Mans Unidas

Campamento de Voluntariado para a Sustentabilidade organizado por Mans Unidas

Mans Unidas convida a participar dunha experiencia onde debater sobre os principais retos sociais e ambientais aos que se enfronta o planeta. Trátase dun espazo onde formarse sobre as novas necesidades do voluntariado e os Obxectivos de Desenvolvemento Sostible.

A escola de voluntariado desenvolverase como un campamento de voluntariado para a sostenibilidade, nas instalacións da Asociación Raiña Paraiso en Vilasantar (A Coruña) durante os días 21 ao 24 de xullo. Está destinado a mozos entre 16 e 25 anos. Coa contribución da Fundación KR, no marco da iniciativa CIDSE “Change for the Planet – Care for People”.

O campamento ten un prezo de 40 euros, que inclúe pensión completa, seguro e a posibilidade de transporte desde Santiago de Compostela a Vilasantar, para aqueles que o necesiten. Os participantes levarán unha saba baixeira, funda de almofada, saco de durmir, roupa e calzado cómodo e axeitado para actividades de tempo libre.

O prazo de inscrición finaliza o 15 de xullo. As prazas confirmaranse a través do enderezo electrónico, previo pago por transferencia bancaria da inscrición, e incluirase como concepto: Campamento e nome completo do que se inscribe, na conta bancaria: ABANCA ES76 2080 0300 8930 4004 4605 Titular: Mans Unidas

Para máis información, escribir un correo a: educación.galicia@manosunidas.org

PROGRAMA

Xoves 21 de xullo

10:45 Recepción das persoas participantes.

11:00 Presentación do programa e introdución

16:00 Introdución ao voluntariado

18:00 A participación social, clave para a consecución da axenda 2030

20:00 A Axenda 2030 e os obxectivos de desenvolvemento sostible (ODS)

22:30 Obradoiro sobre o ODS 1. Loita contra a pobreza

Venres 22 de xullo

10:00 Obradoiro de agroecoloxía.

16:00 ODS 2. Fame Cero: Desmontando os mitos da fame I

20:00 Obradoiro: Que podemos facer para acabar coa fame?

22:30 Videoforum

Sábado 23 de xullo

10:00 Ruta de sendeirismo

16:00 ODS 13 Acción polo Clima

18:00 ODS 12 Produción e Consumo responsable

20:00 Obradoiro

22:30 Festa de conclusión.

Domingo 24 de xullo

10:00 Obradoiro de agroecoloxía

12:00 O papel da sociedade civil nas Conferencia das Nacións Unidas sobre o Cambio Climático. Videoconferencia co Responsable de CIDSE (Rede europea de ONGD’s)

16:00 Avaliación e despedida.

[Formulario de inscrición]

Campaña contra a fame de Mans Unidas

Actos

Esta semana voluntarios de Mans Unidas Lugo visitan colexios e institutos, dentro da campaña contra a fame 2022. O venres 11 é o Día do Xaxún Voluntario: ás 17 h celébrase unha Eucaristía na Capela Maior do Seminario, e a continuación un café solidario. A colecta das misas vespertinas do sábado día 12 e as do domingo día 13 dedícanse a esta Campaña.

Proxecto

Mans Unidas Lugo financia este ano o completar a estrutura da escola comunitaria de Bekia, que foi fundada en 2012 e ten o ciclo completo de primaria. Bekia é unha vila do sur do Chad, país no que a educación pública segue sen ser efectiva.

[Carta pastoral de Mons. Alfonso Carrasco]   [Páxina web da campaña]

A nosa indiferenza condénaos ao esquecemento. Carta pastoral do Sr. Bispo

O lema da campaña de Mans Unidas deste ano pon o acento na indiferenza como actitude que posibilita o crecer e perpetuarse de inxustizas, pobrezas e desigualdades extremas.

En efecto, a indiferenza é moitas veces condición para que poidan establecerse dinámicas, que contradín os bens e dereitos máis fundamentais das persoas, tanto nas relacións persoais e familiares, como, máis facilmente aínda, nos ámbitos sociais e económicos. O silencio, o deixar facer, a non asunción da propia responsabilidade, é condición para que poidan establecerse socialmente formas de acción das que se sabe perfectamente que son inxustas e, de por si, inaceptables.

A esta indiferenza egoísta, que acala ao propio corazón e esquece o rostro do próximo, contraponse sen dúbida a caridade verdadeira, nacida da fe que recoñece a Deus como Pai e a toda persoa como creada por El con igual dignidade, como irmán.

A campaña de Mans Unidas pode axudarnos a non caer nesta tentación, neste individualismo radical ao que é fácil tender na nosa sociedade, en especial ao saír desta crise sanitaria que puxo en cuestión a vida de cada un. Porque podería parecernos que, ao final, só importa ocuparse de si mesmos, que non vale a pena correr ningún risco polo ben doutros, que o esencial é saber adaptarse ao que se considera socialmente correcto, aínda á conta da propia conciencia.

Poñendo ante os nosos ollos os rostros de quen sofre fame de pan e de dignidade, Mans Unidas estanos pedindo que vivamos segundo a lei verdadeiramente humana, dada por Deus a todos, do amor ao próximo e da fraternidade.

Saberemos entón que non estamos sós, que formamos parte dun mesmo gran Pobo de Deus, que camiñamos xuntos tamén nestes tempos de pandemia, sostendo a esperanza e a caridade os uns dos outros, como fillos dun mesmo Pai.

E seremos máis capaces de responsabilidade nas nosas vidas, nas nosas relacións sociais e económicas. Saberemos optar pola verdade e a xustiza, pola defensa do débil e do oprimido, construiremos unha sociedade máis xusta. A indiferenza e o egoísmo condenan ao esquecemento ao pobre, pero tamén aos nosos seres máis cercanos e a nós mesmos; e constrúen unha cultura, unha economía e unha sociedade cada vez menos humanas, menos atentas ao ben das persoas concretas e ao da nosa terra.

Mans Unidas é, un ano máis, signo de canto ben podemos facer permanecendo unidos, de como crece a nosa conciencia, a nosa capacidade de actuación, a nosa humanidade, camiñando xuntos, vencendo indiferenzas e esquecementos, permitindo que o alento da fe e da caridade guíen as nosas vidas.

Pidamos sempre para iso a intercesión e o amparo da Santísima Virxe María, nai de Deus e nai nosa, cuxos ollos están sempre atentos ás necesidades e sufrimentos dos seus fillos.

+ Alfonso,

Bispo de Lugo

Entrega da cesta de Nadal de Mans Unidas á parroquia de Albeiros

Na mañá do xoves 20 de xaneiro a lIbraría La Voz de la Verdad acolleu a entrega dunha cesta de Nadal por parte de Mans Unidas Lugo á parroquia de San Lourenzo de Albeiros. Mans Unidas fixera o sorteo o pasado mes de decembro e ao quedar deserto, entregouse a cesta ao párroco Daniel García, para que a distribúa entre xente necesitada.

Viaxe virtual por proxectos de Mans Unidas

En colaboración coa diocese da Rioxa, Mans Unidas organiza unha viaxe virtual por proxectos de 12 países. O obxectivo é profundar na esixencia de compromiso social do seguimento de Xesús. Tamén se trata de profundar nas causas da inxustiza e a pobreza, así como os posibles xeitos de loitar contra elas.

Supérase o Challenge chegando á última etapa en Guatemala antes do 1 de marzo. Un reto maior sería chegar antes do 13 de febreiro, día da Xornada Nacional de Mans Unidas. Para ir progresando hai que resolver correctamente -coas pistas que se van solicitando polo camiño- o gran enigma Challenge.

Esta experiencia é gratuíta.

Quen non teña conta na plataforma “Challenge Internacional”, ingresará na súa web eun mesmo faise usuario en 1 minuto. Se xa se ten conta, só hai que automatricularse en Manos Unidas Challenge.

A %d blogueros les gusta esto: