Encontro de laicos para compartir experiencias de fe e vida

Apostolado segrar 2015 2Con motivo do 50 aniversario do documento do Vaticano II Apostolicam Actuositatem (Decreto sobre o apostolado dos seglares), a Delegación de Apostolado Segrar de Lugo organizou a nivel diocesano un Encontro de Laicos o sábado 7 de novembro de 2015 no Seminario diocesano de Lugo.

O pasado sábado 7 de novembro, tivo lugar un Encontro de Laicos no Seminario diocesano de Lugo. Logo da oración inicial e unha breve presentación do Decreto sobre apostolado dos laicos, varias decenas de segrares participaron activamente dun traballo por grupos. Tras unha pausa-café, procedeuse a unha posta en común do realizado por seis grupos. As súas conclusións foron as seguintes:

A unión con Cristo reflíctese na alegría de vivir a fe que transparentamos. Aínda que intelectualmente sabémolo, ás veces nas nosas vidas non se mostra. O laico evanxeliza en lugares como as empresas e o traballo, onde a xerarquía non chega. De María aprendemos a aceptar a vontade de Deus, no servizo e disponibilidade.

En canto á restauración da orde temporal, a acción dos segrares diríxese á familia e a acción catequética, así como á axuda a familias necesitadas e adoptar un espírito evanxélico loitando contra o ambiente consumista.

A pertenenza á Igrexa diocesana exprésase na participación en actos comúns organizados desde a Diocese e na posibilidade de propoñer iniciativas eclesiais. Obsérvase a necesidade de promover o sentido comunitario desde grupos parroquiais. Ademais, interpela aos laicos o que non facemos ben e a escasa formación.

Os segrares non escondemos a fe nin o noso modo de vida, aínda que hai situacións en que nos atopamos perdidos para facilitar argumentos, en parte pola educación doctrinal dun Deus castigador, que contrasta cun Deus que agora nos dirixe cara á misión.

Constatamos unha crise asociativa, vinculada ao individualismo que afecta por igual na sociedade e na Igrexa. As asociacións eclesiais en xeral están moi envorcadas cara a dentro, ata se pensa que o movemento ou grupo ao que se pertence é o mellor, e obsérvase que deben cambiar algunhas actividades. Recoñecen que teñen escasa incidencia nos medios de comunicación e o ámbito cultural lucense, e o reto está no compromiso social, en abrirse a outros grupos e saír de actos repetitivos. Como suxestión proponse efectuar actividades noutros lugares da Diocese.

Existe un descoñecemento das funcións do consello diocesano e os consellos parroquiais, botándose en falta reunións de todos os grupos parroquiais.

Proponse fomentar a formación dos laicos colaborando en celebracións da palabra, sobre todo no ámbito rural. Así mesmo, na vida dos movementos e asociacións bótase en falta tanto o acompañamento dos pastores como o fortalecemento das relacións con sacerdotes e bispos (AA 25).

Encontro de laicos 7 novembro 2015Resaltamos a necesidade de formación dos laicos, pero proxectada ao exterior, existindo unha preocupación polos inmigrantes e refuxiados. Para rematar, valores como o diálogo, a formación e a cooperación son vistos con fe, alegría e esperanza.

A Delegación de Apostolado Segrar pon a disposición de sacerdotes, catequistas, profesores, movementos e asociacións, no Bispado, uns folletos impresos do Decreto sobre apostolado dos laicos (Apostolicam Actuositatem), enriquecido con textos do maxisterio da Igrexa e con cuestións para o seu estudo persoal e/ou traballo en grupo.

Encontro informativo da Acción Católica Xeral

Acción CatólicaO pasado sábado,14 de xuño, a Delegación de Apostolado Segrar da Diocese de Lugo organizou un encontro de sacerdotes e tamén de laicos da Diocese de Lugo para dar a coñecer máis de preto os novos retos da Acción Católica Xeral. Estiveron presentes na reunión o Presidente e o Consiliario de Acción Católica Xeral, D. Higinio Junquera e D. Fernando Altemir. A reunión tivo lugar na parroquia do Bo Pastor de Lugo. 

Xornadas de Apostolado Seglar entre os días 6 e 8 de xuño

Xornadas Apostolado Segrar web

As actividades previas ao Día do Apostolado Seglar comezan o venres 6 de xuño, ás 20:00, cunha charla de Xabier Blanco, salesiano, director do Colexio “Divina Pastora” de Lugo, que tratará sobre o lema deste curso a nivel diocesano: A fe, luz da vida. O lugar da conferencia é o salón de actos do Seminario Maior de Lugo.

Ao día seguinte, o sábado 7 de xuño, a vixilia de Pentecoste será na parroquia de Santiago A Nova de Lugo, ás 20:00. Este ano hai unha novidade significativa: ao rematar a vixilia, darán un concerto breve de “Xaquín e a súa banda”. Xaquín R. Pomares, cantautor cristián de referencia en Galicia, compartirá as súas cancións cos asistentes, tanto nenos, xóvenes como adultos.

Por último, o Día da Acción Católica e do Apostolado Seglar, o domingo 8 de xuño, celebraremos a solemnidade de Pentecoste cunha Eucaristía, presidida polo señor Bispo, D. Alfonso Carrasco, na catedral de Lugo, ás 13:00.

Reunións formativas organizadas pola Delegación de Apostolado Seglar

O día 10 de xaneiro de 2014, ás 20:30, en Monforte de Lemos, nos locais da parroquia de S. Antonio (rúa Manuel María, s/n), abordaranse “Algunhas características significativas da nosa sociedade”, reunión dirixida por Alfredo Losada, Delegado de apostolado seglar.

E o vindeiro martes, 21 de xaneiro de 2014, ás 19:30, en Melide, no salón da parroquia de S. Pedro (rúa Mateo Segade, nº 2), tratarase o tema “A familia de Nazaret”, dende claves bíblicas, reunión dirixida polo Delegado de Pastoral da Saúde e experto biblista, José Antonio Salgado. Estas reunións están enmarcadas na temática elixida, que durante este curso terá relación co documento “Los católicos en la vida pública”, aprobado pola Comisión Permanente da Conferencia Episcopal Española o 22 de abril de 1.986.

Retiro de Advento organizado pola Delegación de Apostolado Segrar

O Seminario de Lugo acolle o 14 de decembro un retiro de Advento dirixido por Jesús Fernández Aira, párroco de S. Francisco Xavier.

A Delegación de Apostolado Seglar invita especialmente a todos os seglares, cregos e, en xeral, a todas as persoas que queiran deixarse interpelar polo anuncio dunha persoa, Xesucristo, que enche os corazóns e a vida enteira de quen se achega a El.

Para facilitar a asistencia de familias, hai un servizo de atención a nenos, que estarán ben atendidos durante o retiro. Os interesados neste servizo contacto con antelación coa organización, no correo laicos@diocesisdelugo.org.

Horario:

  • 10:00 Oración

  • 10:30 Primeira sesión

  • 11:30 Reflexión

  • 12:00 Segunda sesión

  • 13:00 Eucaristía

  • 14:00 Hora de remate

A %d blogueros les gusta esto: