Diocese

Terceira peregrinación a Fátima da Hospitalidade de Lourdes

Viaxe a Fátima da Hospitalidade de Lourdes

Do venres 13 ao luns 16 de setembro terá lugar a terceira viaxe a Fátima que organiza a Hospitalidade Diocesana de Lourdes de Lugo, co seguinte programa:

VENRES DÍA 13:

18 h: Visita á nova Basílica Subterránea e Celebración Comunitaria da Penitencia na mesma.

19:15 horas: Misa na Capelinha, presidida por Lugo. 

SÁBADO DÍA 14:

6:30 horas: Misa na Basílica (voluntaria), presidida por Lugo.

Despois do almorzo, visita a: Lisboa; Belén; Estoril; Cascais; Sintra.

21:30 horas: Participación na Procesión dos Fachos, con actuación de Lugo.

DOMINGO DÍA 15:

  11 horas: Participación na Misa Internacional, con actuación de Lugo.

Trala comida, excursión a Bathala (Santa María da Vitoria); Nazaré.

21:30 horas: Participación (voluntaria) na Procesión dos Fachos.

LUNS DÍA 16:

8 h: Saída para Coimbra: visita da cidade en coche. Continuación da viaxe e visita a todo o conxunto de Bon Jesú. Pola tarde, visita ao gran Santuario de Sameiro, onde se celebrará a Misa de Despedida.

Actos na Diocese con motivo da Xornada pola paz

actos pola paz na Diocese Lugo 7 setembro

A Catedral de Lugo acolle a xornada de oración pola paz en Siria, en Oriente Medio e no mundo enteiro o sábado 7 ás 19 h. Invítase a participar a todos os fieles que o desexen.

Outra parroquias da Diocese tamén se unen á Xornada, como así o fan constar algunhas delas en comunicacións públicas por distintos medios e que reproducimos aquí.

Nota da Vicaría Xeral do Bispado de Lugo, ante o chamamento pola paz do Papa Francisco

Chamamento Papa

Con motivo do conflito que afecta á poboación de Siria, o Papa Francisco convocou en toda a Igrexa universal, para o próximo 7 de setembro, véspera da Natividade de María, Raíña da Paz, unha Xornada de oración e xaxún pola paz en Siria, en Oriente Medio e no mundo enteiro.

A Igrexa diocesana de Lugo, facéndose eco desta invitación do Papa Francisco, únese a esta iniciativa, polo que exhorta aos fieis das parroquias, aos  membros das comunidades relixiosas, movementos apostólicos e institucións, a vivir esta Xornada de xaxún e oración  desde as 19 h. ata as 24h.

Na nosa Diocese, dado o seu carácter eucarístico, invitamos especialmente a organizar momentos de oración ante o Santísimo Sacramento na S. I. Catedral, rosarios, eucaristías pola paz, exposicións eucarísticas, celebracións da Palabra, actos penitenciais e outras formas de celebracións. Deste xeito, uníndonos ás intencións do Papa, imploramos de Deus o don da paz para a nación siria e para todas as situacións de conflito e de violencia no planeta.

Ramón Rodríguez Mondelo: 50 anos de ministerio sacerdotal

Ramón Rodríguez Mondelo

  Ramón Rodríguez Mondelo, naceu o 9 de xuño de 1939. Recibiu o bautismo na parroquia de Santa María de Villaster, Quiroga. Estudou no Seminario de Lugo e foi ordenado sacerdote polo Bispo Ona de Echave o 11 de agosto de 1963.
Tras dous anos como coadxutor da parroquia de Santa María da Régoa, en Monforte, foi destinado á parroquia de San Martín de Suarna, na Fonsagrada.
A esta parroquia inicial iránselle engadindo as parroquias de Lamas de Campos, Fonfría, Monteseiro, Allonca, A Fonsagrada, Poboa de Burón, Padrón, Negueira de Muñiz, Ouviaño, Barcela, Ernes, Río de Porto e Cuiñas.
En 1990 foi nomeado arcipreste da zona.
Todo o que coñece a Don Ramón sabe que pasou a súa vida ao servizo da Igrexa, completamente entregado ás súas parroquias e fregueses. Aínda que non naceu alí converteuse nun fonsagradino máis. Aceptado e estimado por todos eles.
A súa cara amable, o seu xesto tenro e sincero, a súa xenerosidade con todos, en especial cos pobres, son trazos do seu carácter e a súa maneira de ser que o fixeron un sacerdote moi querido e apreciado.
A súa preocupación polas igrexas levouno a arranxalas mesmo co seu propio diñeiro. As súas restauracións destacan polo gusto e estilo co que se levaron a cabo. Foi o precursor da recuperación do Santuario de Nosa Señora da Veiga en Negueira de Muñiz, cuxa festa se celebra o 15 de agosto.
Don Ramón é un home de gran formación teolóxica e moita sensibilidade litúrxica. Destacan os seus espectaculares beléns en Nadal e os coidados monumentos en Semana Santa.
Ademais é o gran impulsor do Camiño Primitivo. Puxo en marcha, con moito esforzo, o primeiro albergue desta ruta na parroquia de O Padrón. Tendo en conta a atención espiritual e material a todos os peregrinos.
Don Ramón celebra agora as súas vodas sacerdotais. Cincuenta anos ao servizo da Igrexa e dos seus fieis. A súa vida de entrega aos demais é motivo de agradecemento. Un verdadeiro pastor que viviu entregado ás súas ovellas.

[María José Campo López-Barcia – Miguel Ángel Álvarez Pérez]

Xornadas de autoemprego de Cáritas

Xornadas Por que non (Cáritas)

Cáritas Diocesanas de Lugo organizou as segundas xornadas de autoemprego baixo o título `Por que non… ?’ para persoas que buscan no autoemprego unha alternativa ao traballo como asalariado ou un complemento.

A actividade, realizada durante as mañás dos días 28 e 29 de agosto, forma parte do proxecto Empréga-te, posto en marcha por Cáritas. Os asistentes estaban inscritos no servizo de emprego da institución.

O primeiro día houbo testemuños de tres profesionais que crearon o seu propio posto de traballo. E o día 29 explicáronse polo miúdo as distintas fases do proxecto Empréga-te, incluíndo un taller de redacción de distintas ideas de negocio.

A %d blogueros les gusta esto: