Comunicado da Hermandad Obrera de Acción Católica (HOAC)


A HOAC rexeita que o dereito á saúde das persoas traballadoras sexa subordinado á primacía da rendibilidade

Para este movemento de traballadores da Acción Católica especializada, o fallo do Alto Tribunal é inxusto e está na lóxica de considerar ao ser humano «como un ben de consumo, que se pode usar e logo tirar», como denuncia o papa Francisco.

A Hermandad Obrera de Acción Católica (HOAC) considera que a sentenza do Pleno do Tribunal Constitucional, que permite o despedimento por causas obxectivas se hai faltas de asistencia xustificadas pero intermitentes, sitúa ás persoas traballadoras ante un maior sometemento nas condicións de traballo, e así outorga aínda unha maior prioridade ao criterio económico.

Para a HOAC, esta sentenza é claramente un retroceso ao traballo “libre, creativo, participativo e solidario” (Evangelii gaudium, 192) onde o ser humano expresa e acrecenta a dignidade da súa vida. Desta forma o traballo convértese nun lugar de opresión, determinado polas leis e normas establecidas para que as condicións laborais dos traballadores e as traballadoras se sometan ao criterio de rendibilidade, onde o que importa é a ganancia. Na orixe da sentenza está o redactado da reforma laboral do ano 2012 ao artigo 52. d do Estatuto dos Traballadores, que endureceu as condicións laborais ao suprimir a referencia ao volume de inasistencias total do persoal no centro de traballo. Desta forma, ademais da indefensión que provoca, culpabiliza á persoa por enfermar e ter «faltas de asistencia ao traballo, aínda xustificadas pero intermitentes, que alcancen o 20% das xornadas hábiles en dous meses consecutivos…» motivando así o seu despedimento obxectivo.

A HOAC considera, desde unha visión antropolóxica cristiá, inxusto este fallo, cando ademais sabemos que polas actuais condicións laborais que teñen principalmente os mozos e as mulleres, maioritariamente precarias, se converte nun motivo máis para relativizar a esixencia dun traballo decente.

Ao mesmo tempo, a HOAC realiza un chamamento ao próximo Goberno de España para que abra procesos que promovan transformar e alcanzar unhas relacións laborais que permitan un traballo digno e, con iso, un modelo de desenvolvemento máis inclusivo, sustentable e solidario.

Bispos de Galicia e norte de Portugal reúnense en Vigo

Case unha vintena de prelados celebran o seu encontro anual

Os bispos das provincias eclesiásticas de Santiago de Compostela e Braga compartirán o martes 26 de novembro a partir das 11:00h. un encontro fraterno na sede do Bispado de Tui-Vigo. Na reunión intercambiarán experiencias pastorais e trataranse diversos asuntos como a evanxelización dos mozos.

Está prevista a asistencia do arcebispo de Braga e dos bispos, titulares ou auxiliares, de Aveiro, Porto, Bragança, Coimbra, Vila Real, Viseu e Viana do Castelo, ademais dos seis bispos das dioceses galegas: D. Julián Barrio, arcebispo de Santiago de Compostela, e o bispo auxiliar, D. Jesús Fernández; o bispo de Lugo, D. Alfonso Carrasco; o de Ourense, D. Leonardo Lemos; o bispo de Mondoñedo-Ferrol, D. Luis Angel de las Heras, e o anfitrión, D. Luis Quinteiro, Bispo de Tui-Vigo.

Xornada mundial dos pobres

Obxectivos da Xornada

– Redescubrir o valor de estar xunto ás persoas máis pobres e vulnerables das nosas comunidades, a través da oración comunitaria e o banquete da Eucaristía, como expresión da mesa compartida en familia.

– Promover que a comunidade cristiá sexa signo de esperanza para as persoas pobres, a través de xestos sinxelos e cotiáns nos que se vexan acompañados e acollidos como persoas con dereito ao seu propio lugar.

A comunidade cristiá ten a misión de anunciar a Boa Nova do Evanxeo de Xesús, encarnar a súa mensaxe e adherirse ao seu estilo de vida. Isto pasa por axudar, acompañar, protexer, defender e salvar aos máis pobres e débiles.

Todas as persoas que integran os distintos proxectos parroquiais, arciprestais e diocesanos, participarán de forma activa e conxunta na preparación e desenvolvemento da Eucaristía, dando un espazo explícito de participación ás persoas dos proxectos e/ou colectivos máis vulnerables da comunidade.

[Materiais]

Eucaristía de acción de grazas pola canonización de Frei Bartolomeu dos Mártires

A Arquidiocese de Braga celebrou o 10 de Novembro, a canonización de Frei Bartolomeu dos Mártires, antigo arcebispo de Braga (1559 e 1582). A Solemne Eucaristia tivo lugar na Sé Catedral presidida polo cardeal Angelo Becciu -prefecto da Congregación para a Causa dos Santos-. Procedeuse á lectura solemne do Decreto de Canonización a través do cal o Papa Francisco inscribiu a Frei Bartolomeu dos Mártires no catálogo dos santos.

Na Solemne Eucaristia estiveron presentes  bispos de Portugal e de Galicia (Mons. Alfonso Carrasco entre eles), autoridades civís como o Presidente da República, Marcelo Rebelo de Sousa, e tamén autoridades militares e académicas.

Encontro anual da Pastoral Universitaria

A Subcomisión Episcopal de Universidades da Conferencia Episcopal, organiza do 13 ao 15 de novembro, o Encontro anual de delegados e responsables da Pastoral Universitaria. O tema é “Universidade nun contexto plural: a Pastoral Universitaria, oportunidade de diálogo”.

O Encontro é en Granada, cidade universitaria con diversidade de culturas e crenzas. Así, precísase no programa do Encontro que «tendo como fondo o Documento sobre a fraternidade humana pola paz mundial e a convivencia común asinado en febreiro 2019 polo papa Francisco e o gran imán Al-Tayyeb, reflexionaremos sobre as implicacións no mundo universitario desta diversidade. Tamén nos achegaremos a experiencias concretas que están a ter lugar no ámbito do diálogo intercultural, interrelixioso e ecuménico, no marco da Pastoral Universitaria».

[Programa]

A %d blogueros les gusta esto: