Igrexa

Encontro rexional de Radio María en Lugo

Tras unha reunión de traballo que teñen a véspera os responsables de Radio María a nivel estatal e da comunidade galega, o día 8 de xullo pola mañá e pola tarde, voluntarios da emisora nas dioceses galegas terán no Seminario Diocesano momentos para a oración (Ángelus, Santa Misa, Rosario, oración de envío) e a formación (campaña 2017, como evanxelizar, como gravar un programa). E a partir das 18:30h na Aula Magna do Seminario invítase a todos os oíntes a participar na gravación do programa “Voluntarios”.

Xornada pro orantibus

O lema para a Xornada deste ano 2017 é Contemplar o mundo coa mirada de Deus; é unha expresión tomada da nova constitución apostólica para a vida contemplativa feminina Vultum Dei quaerere (2016), no seu n. 10. O papa Francisco recórdanos como debe ser a contemplación ao mundo e ás persoas: coa mirada de Deus. Deus sempre mira ao mundo e a cada ser humano desde o amor.

Os monxes e monxas que viven, oran e traballan nos máis de 800 mosteiros da Igrexa que peregrina en España foron mirados por Deus cun amor que cativou os seus corazóns transformándoos. E cada día comulgan coas penas e as tristezas dos homes, cos seus gozos máis nobres e as súas esperanzas máis altas.

[Materiais da Xornada]

Bicentenario dos maristas

O xoves 8 de xuño ás 19 h lévase a cabo un acto dentro das celebracións do Bicentenario Marista. Será na Aula Magna do Seminario Diocesano e terá o seguinte esquema:

  • Vídeo Maristas en Lugo

  • Intervención do Superior Provincial de Maristas Compostela, Tomás Briongos: O bicentenario, a Misión Marista, hoxe e o futuro

  • Palabras dun Irmán marista que estivo no colexio.

  • Testemuños de antigo alumno, profesor xubilado, pai de alumno/a e alumno

  • Un representante da Igrexa falará do labor evanxelizador dos maristas en Lugo

  • Peche do acto por parte do director do colexio

A cada asistente entrégase un detalle institucional.

Ao finalizar o acto, hai unha degustación dun viño español no colexio.

O sábado 10 de xuño hai unha Eucaristía na igrexa Santiago A Nova ás 11h

Pascua do Enfermo

A Pascua do Enfermo, o VI domingo de Pascua (21 de maio) acolle a invitación do papa Francisco na encíclica Laudato si’. Nela pídenos que coidemos e traballemos pola prevención das enfermidades: estando atentos aos riscos da contorna natural ou social que poidan causalas e promovendo accións ou actitudes que poidan axudar a ter máis saúde persoal e comunitaria. Así, o tema e lema son: Pastoral da saúde e ecoloxía integral: “Saúde para ti, saúde para a túa casa?” (1 Sam 25, 6).

O cartel da Campaña 2017 trata de mostrar estas ideas, resaltando que a saúde non é unha cousa que nos cae do ceo; é unha realidade na que nós pintamos algo. Nós tamén somos responsables de construíla, fomentala, evitar a enfermidade… Temos un papel activo na promoción da saúde. Pois, dirixindo a nosa mirada ao mundo, vemos moitas situacións da nosa contorna que non a favorecen. Máis ben son axentes que provocan enfermidades: desastres ecolóxicos, contaminación atmosférica, uso de sustancias tóxicas, actitudes insás… Invítasenos a construír a nosa casa común (o mundo) e, con iso, fomentar vida e saúde.

 No santuario do Corpiño, na Santa Misa das 12, os enfermos poderán recibir o Sacramento da Unción. 

[Materias para a Xornada]

Xornada de Oración polas Vocacións

Neste cuarto domingo de Pascua, domingo do Bo Pastor, recórdasenos unha vez máis que Xesús coñece o nome e a historia de cada un de nós. El é a porta que estamos chamados a atravesar, a voz inconfundible que se nos invita a seguir. Esa imaxe inspíranos e axúdanos a vivir a Xornada Mundial de Oración polas Vocacións e a Xornada de Vocacións Nativas que se celebra de xeito conxunto baixo o lema Empuxados polo Espírito: aquí estou, envíame.

O papa Francisco, na súa mensaxe deste ano lémbranos a dimensión misioneira da vocación cristiá. Quen responde á chamada de Deus para seguir o seu camiño, descobre ben pronto o desexo incontible de levar a Boa Noticia aos homes os seus irmáns. Non estamos sós nesta tarefa, Xesús camiña ao noso carón.

[Materiais escritos]  [Vídeo]

A %d blogueros les gusta esto: