Vida e actualidade da Diocese de Lugo
O sábado, 15 de decembro, os profesores de relixión da Diocese reúnense no Gran Hotel de Lugo para manter o encontro de Nadal. Comeza ás 10.30 h e termina tras a comida.
Faise unha homenaxe aos profesores xubilados o curso pasado.
Ademais os profesores de relixión farán unha visita á Catedral con motivo da presentación dunha unidade didáctica para os alumnos desta materia que versará sobre a fe e a arte neste templo.
A Delegación de Pastoral Vocacional convoca a todos os interesados a unha Vixilia de oración polas vocacións, o día 13 no Seminario Diocesano ás 21.30 h. Estas vixilias continúan durante o curso cada tres meses (marzo, xuño).
O Recuncho de Nadal que organiza a Delegación de Mans Unidas da Diocese de Lugo está situado nas Galerías da Praza de Santo Domingo, e o horario de atención ao público é de 11:00 h. a 13:30 h. (mañás) e de 17:30 h. a 20:30 h. (tardes). Permanece aberto de luns a venres laborables, e de 11:00 h. a unha e media. Os sábados está aberto polas mañás e os días festivos non abre.
Todo o diñeiro recadado será destinado aos dous proxectos que se financian este ano por parte de Mans Unidas da diocese de Lugo, un en Nixeria e outro en Níxer.
O proxecto de Nixeria céntrase nun programa de microcréditos para mulleres de comunidades agrícolas e ten como beneficiarias a 2.500 persoas.
O proxecto de Níxer consiste na construción de cinco pozos para poboación rural en comunidades e barrios de Tera e ten como beneficiarias a 7.500 persoas.
Este Recuncho de Nadal permanece aberto ata o día 20 decembro
O día 13 de decembro a cantante portuguesa afincada en Galicia, María do Ceo, actúa no auditorio Gustavo Freire (parque de Frigsa, Lugo) ás 20:30.
Trátase dun concerto a beneficio de Cáritas Lugo e do Voluntariado Penitenciario Lucense. Por iso, hai unha “fila 0” ademais de entradas normais (8 €), que se poden adquirir nos locais de COPE, Onda Cero, a igrexa de San Antonio de Padua (Lugo) e no propio auditorio desde media hora antes.
O 12 de decembro ten lugar na r/ Cruz, 3 (Lugo) unha reunión sobre Doutrina Social da Igrexa, que respondendo ao Ano da Fe que se está vivindo, ten como tema “Implicación social da fe”. A hora de inicio da sesión é as 19 h. Estas sesións son mensuais e no próximo ano cada segundo mércores haberá novas convocatorias para tratar sobre outros temas: a solidariedade, o principio de subsidiariedade, a propiedade…