IV Curso de música litúrxica do Corpus Christi de Lugo

Está en marcha o IV Curso de música litúrxica do Corpus Christi de Lugo que organiza na primeira semana de xullo o Centro Eucarístico Lucense. Participan 27 persoas de toda Galicia e tamén de Barcelona. Cada xornada comeza cun estudo individual de órgano. Ás 11 h hai charlas sobre Música e Liturxia de Abraham Sánchez Pujante, Párroco de San Lázaro da Ponte. Diplomado en Frauta Traveseira e Dirección Coral. A estas charlas, que son no salón de actos do Seminario Diocesano de Lugo, pode asistir calquera persoa interesada nos seguintes temas:

  • “A liturxia, canto de loanza a Deus: por que cantamos?” (3 de xullo)
  • “A música na liturxia: que, como e cando cantamos?” (4 de xullo)
  • “A música ao ritmo da liturxia: Como preparar os cantos da Misa?” (5 de xullo)

A partir do mediodía prepáranse cantos gregorianos que se interpretarán durante a Eucaristía do domingo 7 ás 13 h na Catedral. E a mañá remata con estudo individual de órgano.

Polas tardes impártese técnica vocal, dirección coral e órgano. 

Como actos complementarios deste Curso están a presentación do disco “Interrogatorio a María” do organista Giulio Mercati (venres 5 ás 20:30 h na igrexa Santiago a Nova, Lugo) e a II Noite Coral Lucense (varios templos da cidade de Lugo a partir das 21 h do sábado 6 de xuño na Capela de San Roque, para ter un concerto conxunto no claustro da Catedral ás 23 h)

Curso de música litúrxica do Corpus Christi

Está organizado pola Delegación de Liturxia de Diocese de Lugo e polo Centro Eucarístico Lucense, que nos últimos seis anos vén desenvolvendo, entre as súas múltiples actividades, o Festival Internacional de Órgano do Corpus Christi de Lugo, ciclo que ten como principal obxectivo realzar a través da música para órgano a Solemnidade do Corpus Christi, festa por antonomasia da Cidade de Lugo, a Cidade do Sacramento.

Realízase este curso coa intención de contribuír á formación musical e litúrxica daqueles músicos que realizan distintas funcións no ámbito da música sacra: directores de formacións vocais, organistas, cantores, monitores, etc.

Despois do notable éxito da primeira edición da Noite Coral nesta cuarta edición haberá o 6 de xullo a II Noite Coral Lucense, coa que se desexa conectar o Curso de Música coa cidadanía. Trátase dun circuíto nocturno de concertos polos templos da cidade e un concerto final no claustro da Catedral.

[Información e inscrición]

Conferencias sobre música e liturxia

 Na terceira edición do Curso de Música Litúrxica que organizan a Delegación de Liturxia de Diocese de Lugo e o Centro Eucarístico Lucense, incluíronse 3 conferencias:

 O 4 de xullo, o Delegado de Liturxia, José Antonio Ferreiro Varela, falou da música ao servizo da participación activa nas celebracións litúrxicas para dar gloria a Deus e para a santificación das persoas. E explicou que a música non é un elemento engadido sen máis, senón que forma parte integral da acción litúrxica.

 O 5 de xullo o responsable do Departamento de Música do Secretariado da Conferencia Episcopal Española, Óscar Valado Domínguez, falou das características da música litúrxica, como nola presenta o Maxisterio da Igrexa e como se pode poñer en práctica nas parroquias e comunidades atendendo aos grados de participación dos fieis que propón a Instrución Musicam Sacram

E o 6 de xullo, o bispo de Lugo, Mons. Alfonso Carrasco comezou establecendo o marco que permite comprender a música sacra apelando a Von Balthasar: a arte verdadeira fai posible adiviñar o divino en canto que a arte desexa apropiarse do infinito para traelo ao mundo propio.

 Outro texto de interese é o inicio da I Carta de Xoán (“O que pasou desde o comezo, o que temos oído, o que teñen visto os nosos ollos, o que contemplamos nós e palparon as nosas mans, a saber, a Palabra que é a vida…”) porque tamén vén ser unha declaración programática en favor das posibilidades da arte.

Non é o mesmo dicir “Ten piedade, Señor” que cantalo ben, pois neste último caso resoa máis profundamente a petición, e noutros momentos o que resoe máis será a loanza do pobo, a conmoción…

Para Mons. Alfonso Carrasco, o  “Mesías” de Haendel expresa un gozo que non se pode facer desaparecer (hai guerras, revolucións… pero aí segue esa composición musical marabillando a quen a escoita). Un  exemplo máis, noutro nivel, é “Pescador de hombres”, que se canta con inmensa devoción por todo o mundo.

III Curso de Música Litúrxica do Corpus Christi

Organizado pola Delegación de Liturxia de Diocese de Lugo e polo Centro Eucarístico Lucense, este curso impártese na cidade de Lugo do 3 ao 8 de xullo de 2018. A intención é contribuír á formación musical e litúrxica daqueles músicos que realizan distisntas funcións no ámbito da música sacra: directores de formacións vocais, organistas, cantores, monitores, etc.

O curso está divido en catro modalidades: órgano, canto, dirección coral e iniciación ao canto litúrxico. Esta última modalidade é nova con respecto a edicións anteriores.

E outra actividade novidosa coa que se desexa conectar o Curso de Música cos cidadáns é a primeira edición da Noite Coral Lucense, un circuíto nocturno de concertos o 7 de xullo polos templos da cidade e un concerto final na Praza de Santa María.

[Inscrición]

A %d blogueros les gusta esto: