Consagración á Santísima Virxe María

Queridos irmáns:

Recibimos a invitación de unirnos a unha magnífica iniciativa, proposta pola Conferencia Episcopal Portuguesa a todos os fieis cristiáns de España e Portugal:

O día 25 de marzo, festa da Anunciación a Nosa Señora, ás sete e media da tarde, retransmitirase o rezo do Rosario desde a Basílica de Fátima, pedindo polas vítimas do COVID-19, os seus familiares, o persoal sanitario, etc. Presidirá ese acto o Bispo de Fátima, Card. António dos Santos Marto.

Ao finalizar o rezo do santo Rosario, o Card. Patriarca de Lisboa fará a consagración da Península Ibérica e as súas illas á Santísima Virxe María.

Pareceunos fermoso ese acto de unión dos Bispos e as Dioceses de España coas de Portugal, poñéndonos a todos baixo a protección da Virxe de Fátima, á que tanta devoción se ten nas nosas parroquias e comunidades cristiás.

Como Diocese de Lugo acollemos de corazón esta proposta e unirémonos desde as nosas casas a este rezo do Rosario e ao acto de Consagración á Virxe. Poderemos seguilo a través da COPE e TRECE TELEVISIÓN.

Sigamos pedindo ao Señor con constancia polas vítimas da pandemia, polos seus familiares, polos que viven a enfermidade en soidade, e por todos os que xenerosamente están expoñendo as súas vidas para axudar a superar esta situación tan dolorosa.

Co meu afecto e bendición

+ Alfonso,

bispo de Lugo

[Texto en castellano]

No Advento: María, porta do ceo

A salvación non é oferta gratuíta de Deus. O Señor ofrécea a todos os homes. A cambio só pide que a aceptemos con confianza e con fe.

Deus, que fixera boas todas as cousas, ás persoas fíxonos moi boas: deunos a conciencia; concedeunos o señorío sobre o universo e regalounos a inmortalidade. Pero pronto lle saíu competidor, que envexoso da grandeza do home, moveu a este non recoñecer a soberanía de Deus, desobedecendo os seus divinos mandatos. Enganado polo inimigo, o home perdeu os dons que o Creador lle regalara, pero non deixou de ser amado polo Señor. E o Señor, que, posto a amar, ama para sempre, decretou recuperar ao home, devolvéndolle a dignidade primeira. Para iso, non se limita a usar paliativos que suavicen a calamitosa situación en que o home caera. A terapia que o Señor vai utilizar, é unha terapia sanante, redentora. O fillo unixénito do Pai, ponse en lugar dos fillos pecadores, e ofrece como rescate da humanidade caída, todo o seu sangue derramado na árbore da cruz. Diríase que no calvario realízase unha verdadeira transfusión de sangue. Agora polas veas da alma dos homes corre sangue redentor de Cristo, e o pecado que danara mortalmente o corazón do home, queda perdoado pola misericordia infinita do corazón de Deus.

Como foi o proceso? Unha muller que santificada pola que os teólogos chaman “redención preservativa”, é preservada do pecado orixinal e enriquecida con plenitude de graza e de virtudes, di “SI” ao anxo anunciador do misterio da encarnación, e o milagre produciuse. Desde esse intre, o mundo que estaba impresentable polo pecado que afeaba o corazón dos homes, agora é obxecto de compracencia do Señor porque nel está Cristo, o seu Fillo santísimo, e porque María co seu “Si”, converteuse no primeiro templo que Deus construíu na terra. Co “SI” de María, comeza unha humanidade nova. Por Ela, Deus cumpriu as súas antigas promesas. A ofrenda de salvación mantena o Señor perpetuamente. Agradezamos ao Señor o seu amor redentor, e encarnemos o “SI” de María nas nosas vidas, para que sempre sexa Nadal no noso mundo.

Mons. Indalecio Gómez Varela

Cóengo da S. I. Catedral Basílica de Lugo

[Artículo en castellano]

A Virxe María. Grazas

No último domingo de Advento aparece en escena a gran protagonista do misterio da Encarnación: A Virxe María. No Evanxeo deste domingo escoitaremos a pasaxe da Anunciación. O Anxo trae a noticia máis esperada de todos os tempos e María fíase de Deus.

Do “si” de María dependía a esperanza da humanidade. Se ela non aceptase o plan de Deus hoxe continuariamos vivindo nas tebras dun mundo sen esperanza máis aló da morte.

A entrega de María foi moi xenerosa. Renuncia aos seus plans e pensa máis nos demais que en si mesma. As consecuencias para ela coñecémolas: sen fogar, pobre e ver ao fillo das súas entranas sufrindo ata a morte. As consecuencias para nós, aínda que o esquezamos ás veces, tamén as coñecemos: a vida eterna que nos alcanza Xesucristo, o fillo de María.

Nunca lle agradeceremos abondo todo isto a María de Nazaret. Existen miles e miles de santuarios marianos por todo o mundo, pero a maioría das veces só acudimos a eles para pedir cousas para nós.

Cantas veces agradecemos a María o agasallo de facer posible a Boa Noticia da salvación que nos trouxo Xesús? Dito doutro xeito: cantas veces agradecemos a María o que a nosa vida e a nosa morte teñan sentido?

E ela aí está: discreta, silenciosa, atenta. Xesús na cruz entregóunola como nai de todos:”aí tes ao teu fillo” díxolle a Xoán, que nos representaba a todos. E desde aquel momento todos pasamos a estar protexidos por este abrazo maternal todos os días da nosa vida.

Grazas, María. Grazas por darnos ao autor da Vida, Cristo, o Señor. Grazas polo teu consolo e protección maternal. Grazas, María, porque grazas a ti todo é posible.

Miguel Ángel Álvarez

Encontro mariano no santuario de Nosa Señora dos Milagres de Saavedra

O xoves 12 de xuño hai un Encontro mariano no santuario de Nosa Señora dos Milagres de Saavedra (Begonte).

Está organizado pola Delegación de pastoral da saúde de Lugo co seguinte programa:

1) ás 16:30h. acollida dos peregrinos,

2) ás 17h charla sobre as mensaxes da Raíña da Paz.

3) ás 18h celebración da santa misa pola saúde dos nosos enfermos. (haberá sacerdotes para o sacramento da reconciliación).

4) ás 19h regreso.

Teléfono da Delegación de pastoral da saúde: 635 882 547

Os fregueses de Adai relanzan unha romaría en honra á Virxe da Saúde

O día 22 na parroquia Santa María Magdalena de Adai recupérase unha romaría que se pretende  sexa tamén con peregrinación. Ese día haberá misas cada hora desde as 10 da mañá.

A historia remóntase 65 anos atrás, cando unha familia doou a imaxe da Nosa Señora da Saúde, que agora está nun dos laterais da igrexa e que leva a inscrición: «Regalo de Elías Simón y esposa». Moitos lucenses ían en peregrinación facendo os escasos 5 quilómetros que hai até a parroquia. Hoxe en día tamén son numerosas as persoas que chegan até a zona e ás que se ofrece un motivo máis para aproximarse ao lugar. Sobre todo, o penúltimo fin de semana de setembro.

A %d blogueros les gusta esto: