Mesa de experiencias na loita contra a pobreza

Copia de Mesa experiencias

Cáritas Diocesana de Lugo e Mans Unidas, con motivo da celebración do Día Internacional para a Erradicación da Pobreza (17 de outubro), organizaron unha Mesa de experiencias.

Participaron:

  • Antón Negro Expósito (Delegado de Cáritas Lugo), que presentou o acto.
  • Rosario Bosque Martínez (de Cáritas Santiago), que falou do Sillón solidario para a atención bucodental
  • Amalia Hermida (de Mans Unidas), fixo ver que hai millóns de mans xenerosas, proféticas, incansables.
  • e Miriam Piqueras (de Madreselva ONGd) invitou a coñecer, compartir, denunciar, cambiar costumes.

Mírame aos ollos

Leva baixa a cabeza e elude mirar de fronte. Quere pasar desapercibida. Non desexaría estar alí. Ninguén o desexa. Ela chama a atención nese lugar porque o seu aspecto non responde aos cánones establecidos, eses que levamos arraigados demasiado dentro e cos que etiquetamos, querendo ou sen querer, aos demais. A poucos lles contou que lle pasou, esa confianza só a depositou en quen a gañou. En quen non xulga a súa situación, o seu aspecto, ou a ela mesma.
Os que agardan ao seu carón tampouco a miran. Algúns coñécense entre eles, outros son unicamente compañeiros de circunstancia. Cada un ten a súa propia historia. Agardan pacientes. Ata na desgraza é necesario gardar a vez. A cola vai avanzando lentamente. Só cando se abre a porta cesa o murmurio que acompaña a espera. Tralo limiar agardan que alguén por fin lles poña a ansiada tiriña que corte a hemorraxia do desalento. Que lles dea solución a esa cadea de despropósitos que nunca cesa.
Ela aínda non sabe como puido ocorrerlle isto. Pero o certo é que tampouco o sabe ninguén dos que están ao seu lado. Algúns nin sequera coñecen outra realidade, non saben e, quizais, tampouco chegarán a saber que significa ter unha oportunidade. Os seus berros de desesperación han ir aos poucos dando paso a simples queixumes, ata quedar apagados nese buraco escuro que o está tragando todo. Xa deixou de buscar culpables. Dá igual quen gañe na balanza da responsabilidade porque o pateo non enche a neveira ou paga o aluguer.
Chega a súa quenda. Séntese fráxil e triste. Desesperada e perdida. Ignorada e defraudada. Desexa que trala porta agarde a esperanza, transformada en solidariedade xenerosa que axude a erguerse e continuar. Ela e os que agardan alí necesítana. Pero, como eles, tamén a necesitamos os que ignoramos a nosa responsabilidade pero esixímola doutros, os que nos tragamos a dignidade dos nosos irmáns. Os que nos indignamos e criticamos pero non facemos nada. Os que lavamos a nosa conciencia con míseras migallas. Os que clamamos xustiza pero sen meternos no charco. Os que pensamos que a miseria só é unha situación económica. Os que nos esquecemos do Amor.
A porta da Caridade, da Fraternidade, está aberta para todos. É o único xeito posible de continuar adiante. Hai esperanza porque son moitos os que se decataron de que só arremangándose, mirando aos ollos ao irmán, traballando e soñando é posible construír algo mellor. Grazas a Deus son moitos os que van pola vida descalzos, porque saben que están pisando terra sagrada; a terra que pisan os que aquí son considerados os últimos pero alí son e serán os primeiros. A súa esperanza é realmente a nosa única esperanza.

María José Campo López-Barcia

Directora da Oficina de Prensa do Bispado de Lugo

Vicente Altaba diríxese ao voluntariado de Cáritas Galicia

O Delegado Episcopal de Cáritas Española, Vicente Altaba, diríxese ao voluntariado de Cáritas na comunidade galega

Cando me poño diante deste folio disposto a facervos chegar un saúdo no Día Internacional do Voluntariado, o primeiro que me vén á mente é comezar cunhas palabras de agradecmento a todas e todos vós polo que significades para Cáritas e polo excelente servizo que de xeito tan eficaz como calado e xeneroso ofrecedes día a día aos empobrecidos. Con todo, cando de xeito máis reflexivo entro na miña propia experiencia intentando falarvos de corazón a corazón, de voluntario a voluntario, vexo a necesidade de cambiar as miñas palabras e de comezar poñendo de manifesto a experiencia máis fonda que levamos dentro e que nos fai sentir cada día que somos nós os primeiros que nos sentimos profundamente agraciados e agradecidos polo don que significa ser voluntarios.

Si, hoxe é un día para proclamar e celebrar que ser voluntarios de Cáritas é unha graza, un don, un agasallo, unha profunda sorte. É unha sorte ter ollos abertos para ver o sufrimento dos pobres, oídos atentos para escoitar o seu clamor e corazón sensible para conmovernos. É un agasallo saír da nosa cova, das nosas comodidades e seguridades, deter o ritmo absurdo dunha vida vivida só para nós mesmos, e poñer o que somos e temos ao servizo dos irmáns tirados ao bordo do camiño, dos que máis necesitan, dos que son ignorados e esquecidos. E é unha graza experimentar que, detrás do clamor dos máis débiles e pobres, sentímonos chamados por un Deus que ten entranas de amor, que se conmove ante a pobreza e o sufrimento humano e convócanos a facer presente o seu Reino construíndo unha nova humanidade en que os excluídos poidan integrarse nunha soa familia humana, sentarse cos irmáns á mesa e vivir con dignidade.

Ler máis

Sebastián Mora advirte dunha segunda avalancha de pobreza

Sebastián Mora

O Secretario Xeral de Cáritas Española, Sebastián Mora deu unha rolda de prensa nos locais de Cáritas Lugo o día 27. Nela advertiu dunha segunda ondada de pobreza por tres motivos. Despois de catro anos de crise, os aforros das familias van esgotándose, a protección social pública sufriu unha erosión e as organizacións sociais non son infinitas na capacidade de axudar e non poden substituír ás familias nin ao Estado.

Tamén foron tres as liñas de acción que considerou determinantes para intentar solucionar a pobreza intensa: 1) unha renda básica de cidadanía para todas as familias que non teñen ningún tipo de ingreso (a nivel estatal son case 300.000); 2) políticas activas de emprego que xeren oportunidades de traballar especialmente para os colectivos máis excluídos e 3) maior colaboración cidadá, das empresas e das institucións, poñendo o foco na loita contra a pobreza e a exclusión social.

Actividades de Cáritas na penúltima fin de semana de decembro

LUGO  Tenda solidaria na praza Santo Domingo. Continúa aberta 3 semanas.

MEIRA  Taller de manualidades de arte navideño organizado pola Confraría Nosa Señora do Pedregal. Poñeranse a venta o día 22 de decembro na Feira de Meira. O que se recade donarase a Caritas parroquial.

MELIDE Mercado solidario en colaboración co Concello os días 21 e 22 de decembro

 MONFORTE DE LEMOS

Entrega de xoguetes e alimentos os días 22 e 23 de decembro

Repartición de cesta especial de Nadal na Parroquia de S. Antonio de Padua de Monforte de Lemos.

SARRIA

OPERACIÓN QUILO. Recollida os días 21 e 22 de decembro.

Animación na Residencia de anciáns Virxe do Carme o 22 de decembro

 

%d bloggers like this: