Salomón Nakhal. A cerimonia terá lugar na Capela Maior do Seminario de Lugo, ás 19 h.

O lectorado e acolitado son ministerios son laicais, é dicir, non os reciben exclusivamente os candidatos ao sacerdocio. Recíbense ambos mediante unha oración e bendición do Bispo.

A %d blogueros les gusta esto: