O día 3 de maio celébrase na parroquia de San Xoán de Furelos a festa da Santa Cruz, como vén sendo habitual desde hai moitos anos. A liturxia celebrarase na capela da Santa Cruz, ás 12 da mañá, participando nela numerosos fieis da parroquia de Furelos e doutras da comarca.
Vixilia de oración polas vocacións nativas
A Vixilia de oración polas vocacións nativas será o venres 20 de abril ás 20:30 na parroquia de San Francisco Xavier de Lugo.
No cartel vemos aos apóstolos iluminados pola luz do Espírito Santo. Esta escena pode axudar a preparar a festa de Pentecostés.
A imaxe da Virxe lembra aos fieis que María segue presente e activa na vida da Igrexa e dos cristiáns.
O día propio das Vocacións Nativas será o domingo 29.
Peregrinación ecuménica en Lugo
Un grupo de 25 finlandeses que participan nunha peregrinación ecuménica estiveron en Lugo o día 17. Eran católicos, luteranos e ortodoxos de Oulu, (poboación que está a uns poucos quilómetros do Círculo Polar Ártico) que viaxan a lugares onde nacen as raíces dos seus credos.
Buscan un entendemento maior entre todos.
Desde hai 50 anos está de novo en Finlandia a Igrexa Católica e aínda que hai un Bispo do país, a maioría dos católicos son estranxeiros, como o párroco que ía no grupo que estivo en Lugo, Bosco Thomas, que é da India. Tamén estaban acompañados por Alberto e María, un matrimonio español do Camiño Neocatecumenal en misión no país nórdico desde hai unha ducia de anos e que celebran o que os une ás outras confesións cristiás.
Encontros prematrimoniais en Lugo e Lalín
Durante a segunda quincena de abril teñen lugar varios encontros con parellas que van casar en Lugo e Lalín.
- Na parroquia Bo Pastor os encontros prematrimoniais comezan o 14 de abril, com sesións matutinas de 11 a 14 h. e seguirá o 21 de abril todo o día (de 11 a 14 e de 16 a 19 h.). Para contactar está o teléfono 982 25 20 29.
- Na parroquia de Nosa Sra. das Dores de Lalín (986 78 04 37) o inicio dos encontros será o día 16 de abril ás 20:30, continuando ata o día 20.
- E do 23 ao 27 de abril será o curso para novos matrimonios na parroquia de San Antonio de Padua, de Lugo, ás 20:30.
Cursiño sobre “A realidade das drogas”
O Voluntariado Penitenciario Lucense organiza unha xornada de formación sobre “A realidade das drogas” o 14 de abril a partir das 10:30 h. no salón de actos de Cáritas na avenida das Américas, 93 – 97.
Entre as persoas que piden axuda aos colaboradores de Cáritas, do Voluntariado Penitenciario… un problema que poden ter é o consumo de drogas.
Cómpre, pois, saber detectar toxicomanías, orientar ás persoas e na medida e o posible guialas no camiño da desintoxicación.
Obxectivos do curso:
-
Facer ver a importancia e a necesidade da formación e a prevención.
-
Proporcionar as habilidades sociais adecuadas para o desempeño das súas funcións de forma adecuada, nos diferentes campos de actuación: no fogar familiar, establecementos de Cáritas, casas de acollida…
-
Facilitar os coñecementos necesarios sobre os recursos e estratexias a ter en conta para unha maior eficiencia.