A Delegación de Mans Unidas de Lugo súmase ao acto que o 21 de novembro terá lugar en todo o planeta baixo o lema “24 horas que moven o mundo”. Ás 18:30 h haberá unha concentración na praza de Santa María, onde se lerá un manifesto e permanecerán velas encendidas como símbolo do que se pretende: indicar que se pode facer luz para que desapareza a escuridade que representa o incumprimento dos dereitos básicos da persoa en tantas partes do mundo.
Vixilia de oración con motivo da clausura do Ano da fe
Convídase aos sacerdotes encargados de igrexas que na tarde-noite do día 23 de novembro organicen vixilias de oración nas que se dará grazas a Deus polo don da fe ao mesmo tempo que se pide a súa graza para que a fe permaneza e creza na nosa terra.
Propostas:
-
apertura das igrexas de Lugo e das vilas até entrada a noite.
-
Exposición do Santísimo Sacramento.
-
oración e reflexión con textos da palabra de Deus, e tamén con parágrafos da Encíclica do Papa Francisco, Lumen fidei.
Lémbrase aos fieis que aínda non o fixesen, que poden peregrinar ás igrexas onde se pode gañar indulxencia plenaria.
Tamén se concede indulxencia plenaria a quen, un día elixido libremente, visite o baptisterio ou lugar onde se recibiu o sacramento do bautismo, renovando as promesas bautismais en calquera forma lexítima.
Miguel Ángel Álvarez: Amor e verdade non se poden separar
Un dos puntos de Lumen fidei fala da unidade de amor e verdade. É o número 27, que di así:
E así se pode ver en que sentido o amor ten necesidade de verdade. Só en canto está fundado na verdade, o amor pode perdurar no tempo, superar a fugacidade do instante e permanecer firme para dar consistencia a un camiño en común. Se o amor non ten que ver coa verdade, está suxeito ao vaivén dos sentimentos e non supera a proba do tempo. (LF 27)
Nestas liñas o Papa Francisco advírtenos de dous perigos. Que o amor non estea fundado na verdade e de guiarnos só por uns sentimentos que poden facernos cóxegas no estómago, pero que tamén carecen de fundamento.
Dise que se colle antes a un mentireiro que a un coxo. No mundo actual leva moito o das aparencias. Desde vestidos que disimulen o noso exceso de quilos, até decorados virtuais en televisión… Por suposto que non está mal que as persoas e as cousas se mostren agradables á vista.
Pero, ao mesmo tempo, é vital que o importante da nosa vida estea ben fundamentado. Non serve de nada enganarnos a nós mesmos… O golpe ao caer pode ser moi grande.
Unha boa expresión do amor é a vida matrimonial, que, doutra banda, para o cristián é imaxe da unión de Cristo coa súa Igrexa. É aquí onde vemos claro como o amor necesita alimentarse da verdade.
A nosa fe en Cristo tampouco pode estar a mercé dos nosos sentimentos, do ben ou mal que me levante cada mañá, ou do ben ou mal que nos vaia o día, ou a mesma vida, nin sequera do cura que presida a Misa dominical ou do Bispo que nos toque en cada momento da historia.
Unha fe volátil serve de pouco. Unha fe firmemente fundamentada no amor e a verdade é para toda a vida. Amor e verdade non se poden separar.
Miguel Ángel Álvarez Pérez
Párroco de San Froilán
D. Gonzalo Fraga Vázquez, novo Deán da Catedral
D. Gonzalo Fraga Vázquez desempeña, desde o venres 15 de novembro, o cargo de Deán da Catedral de Lugo, ao ser admitida a renuncia presentada por quen até agora exercía dito oficio, D. Luciano Armas Vázquez.
D. Gonzalo Fraga asume este cargo por ser o cóengo en activo máis antigo en precedencia, tal e como sinalan os estatutos do cabido lucense, mentres non se proceda á elección e posterior nomeamento dun novo Deán.
Charla sobre o Ano da fe na parroquia de San Froilán
O 15 de novembro ás 18h, o profesor do Seminario e deán da Catedral, Luciano Armas Vázquez, pronunciará no salón de actos da parroquia de San Froilán unha conferencia-catequese co título “O Ano da Fe e a encíclica Lumen Fidei”. Con ela conclúese unha serie de actividades formativas e relixiosas que en torno ao Ano da Fe estivo organizando nos últimos meses a parroquia de San Froilán.
O día 19 comeza a solemne novena en honra da Virxe da Medalla Milagrosa na igrexa parroquial de San Froilán. Ás 19:15h, rezo do rosario e exercicio piadoso e ás 19:30, Eucaristía. A proclamación da Palabra está a cargo de Marcos Torres Gómez, sacerdote de Santiago A Nova.