Vida e actualidade da Diocese de Lugo
O mércores 16 ás oito da tarde no Círculo das Artes hai un concerto que servirá para deleitarse coa música e recadar fondos destinados aos dous proxectos que financia a delegación de Lugo de Mans Unidas.
Coa Banda Municipal de Lugo, dirixida por Rosendo Iborra, actuará como solista de canto Lourdes Santos Sanz. O programa do Orfeón Lucense está a cargo de Marcos Fernández Mosquera.
Hai pezas da banda soa, outras só do Orfeón e varias interpretacións conxuntas das dúas agrupacións musicais.
Do mesmo xeito que en anos anteriores, o Bispo da Diocese convoca á mocidade para participar na Peregrinación e Encontro de mozos na Ermida da Nosa Señora de Faro. O sábado 19 de maio haberá un encontro de comuñón eclesial no que o Espíriu Santo derramará a súa xenerosa graza sobre todos os participantes.
O ano pasado participaron ao redor de 400 mozos; e espérase que cada convocatoria se vexa enriquecida cun número maior de xoves unidos para compartir a fe e manifestar ante o mundo a forza da Igrexa nova.
O horario é o seguinte:
10:15 – Chegada dos peregrinos ao Adro do Monte Faro (na estrada Chantada-Lalín).
10:30 – Acollida e comezo da peregrinación,
12:00 – Chegada dos peregrinos á Ermida de Nosa Señora do Faro. Testemuño de dous mozos participantes na Xornada Mundial da Mocidade 2011, cantos, confesións, etc.
13:00 – Eucaristía presidida polo noso Bispo. (Terminada a Misa exporase o Santísimo e trasladarase en procesión á Ermida na cal quedará exposto até a tarde. Cada grupo ou parroquia será o encargado de cubrir unha pequena quenda de adoración cos seus mozos).
14:00 – Comida. (Cada un levará a súa)
15:00 – Tempo de descanso.
17:00 – Bendición co Santísimo.
O lema escollido para este ano é Testemuñas do Amor. Esta frase está enmarcada nunhas palabras que o Papa dirixiu a todos os mozos o domingo de Ramos de 2011: “Sede testemuñas alegres e incansables do amor de Deus”.
Os que participen non terán que inscribirse. De todos os xeitos estaría ben que antes do día 14 de maio se facilite o número aproximado de xoves que irán de cada grupo para organizarnos mellor e informar á compañía de seguros.
Antes do día 15 o encargado de cada grupo que vaia desde Lugo e desexe facelo en autobús informará á Delegación do número de xoves, para poder así facer a contratación con tempo suficiente. Poden informar no teléfono 982 220 100.
Para estes peregrinos o autobús (ou autobuses) sairán ás 9:15 h. da Praza de Bretaña, en Lugo.
O programa da visita pastoral do señor Bispo á parroquia de San Froilán, de Lugo, é o seguinte.
– Venres, 11 de maio
Ás 8 h. Confirmacións (17 nenos/as e mozos/as)
– Domingo, 13 de maio
· Ás 12 h. Misa Estacional.
· Ás 13 h. encontro cos fieis no Salón Parroquial.
– Luns, 14 de maio
· Ás 10:00 h. visita ao colexio da Milagrosa e á Comunidade das Fillas da Caridade.
· Pola tarde, encontro cos grupos, movementos e colaboradores da parroquia e Eucaristía.
– Martes, 15 de maio.
· Ás 11 h. visita á Comunidade das Nais Agostiñas.
· Ás 12:30 h. Visita aos residentes e á Comunidade das Irmás da Cruz.
· Pola tarde, visita a algúns enfermos da parroquia e Eucaristía.
– Mércores, 16 de maio
· Visita á Alianza en Xesús por María e Eucaristía.
ALGUNHAS ACTIVIDADES MAIS DO SEÑOR BISPO O DÍA 11 DE MAIO
O Bispo de Lugo participa na presentación da colección “Mosteiros e Conventos”
O Bispo de Lugo, Mons. Alfonso Carrasco Rouco, participa no acto de presentación da colección “Mosteiros e conventos” da editorial Hércules, o venres 11 de maio, ás 11.30 h, na sala multiusos do Museo Provincial de Lugo.
Nesta presentación tamén participa o profesor titular de Historia Medieval da Universidade de Santiago de Compostela, José Miguel Andrade Cernadas.
A colección “Mosteiros e conventos” pretende facer unha homenaxe e recoñecemento da importancia histórica e cultural destes lugares de espiritualidade, así como resaltar a importancia que a súa existencia representou e representa para a sociedade.
O día 11, Eucaristia ás 13 h na Catedral
O mesmo día 11 Mons. Alfonso Carrasco Rouco preside unha Eucaristia ás 13 h na Catedral á que asisten centenares de ex traballadores de Telefónica do noroeste de España.
O 8 de maio, 60 seminaristas menores da Diocese de Lugo, acompañados por algúns dos seus profesores e formadores, visitaron o Parlamento de Galicia.
Durante as tres horas que durou a visita os seminaristas tiveron a posibilidade de coñecer os distintos lugares do Parlamento, desde o Salón dos Reis até as salas de reunión dos grupos políticos. Desde a zona de invitados presenciaron parte do debate que se estaba levando a cabo no Salón de Plenos.
Durante a súa visita, os seminaristas estiveron acompañados polos deputados Román Rodríguez e Marta Rodríguez, ambos da provincia de Pontevedra, María Seoane da provincia da Coruña e os lucenses Damaso López, María Lourdes Yáñez, María Emma Álvarez e Jaime Castiñeira.
O Presidente da Xunta Alberto Núñez Feijóo quixo recibir aos seminaristas no Salón dos Reis. Alí compartiu con eles máis de media hora e animounos a “estudar, formarse ben e apostar polos valores que emanan da fe cristiá e que son un alicerce básico da nosa sociedade”. Igualmente lembroulles a importancia da “Igrexa católica polo gran labor que realizou e segue realizando en favor da humanidade” e instounos a que buscasen “sen descanso a súa vocación a través do comprender e do saber e non do ter”. “E que saibades -asegurou Núñez Feijóo- que ten máis valor un cura dunha pequena parroquia rural que un presidente da Xunta”.
Organizado pola Vicaría de Ensino e a Delegación de Pastoral Universitaria, o 5 de maio de 2012 terá lugar o II Congreso de Educadores católicos no Gran Hotel Lugo.
Preténdese crear un espazo de encontro para os educadores católicos da Diocese: mestres xubilados ou en activo, alumnos de Maxisterio, profesores de Instituto, de Universidade, sacerdotes, catequistas…
O programa é o seguinte:
10:30 Saúdo de benvida e oración
11:00 Identidade e método do educador católico: ilu-sión pola verdade
Mons. Manuel Sánchez Monge, Bispo de Mondoñedo-Ferrol
12:30 h Experiencias educativas
Da escola á facultade. 1842-2011, por D. Francisco Rodríguez Lestegás, Decano da Facultade de Formación do Profesorado
Preescolar na casa, Equipo de educadores
A escola católica, por Dª. Concepción Muñoz, Directora do CPR María Auxiliadora – Salesianas de Lugo.
Este II Congreso de Educadores católicos continúa pola tarde (16h) coa intervención de Mini e Mero: “ O son da escola” e cunha homenaxe a educadores ilustres. A Clausura, ás 17 farase coas seguintes intervencións:
– D. José Ramos Ledo, Xefe territorial da Consellería de Educación en Lugo
– D. Alfonso Carrasco Rouco, Bispo de Lugo