O domingo 22 de xaneiro ás 17 h na Catedral, Patricia Rodríguez López organizou a liturxia de oración ante o Santísimo. Ao coincidir co Domingo da Palabra, no inicio do acto entre as ofrendas estaba a Biblia, ademais dunha rosa branca e unha caixa representando un regalo. Relatouse unha historia sobre uns zapatos ortopédicos, houbo oración, cánticos á Virxe, lectura dunha pasaxe evanxélica e o seu comentario polo cóengo Luis Varela Castiñeira. Ao final da celebración, na que colaboraron as Misioneiras Eucarísticas de Nazaret, entregouse aos asistentes un agasallo.
oración
Xornada Mundial de Oración polo Coidado da Creación
O 1 de setembro celébrase a Xornada Mundial de Oración polo Coidado da Creación, a cal dá inicio ao Tempo da Creación. Este día de oración foi establecido polo Patriarca Ecuménico Dimitrios I en 1989 e polo Papa Francisco para a Igrexa católica en 2015.
O Papa define ao Tempo da Creación como “unha oportunidade para cultivar a nosa ‘conversión ecolóxica’, lembrando este concepto alentado por san Xoán Paulo II como resposta á ‘catástrofe ecolóxica’.
Deste xeito, convoca a todos os cristiáns durante este tempo para rezar. Tamén lembra “a responsabilidade de actuar, no noso comportamento cotián, en consonancia con esta necesidade de conversión, que non é só individual senón tamén comunitaria”.
Un minuto pola paz
O mércores 8 de xuño, ás 13:00 horas, lévase a cabo a oitava edición da Xornada de Oración «Un minuto pola paz», que busca unir todas as vontades e compromisos de persoas de boa vontade pola paz, desgraciadamente rota ou ameazada en varias rexións do planeta.
“Un minuto pola paz” é unha iniciativa conxunta do Foro Internacional Acción Católica (FIAC), a Unión Mundial de Organizacións Femininas Católicas (UMOFC), Acción Católica, Xustiza e Paz.
Esta xornada celébrase para lembrar o oitavo aniversario do xesto histórico no Vaticano cando o Papa Francisco reuniu para unha inédita pregaria pola paz no medio Oriente ao presidente israelí Shimon Peres e ao líder palestino Mahmud Abas.
Por mor dese encontro desenvolveuse “Un minuto pola paz”. A proposta é que o 8 de xuño ás 13h cada persoa deteña a súa marcha por un intre, por un minuto, e rece, cadaquén segundo a súa propia tradición.
Oración por Ucraína
As Igrexas Ortodoxa, Evanxélica e Católica e a Xunta de Confrarías de Semana Santa de Lugo organizan o venres 8 de abril un día de oración pola paz na Praza de Santa María a partir das 20h
PROGRAMA
20.10 BENVIDA E EXPLICACIÓN. Quen convoca o acto e por que se fai
20.20 XESTO para axudar a identificarse coa dor que sofren os nosos irmáns na guerra de Ucraína
20.25 ORACIÓN CON SOLTA DE GLOBOS
Cada persoa que vai orar toma un globo, le a oración e libera un globo como un símbolo da petición que se eleva a Deus.
20.35 DECLARACIÓN DE FE SOBRE A PAZ
20.40 LECTURA DO MANIFESTO POLA PAZ
20.45 NOSOPAI
20.47 SE LUZ. Entrega de candeas. É un desafío para ser luz no medio das tebras. Serviría como recordatorio de orar por Ucraína ao ver a candea na casa.
20.50 Despedida do acto organizado polas comunidades ortodoxa, evanxélica e católica. Invitación a unha marcha pola muralla organizada pola Xunta de Confrarías.
O papa Francisco pide unha xornada de oración pola paz en Ucraína o 26 de xaneiro
O domingo 23 de xaneiro, despois do rezo do Ángelus, o Papa Francisco expresou a súa preocupación ante as crecentes tensións en Ucraína». Como xesto concreto de proximidade espiritual, o Santo Padre propuxo realizar unha xornada de oración para invocar a paz neste país o mércores 26 de xaneiro.
«Sigo con preocupación as crecentes tensións que ameazan con asestar un novo golpe á paz en Ucraína e pon en dúbida a seguridade do continente europeo, con repercusións aínda máis vastas. Fago un chamamento sincero a todas as persoas de boa vontade para que recen a Deus Todopoderoso para que todas as accións e iniciativas políticas estean ao servizo da fraternidade humana e non de intereses partidistas», dixo o Papa